Amaravati: సింగీతం శ్రీనివాసరావు మృతి పట్ల పవన్ కళ్యాణ్ సంతాపం!

Amaravati: ప్రముఖ దర్శకుడు శ్రీ సింగీతం శ్రీనివాసరావు గారు కన్నుమూశారని తెలిసి తీవ్ర విచారం వ్యక్తం చేస్తున్నానని ఉప ముఖ్యమంత్రి పవన్ కళ్యాణ్ తెలిపారు. భారతీయ చలనచిత్ర రంగానికి విభిన్నమైన, ప్రయోగాత్మకమైన చిత్రాలను అందించిన సింగీతం శ్రీనివాసరావు గారి మరణం సినీ పరిశ్రమకు తీరని లోటని పేర్కొన్నారు.

సింగీతం శ్రీనివాసరావు గారు తనదైన ఆలోచనా విధానంతో, వినూత్నమైన కథనంతో తెలుగు సినిమాకు కొత్త ఒరవడిని పరిచయం చేశారని పవన్ కళ్యాణ్ అన్నారు. సాధారణ కథలను కూడా అసాధారణమైన రీతిలో తెరకెక్కిస్తూ ప్రేక్షకులను మెప్పించిన దర్శకుల్లో ఆయన ఒకరని పేర్కొన్నారు.

పుష్పక విమానం, విచిత్ర సోదరులు, మయూరి, ఆదిత్య 369, మైఖేల్ మదన కామరాజు వంటి చిత్రాల్లో ఆయన చేసిన ప్రయోగాలు, చూపిన సృజనాత్మకత ప్రేక్షకులను విశేషంగా ఆకట్టుకున్నాయని తెలిపారు. ముఖ్యంగా భిన్నమైన కథాంశాలను ఎంచుకోవడంలో, వాటిని తెరపై ఆవిష్కరించడంలో సింగీతం శ్రీనివాసరావు గారు తన ప్రత్యేకతను చాటుకున్నారని అన్నారు.

సినిమా అంటే కేవలం వినోదం మాత్రమే కాదని, కొత్త ఆలోచనలకు, ప్రయోగాలకు కూడా వేదిక అని తన చిత్రాల ద్వారా నిరూపించారని పవన్ కళ్యాణ్ పేర్కొన్నారు. అమెరికా అమ్మాయి, పంతులమ్మ వంటి చిత్రాల్లోని గీతాలు కూడా ప్రేక్షకుల ఆదరణ పొందాయని గుర్తుచేశారు.

94 ఏళ్ల వయసులోనూ ‘సింగ్ గీతం’ అనే చిత్రానికి దర్శకత్వం వహించడం ఆయనకు సినిమాపై ఉన్న అంకితభావానికి, నిరంతర ఆసక్తికి నిదర్శనమని పవన్ కళ్యాణ్ అన్నారు. వయసు ఆయన సృజనాత్మక ప్రయాణానికి ఏనాడూ అడ్డంకిగా నిలవలేదని పేర్కొన్నారు.

సింగీతం శ్రీనివాసరావు గారి మరణంతో భారతీయ చలనచిత్ర రంగం ఒక విలక్షణమైన సృజనకర్తను కోల్పోయిందని పవన్ కళ్యాణ్ ఆవేదన వ్యక్తం చేశారు. ఆయన ఆత్మకు శాంతి చేకూరాలని భగవంతుణ్ణి ప్రార్థిస్తున్నానని, ఆయన కుటుంబ సభ్యులకు తన ప్రగాఢ సానుభూతిని తెలియజేస్తున్నానని తెలిపారు.

– పవన్ కళ్యాణ్

ఉప ముఖ్యమంత్రి