Mangalagiri: పోలీసు అమరులకు సీఎం చంద్రబాబు నివాళి.. మంగళగిరిలో సంస్మరణ దినం

Mangalagiri: ప్రజల రక్షణ కోసం విధి నిర్వహణలో ప్రాణాలు అర్పించిన పోలీసు అమరవీరులకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఘనంగా నివాళులర్పించారు. పోలీసు అమరవీరుల సంస్మరణ దినం సందర్భంగా బుధవారం మంగళగిరిలోని ఏపీఎస్పీ ఆరో బెటాలియన్‌లో ఉన్న అమర జవాన్ స్మృతి చిహ్నం వద్ద పుష్పగుచ్ఛం ఉంచి నివాళులర్పించారు.

దేశవ్యాప్తంగా విధి నిర్వహణలో ప్రాణాలు కోల్పోయిన పోలీసు అమరవీరులను స్మరించుకుంటూ సీఎం, హోంమంత్రి వంగలపూడి అనిత, డీజీపీ, ప్రభుత్వ ప్రధాన కార్యదర్శి, ఇతర ఉన్నతాధికారులు మౌనం పాటించారు. అనంతరం పోలీసు అమరవీరుల సంస్మరణ నిధికి ముఖ్యమంత్రి విరాళం అందించారు. పోలీసు శాఖలోని వివిధ విభాగాలు ఏర్పాటు చేసిన ప్రదర్శనలను తిలకించి, ఆధునిక ఆయుధాలు, ఫోరెన్సిక్ ఉపకరణాలు, విపత్తుల నిర్వహణ పరికరాల గురించి అధికారులను అడిగి తెలుసుకున్నారు.

1959 అక్టోబర్ 21న పది మంది పోలీసుల వీరమరణం

పోలీసు అమరవీరుల సంస్మరణ దినం ప్రాధాన్యతను వివరిస్తూ సీఎం చంద్రబాబు మాట్లాడారు. 1959 అక్టోబర్ 21న లడఖ్‌లో చైనా సైనికుల దాడిని తిప్పికొడుతూ పది మంది పోలీసులు వీరమరణం పొందారని గుర్తుచేశారు. ఆ త్యాగాలకు గుర్తుగా ప్రతి ఏడాది అక్టోబర్ 21న పోలీసు అమరవీరుల సంస్మరణ దినాన్ని నిర్వహిస్తున్నామని తెలిపారు.

మాతృభూమి రక్షణతో పాటు ప్రజల భద్రత కోసం ప్రాణాలను సైతం త్యాగం చేసిన పోలీసు సిబ్బంది సేవలను సమాజం ఎప్పటికీ గుర్తుంచుకోవాలని అన్నారు. అమరవీరుల త్యాగాలను స్మరించుకోవడం కేవలం సానుభూతి చూపడం మాత్రమే కాదని, అది సమాజం బాధ్యత అని స్పష్టం చేశారు. ప్రజల రక్షణ కోసం నిరంతరం పనిచేసే పోలీసుల సేవలను గౌరవించుకోవాలని పిలుపునిచ్చారు.

ఖాకీ అంటే బాధ్యత.. పోలీసు అంటే భరోసా

ఖాకీ దుస్తులు బాధ్యతకు ప్రతీకగా నిలిస్తే, పోలీసు వ్యవస్థ ప్రజలకు భరోసా కల్పిస్తుందని చంద్రబాబు పేర్కొన్నారు. ప్రమాదం జరిగినా, నేరం జరిగినా, ఆపదలో ఎవరైనా చిక్కుకున్నా ముందుగా గుర్తుకు వచ్చేది పోలీసులేనని చెప్పారు. ప్రజలు ప్రశాంతంగా జీవించేందుకు పోలీసులు నిరంతరం విధులు నిర్వహిస్తున్నారని కొనియాడారు.

దుర్గగుడి శరన్నవరాత్రుల నుంచి విజయవాడ ఉత్సవ్ వరకు పెద్ద కార్యక్రమాల నిర్వహణలో పోలీసుల పాత్ర కీలకమని పేర్కొన్నారు. వీఐపీల భద్రత, శాంతిభద్రతల పరిరక్షణ, ప్రజా కార్యక్రమాల నిర్వహణ వంటి బాధ్యతలను పోలీసులు సమర్థంగా నిర్వర్తిస్తున్నారని ప్రశంసించారు. ప్రజల ఇళ్లలో పండుగ వెలుగులు నింపేందుకు పోలీసులు తమ కుటుంబాలతో పండుగలను కూడా దూరం చేసుకుంటారని అన్నారు.

