AP: ఏపీ పర్యాటకంలో ఏఐ విప్లవం.. స్మార్ట్ డెస్టినేషన్ల వైపు అడుగులు!

AP: ఆంధ్రప్రదేశ్ పర్యాటక రంగాన్ని అత్యాధునిక సాంకేతికతతో అనుసంధానిస్తూ స్మార్ట్ డెస్టినేషన్లుగా తీర్చిదిద్దేందుకు ప్రభుత్వం కీలక అడుగు వేసింది. పర్యాటక ప్రాంతాల చరిత్ర, సంస్కృతి, ప్రత్యేకతలను ప్రపంచవ్యాప్తంగా ఉన్న సందర్శకులకు వారి సొంత భాషలో అందుబాటులోకి తీసుకురావడమే లక్ష్యంగా కృత్రిమ మేధస్సు (ఏఐ) ఆధారిత సేవలను ప్రవేశపెట్టింది. స్పెయిన్‌లోని సెవిల్లె-ఫిబెస్ వేదికగా జరుగుతున్న అంతర్జాతీయ టూరిజం ఇన్నోవేషన్ సమ్మిట్-2026లో రాష్ట్ర పర్యాటక, సాంస్కృతిక, సినిమాటోగ్రఫీ మంత్రి కందుల దుర్గేష్ ఈ సాంకేతికతను ప్రపంచ పర్యాటక రంగానికి పరిచయం చేశారు.

‘నివు ఏఐ’తో కొత్త శకం

ఎక్స్‌ప్లర్జర్ సంస్థ రూపొందించిన ‘నివు ఏఐ’ (NiVU AI – Neural Intelligence Vernacular Unified Model) ప్లాట్‌ఫారమ్‌ను ఏపీ పర్యాటక రంగంలో వినియోగించేందుకు ప్రభుత్వం ఇప్పటికే ఒప్పందం కుదుర్చుకుంది. దీని ద్వారా రాష్ట్రంలోని ప్రముఖ పర్యాటక ప్రాంతాలు, పుణ్యక్షేత్రాలు, చారిత్రక ప్రదేశాలకు వచ్చే సందర్శకులు కేవలం క్యూఆర్ కోడ్ స్కాన్ చేయడం ద్వారా ఆయా ప్రాంతాల గురించి సమాచారం తెలుసుకునే అవకాశం ఉంటుంది.

ప్రత్యేకంగా యాప్‌ను డౌన్‌లోడ్ చేసుకోవాల్సిన అవసరం లేకుండానే ఈ సేవలను వినియోగించుకోవచ్చని మంత్రి తెలిపారు. ‘ASK AI’ పేరుతో ఏర్పాటు చేసిన క్యూఆర్ కోడ్‌ను స్కాన్ చేస్తే 130కి పైగా భాషల్లో పర్యాటక విశేషాలను తెలుసుకునే అవకాశం ఉంటుందని వెల్లడించారు. ఈ సేవలు పర్యాటకులకు పూర్తిగా ఉచితంగా అందుబాటులో ఉంటాయని స్పష్టం చేశారు.

తొలి దశలో 30 ప్రధాన గమ్యస్థానాలు

రాష్ట్రవ్యాప్తంగా 100కు పైగా ప్రముఖ పర్యాటక, ఆధ్యాత్మిక ప్రాంతాల్లో ‘నివు ఏఐ’ ఆధారిత సేవలను అందించేందుకు చర్యలు చేపడుతున్నామని మంత్రి దుర్గేష్ తెలిపారు. ఇందులో భాగంగా తొలి దశలో 30 ప్రధాన పర్యాటక గమ్యస్థానాల్లో ఈ సాంకేతిక సేవలను అందుబాటులోకి తీసుకురానున్నారు.

మంగళగిరిలోని శ్రీ పానకాల లక్ష్మీ నరసింహస్వామి ఆలయంలో ఈ విధానం ఇప్పటికే విజయవంతంగా అమలు చేసినట్లు మంత్రి వివరించారు. ఒక ప్రాంతానికి వచ్చిన పర్యాటకుడు అక్కడ ఏర్పాటు చేసిన క్యూఆర్ కోడ్‌ను స్కాన్ చేసి తనకు కావాల్సిన సమాచారాన్ని తన భాషలో తెలుసుకునే విధంగా వ్యవస్థను రూపొందించారు.

స్పెయిన్ పర్యాటకుడికి తెలుగునాట అనుభవం

ఒక స్పెయిన్ పర్యాటకుడు ఆంధ్రప్రదేశ్‌లోని ఏదైనా పురాతన కట్టడం లేదా పవిత్ర స్థలాన్ని సందర్శించినప్పుడు అక్కడి క్యూఆర్ కోడ్‌ను స్కాన్ చేసి స్పానిష్ భాషలోనే ఆ ప్రదేశం గురించి ప్రశ్నలు అడిగి సమాధానాలు పొందవచ్చని మంత్రి ఉదాహరణగా వివరించారు. ఆ ప్రాంత చరిత్ర, సాంస్కృతిక ప్రాధాన్యత, ప్రత్యేకతలతో పాటు సమీపంలోని ఇతర పర్యాటక ప్రాంతాల గురించి కూడా తెలుసుకునే అవకాశం ఉంటుందని తెలిపారు.

