Vijayawada: విజయవాడలో నేడు పాన్‌ ఐఐటీ సమ్మిట్-2026 ప్రారంభం!

Vijayawada: విజయవాడలో పాన్‌ ఐఐటీ ఆంధ్రప్రదేశ్ సమ్మిట్‌–2026కు రంగం సిద్ధమైంది. ఐఐటీలు, ప్రముఖ విద్యాసంస్థల్లో చదివి దేశ, విదేశాల్లో వివిధ రంగాల్లో కీలక స్థానాల్లో ఉన్న తెలుగు వారిని ఒకే వేదికపైకి తీసుకొచ్చే లక్ష్యంతో ఈ సదస్సు నిర్వహిస్తున్నారు. రాష్ట్ర అభివృద్ధిలో నైపుణ్యం, సాంకేతికత, ఆవిష్కరణలు, పెట్టుబడులకు మరింత ప్రాధాన్యత ఇవ్వాలన్న ఉద్దేశంతో ఈ కార్యక్రమాన్ని ఏర్పాటు చేశారు.

ఈ నేపథ్యంలో శుక్రవారం రాత్రి విజయవాడ నోవోటెల్‌ హోటల్‌లో పాన్‌ ఐఐటీ సభ్యులతో ప్రత్యేక డిన్నర్‌ సమావేశం జరిగింది. ముఖ్యమంత్రి చంద్రబాబు నాయుడు, మంత్రి నారా లోకేష్‌ ఈ సమావేశంలో పాల్గొన్నారు. రాష్ట్రానికి చెందిన ఐఐటీ పూర్వ విద్యార్థులు, వివిధ రంగాల్లో నిపుణులుగా ఉన్నవారితో సీఎం, మంత్రి మాట్లాడారు. రాష్ట్రంలో ప్రస్తుతం కొనసాగుతున్న అభివృద్ధి కార్యక్రమాలు, భవిష్యత్‌ అవసరాలు, సాంకేతిక రంగంలో అందుబాటులో ఉన్న అవకాశాలపై చర్చ జరిగినట్లు సమాచారం.

ముఖ్యంగా అమరావతి నిర్మాణం, పారిశ్రామిక అభివృద్ధి, స్టార్టప్‌ ఎకోసిస్టమ్‌, ఆర్టిఫిషియల్‌ ఇంటెలిజెన్స్‌, డీప్‌టెక్‌, విద్య, నైపుణ్యాభివృద్ధి వంటి అంశాల్లో నిపుణుల సహకారం తీసుకోవడంపై చర్చకు ప్రాధాన్యత ఇచ్చినట్లు తెలుస్తోంది. ప్రపంచవ్యాప్తంగా పనిచేస్తున్న ఐఐటీ పూర్వ విద్యార్థులు తమ అనుభవం, పరిజ్ఞానాన్ని ఆంధ్రప్రదేశ్‌ అభివృద్ధికి వినియోగించేలా భాగస్వామ్యాలను పెంచుకోవడమే సమావేశం ప్రధాన ఉద్దేశంగా కనిపిస్తోంది.

ఇక ఇవాళ మధ్యాహ్నం 1 గంటకు విజయవాడలోని అంబేద్కర్‌ కళా వేదికలో పాన్‌ ఐఐటీ ఆంధ్రప్రదేశ్‌ సమ్మిట్‌–2026 ప్రధాన కార్యక్రమం జరగనుంది. ఈ సదస్సుకు ముఖ్యమంత్రి చంద్రబాబు నాయుడు ముఖ్య అతిథిగా హాజరుకానున్నారు. మంత్రి నారా లోకేష్‌తో పాటు ఐఐటీ పూర్వ విద్యార్థులు, పారిశ్రామికవేత్తలు, సాంకేతిక నిపుణులు, విద్యావేత్తలు, వివిధ రంగాలకు చెందిన ప్రముఖులు పాల్గొననున్నారు.

రాష్ట్ర అభివృద్ధికి ప్రభుత్వం చేపడుతున్న కార్యక్రమాల్లో నిపుణుల భాగస్వామ్యాన్ని పెంచుకోవడమే ఈ సమ్మిట్‌లో కీలక అంశంగా ఉండనుంది. ముఖ్యంగా నాలెడ్జ్‌ ఎకానమీ, టెక్నాలజీ, ఆర్టిఫిషియల్‌ ఇంటెలిజెన్స్‌, ఇన్నోవేషన్‌ రంగాల్లో ఆంధ్రప్రదేశ్‌ను ముందుకు తీసుకెళ్లేందుకు ఐఐటీ నిపుణుల అనుభవాన్ని ఎలా ఉపయోగించుకోవాలన్న దానిపై చర్చ జరిగే అవకాశం ఉంది...

పాన్‌ ఐఐటీ వేదిక అనేది దేశంలోని వివిధ ఐఐటీల పూర్వ విద్యార్థులను అనుసంధానించే వేదిక. ఐఐటీ పూర్వ విద్యార్థులు దేశ, విదేశాల్లో సాంకేతికత, పరిశ్రమలు, పరిశోధన, విద్య, స్టార్టప్‌లు తదితర రంగాల్లో కీలకంగా ఉన్నారు. వీరి పరిజ్ఞానం, నెట్‌వర్క్‌, పెట్టుబడులు రాష్ట్రానికి ఉపయోగపడేలా భాగస్వామ్యాలను అభివృద్ధి చేయడం ద్వారా ఆంధ్రప్రదేశ్‌లో కొత్త అవకాశాలకు మార్గం ఏర్పడుతుందనే అంచనాలు ఉన్నాయి. ముఖ్యంగా యువతకు ఉపాధి, నైపుణ్యాభివృద్ధి, స్టార్టప్‌లకు ప్రోత్సాహం, పరిశోధన–పరిశ్రమల అనుసంధానం వంటి అంశాలకు ఈ వేదిక ప్రాధాన్యత ఇవ్వనుంది...