శాంతిభద్రతలతోనే అభివృద్ధి.. పెట్టుబడులు

శాంతిభద్రతలు, అభివృద్ధి, ఉపాధి, ప్రజల సుఖసంతోషాలు పరస్పరం ముడిపడి ఉన్నాయని ముఖ్యమంత్రి స్పష్టం చేశారు. భద్రతపై నమ్మకం ఉన్న ప్రాంతాల్లోనే పారిశ్రామికవేత్తలు పెట్టుబడులు పెట్టేందుకు ముందుకొస్తారని, తద్వారా ఉద్యోగ, ఉపాధి అవకాశాలు పెరుగుతాయని వివరించారు.

అలజడి, అశాంతి, అభద్రత ఉన్న ప్రాంతాల్లో పెట్టుబడులు పెట్టేందుకు పారిశ్రామికవేత్తలు ఆసక్తి చూపరని అన్నారు. అందుకే తాను అధికారంలో ఉన్న ప్రతిసారీ శాంతిభద్రతలకు ప్రాధాన్యత ఇస్తానని పేర్కొన్నారు. ప్రజలు ప్రశాంతంగా జీవించడంతో పాటు రాష్ట్రానికి పెట్టుబడులు రావాలంటే పటిష్ఠమైన పోలీసు వ్యవస్థ అవసరమని అభిప్రాయపడ్డారు.

ఏపీ పోలీసులకు ప్రత్యేక గుర్తింపు

క్లిష్టమైన పరిస్థితులను ఎదుర్కోవడంలో, నేరాలను ఛేదించడంలో ఆంధ్రప్రదేశ్ పోలీసులకు మంచి ట్రాక్ రికార్డు ఉందని చంద్రబాబు పేర్కొన్నారు. గతంలో ఫ్యాక్షన్‌ను నియంత్రించడం, తీవ్రవాదాన్ని ఎదుర్కోవడం, మత కలహాలను అరికట్టడం వంటి సవాళ్లను పోలీసులు ధైర్యంగా ఎదుర్కొన్నారని గుర్తుచేశారు.

ఇటీవల దేశ భద్రతకు ముప్పు కలిగించే కుట్రలను ఏపీ కౌంటర్ ఇంటెలిజెన్స్ విభాగం ఛేదించిందని తెలిపారు. ఈ చర్యలు రాష్ట్ర పోలీసు శాఖ ప్రతిష్ఠను మరింత పెంచాయని అభినందించారు. దేశ భద్రతకు సంబంధించిన కీలక వ్యవహారాల్లో అప్రమత్తంగా వ్యవహరించిన పోలీసు అధికారులను, సిబ్బందిని ప్రశంసించారు.

బాధితులకు నమ్మకం.. నేరస్థులకు భయం

పోలీసు విధుల్లో ధైర్యం ఎంత అవసరమో, మానవత్వం కూడా అంతే అవసరమని సీఎం సూచించారు. పోలీసు స్టేషన్‌కు వచ్చే ప్రతి వ్యక్తి తన సమస్యకు పరిష్కారం లభిస్తుందనే ఆశతో వస్తాడని చెప్పారు. కొందరు భయంతో, మరికొందరు కన్నీళ్లతో పోలీసులను ఆశ్రయిస్తారని, వారి సమస్యలను మానవత్వంతో పరిష్కరించాలని సూచించారు.

పోలీసు యూనిఫాం బాధితులకు అభయం కల్పించాలని, పోలీసులను ఆశ్రయించే ప్రతి ఒక్కరికీ గౌరవం దక్కాలని అన్నారు. ఫిర్యాదులపై తక్షణమే స్పందించడం ద్వారా ప్రజల్లో నమ్మకం పెంపొందించాలని పేర్కొన్నారు. నేరస్థుడికి పోలీసులను చూస్తే భయం కలగాలని, బాధితుడికి పోలీసులపై నమ్మకం ఉండాలని స్పష్టం చేశారు.

రాజకీయ ముసుగులో జరిగే నేరాలను సహించకూడదని, రాజకీయాలు నేరస్థులకు రక్షణ కల్పించకూడదని అన్నారు. ప్రజలను ఇబ్బంది పెట్టే రౌడీలు, సామాజిక మాధ్యమాల ద్వారా వేధింపులకు పాల్పడే వ్యక్తులపై కఠినంగా వ్యవహరించాలని పోలీసు అధికారులకు సూచించారు.