ఇది కేవలం డిజిటల్ సమాచార వ్యవస్థ కాదని.. పర్యాటకుడు, పర్యాటక గమ్యస్థానం మధ్య ఒక డిజిటల్ వారధిని నిర్మించే ప్రయత్నమని మంత్రి పేర్కొన్నారు. భాషా అవరోధాలను తగ్గించడం ద్వారా విదేశీ పర్యాటకులకు ఆంధ్రప్రదేశ్‌ను మరింత చేరువ చేయవచ్చన్నారు.

పర్యాటకుల అవసరాలపై రియల్‌టైమ్ సమాచారం

‘నివు ఏఐ’ ద్వారా పర్యాటకులకు సమాచారం అందించడమే కాకుండా, వారి ప్రాధాన్యతలు, భాషలు, ఆసక్తులు, ప్రవర్తనా సరళిపై రియల్‌టైమ్ అనలిటిక్స్ అందుబాటులోకి వస్తాయని మంత్రి తెలిపారు. భవిష్యత్తులో పర్యాటక ప్రణాళికలను రూపొందించేందుకు ఈ డేటా ఉపయోగపడుతుందని వివరించారు.

పర్యాటకుల అవసరాలను ముందుగానే అర్థం చేసుకుని కొత్త గమ్యస్థానాలను అభివృద్ధి చేయడం, మౌలిక వసతులను మెరుగుపరచడం, సేవలను మరింత సమర్థంగా అందించడం వంటి అంశాల్లో సాంకేతికత కీలకంగా మారుతుందని పేర్కొన్నారు.

తిరుమల నుంచి విశాఖ తీరం వరకు వైవిధ్యం

ఆంధ్రప్రదేశ్ పర్యాటక రంగంలోని వైవిధ్యాన్ని మంత్రి దుర్గేష్ అంతర్జాతీయ వేదికపై వివరించారు. తిరుమల దివ్య పుణ్యక్షేత్రం నుంచి అమరావతి బౌద్ధ వారసత్వం వరకు.. గండికోట అద్భుత ప్రకృతి దృశ్యాల నుంచి మారేడుమిల్లి అరణ్యాల వరకు.. అరకు లోయల నుంచి విశాఖ సముద్రతీరం వరకు ఒకే రాష్ట్రంలో విభిన్న అనుభూతులను పొందే అవకాశం ఉందన్నారు.

ఆధ్యాత్మిక పర్యాటకం, బౌద్ధ వారసత్వం, గిరిజన సంస్కృతి, స్థానిక కళలు, సంప్రదాయ వంటకాలు, అడవులు, నదులు, జలపాతాలు, సముద్రతీరాలు వంటి అనేక ప్రత్యేకతలు ఆంధ్రప్రదేశ్‌కు ఉన్నాయని తెలిపారు. ఒకే ప్రయాణంలో ఇంతటి భౌగోళిక, సాంస్కృతిక వైవిధ్యాన్ని అందించగల గమ్యస్థానంగా ఏపీ ప్రత్యేకతను వివరించారు.

ఏఆర్, వీఆర్, డిజిటల్ ట్విన్స్‌ వినియోగం

భవిష్యత్ పర్యాటకంలో కేవలం సమాచారాన్ని అందించడం కాకుండా అనుభవాన్ని సృష్టించడమే లక్ష్యంగా సాంకేతికతను వినియోగించనున్నట్లు మంత్రి తెలిపారు. ఆగ్మెంటెడ్ రియాలిటీ (AR), వర్చువల్ రియాలిటీ (VR), ఆర్టిఫిషియల్ ఇంటెలిజెన్స్ (AI), డిజిటల్ ట్విన్స్ వంటి ఆధునిక సాంకేతిక పరిజ్ఞానాన్ని పర్యాటక రంగంతో అనుసంధానించేందుకు ప్రభుత్వం కృషి చేస్తోందన్నారు.

ప్రపంచంలో ఎక్కడి నుంచైనా ఆంధ్రప్రదేశ్‌లోని ప్రకృతి వనరులు, అడవులు, పర్యాటక ప్రాంతాల గురించి అనుభవపూర్వకంగా తెలుసుకునే అవకాశాలను సాంకేతికత ద్వారా కల్పించవచ్చన్నారు. తద్వారా పర్యాటకులలో రాష్ట్రాన్ని సందర్శించాలనే ఆసక్తిని మరింత పెంచవచ్చని తెలిపారు.

‘స్మార్ట్ డెస్టినేషన్’ అంటే డేటా మాత్రమే కాదు

స్మార్ట్ డెస్టినేషన్ అంటే కేవలం డేటాను సేకరించడం లేదా డిజిటల్ సమాచారాన్ని అందించడం కాదని మంత్రి దుర్గేష్ అన్నారు. పర్యాటకులకు ఎదురయ్యే సమస్యలను తగ్గించడం, స్థానిక సంస్కృతిని మరింత లోతుగా పరిచయం చేయడం, స్థానికులకు ఉపాధి అవకాశాలను పెంచడం, బాధ్యతాయుతమైన పర్యాటకాన్ని ప్రోత్సహించడం కూడా అందులో భాగమేనని చెప్పారు.

ప్రయాణానికి ముందు ప్రణాళిక రూపొందించుకోవడం నుంచి గమ్యస్థానానికి చేరుకున్న తర్వాత సమాచారం పొందడం, రవాణా సదుపాయాలను గుర్తించడం, స్థానిక అనుభవాలను ఆస్వాదించడం, ప్రయాణం ముగిసిన తర్వాత కూడా ఆ అనుభూతిని కొనసాగించడం వరకు పర్యాటకుడి పూర్తి ప్రయాణంలో సాంకేతికత భాగస్వామి కావాలని ఆకాంక్షించారు.

టెక్ సంస్థలకు పెట్టుబడుల ఆహ్వానం

పర్యాటక రంగంలో మరిన్ని సాంకేతిక ఆవిష్కరణలకు అవకాశం కల్పించేందుకు ఆంధ్రప్రదేశ్ ప్రభుత్వం సిద్ధంగా ఉందని మంత్రి తెలిపారు. ట్రావెల్-టెక్ సంస్థలు, స్టార్టప్‌లు, విశ్వవిద్యాలయాలు, పర్యాటక ఆపరేటర్లు, పెట్టుబడిదారులు, కంటెంట్ క్రియేటర్లు, గమ్యస్థాన నిపుణులతో కలిసి పనిచేయడానికి ప్రభుత్వం సిద్ధంగా ఉందన్నారు.

ఏఐ ఆధారిత పర్యాటక సేవలు, డిజిటల్ టూల్స్, స్మార్ట్ డెస్టినేషన్ మేనేజ్‌మెంట్, కొత్త తరహా పర్యాటక అనుభవాల రంగాల్లో పెట్టుబడులు పెట్టాలని అంతర్జాతీయ సంస్థలకు పిలుపునిచ్చారు. సమాజానికి నిజమైన ప్రయోజనం చేకూర్చే ఆవిష్కరణలకు ప్రభుత్వం ప్రాధాన్యం ఇస్తుందని తెలిపారు.

ప్రపంచానికి ఏపీకి ఆహ్వానం

భారతదేశాన్ని ఇప్పటికే చూసేశామని భావించే పర్యాటకులు ఒక్కసారి ఆంధ్రప్రదేశ్‌కు వస్తే రాష్ట్రంలోని వైవిధ్యం వారిని ఆశ్చర్యపరుస్తుందని మంత్రి దుర్గేష్ అన్నారు. “మీరు భారతదేశాన్ని చూసేశామని అనుకుంటే.. ఒకసారి ఆంధ్రప్రదేశ్‌కు రండి.. ఒకే యాత్రలో అద్భుతమైన వైవిధ్యాన్ని తిలకించేలా మిమ్మల్ని ఆశ్చర్యపరుస్తాం” అని అంతర్జాతీయ వేదికపై ఆహ్వానించారు.

పర్యాటకులుగా మాత్రమే కాకుండా భాగస్వాములుగా ఆంధ్రప్రదేశ్‌కు రావాలని గ్లోబల్ ఇన్వెస్టర్లు, పర్యాటక రంగ నిపుణులను కోరారు. సాంకేతికత, వారసత్వం, సంస్కృతి, ప్రకృతి వనరులను సమన్వయం చేస్తూ ఆంధ్రప్రదేశ్‌ను అంతర్జాతీయ స్థాయి స్మార్ట్ టూరిజం గమ్యస్థానంగా తీర్చిదిద్దేందుకు ప్రభుత్వం కృషి చేస్తోందని మంత్రి దుర్గేష్ తెలిపారు.

ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ నాయకత్వంలో రాష్ట్రాన్ని ఆధునిక సాంకేతికతకు అనుగుణంగా అభివృద్ధి చేస్తున్నామని పేర్కొన్న మంత్రి.. పర్యాటక రంగంలోనూ సాంకేతిక విప్లవానికి శ్రీకారం చుట్టామని స్పష్టం చేశారు. వారసత్వ సంపదకు ఆధునిక సాంకేతికతను జోడించడం ద్వారా ప్రపంచ పర్యాటకులకు ఆంధ్రప్రదేశ్‌ను మరింత చేరువ చేయడమే లక్ష్యమని తెలిపారు.