సైబర్ నేరాలపై అప్రమత్తంగా ఉండాలి

నేరాలు చేసే పద్ధతులు మారుతున్న నేపథ్యంలో దర్యాప్తు విధానాలు కూడా ఆధునికంగా మారాలని చంద్రబాబు పేర్కొన్నారు. ఒక్క ఫోన్‌కాల్, ఒక లింక్ లేదా ఒక సందేశం ద్వారా సైబర్ నేరగాళ్లు ప్రజలు జీవితాంతం కష్టపడి సంపాదించిన సొమ్మును దోచుకుంటున్నారని ఆందోళన వ్యక్తం చేశారు. చదువుకున్న వారు సైతం సైబర్ మోసాలకు బలవుతున్నారని గుర్తుచేశారు.

సైబర్ నేరాల నియంత్రణకు ఆధునిక సాంకేతిక పరిజ్ఞానాన్ని విస్తృతంగా వినియోగించాలని సూచించారు. నేరం జరిగిన తర్వాత దర్యాప్తు చేసి నిందితులను పట్టుకోవడం ఎంత ముఖ్యమో, నేరం జరగకుండా ముందుగానే అడ్డుకోవడం కూడా అంతే ముఖ్యమని చెప్పారు. నేరాలను నివారించడమే ఉత్తమ పోలీసింగ్‌కు నిదర్శనమని స్పష్టం చేశారు.

ఏఐ, డ్రోన్లతో పోలీసింగ్‌కు కొత్త దిశ

పోలీసు వ్యవస్థలో సాంకేతిక పరిజ్ఞానం వినియోగాన్ని మరింత పెంచాలని ముఖ్యమంత్రి సూచించారు. సీసీ కెమెరాలు నేరాలకు సంబంధించిన దృశ్యాలను అందిస్తాయని, డేటా విశ్లేషణ ద్వారా నేరాల వెనుక ఉన్న వాస్తవాలను గుర్తించవచ్చని వివరించారు. డ్రోన్లు పోలీసుల నిఘా పరిధిని పెంచుతాయని, కృత్రిమ మేధ (ఏఐ) ఆధారిత విశ్లేషణ దర్యాప్తు సామర్థ్యాన్ని మెరుగుపరుస్తుందని పేర్కొన్నారు.

మంగళగిరిలోని కార్యక్రమంలో పోలీసు శాఖ ఏర్పాటు చేసిన ప్రదర్శనలను పరిశీలించిన సీఎం, ఫోరెన్సిక్ ఉపకరణాలు, డిజాస్టర్ రిలీఫ్ పరికరాలు, ఆక్టోపస్ సహా వివిధ విభాగాలు వినియోగించే ఆధునిక ఆయుధాల గురించి వివరాలు తెలుసుకున్నారు. నిఘా సహా వివిధ అవసరాల కోసం డ్రోన్ల వినియోగాన్ని పెంచాలని అధికారులకు సూచించారు.

సాంకేతిక పరిజ్ఞానాన్ని సమర్థంగా వినియోగించుకోవడం ద్వారా నేరాల నియంత్రణ, దర్యాప్తు, ప్రజా భద్రతలో మెరుగైన ఫలితాలు సాధించాలని అన్నారు. దేశవ్యాప్తంగా ఏపీ పోలీసులకు సాంకేతిక పరిజ్ఞానంలో అగ్రగామి శాఖగా గుర్తింపు రావాలని ఆకాంక్షించారు.

మహిళల భద్రతకు అత్యంత ప్రాధాన్యత

రాష్ట్రంలో మహిళలకు పూర్తి భద్రత కల్పించడం పోలీసు శాఖ ప్రధాన బాధ్యతల్లో ఒకటని చంద్రబాబు పేర్కొన్నారు. డీప్ టెక్, కృత్రిమ మేధ యుగంలో మహిళలకు భద్రత కల్పించలేకపోతే అభివృద్ధికి అర్థం ఉండదని అన్నారు. మహిళలపై నేరాలకు పాల్పడాలంటే నేరస్థులు భయపడే పరిస్థితిని పోలీసులు కల్పించాలని స్పష్టం చేశారు.

గంజాయి, మాదకద్రవ్యాల నియంత్రణలో ఈగల్ బృందం చేస్తున్న కృషిని అభినందించారు. యువతను మత్తు పదార్థాల బారి నుంచి కాపాడేందుకు నిరంతర చర్యలు అవసరమని సూచించారు. రాష్ట్రాన్ని ఆరోగ్యవంతంగా, సురక్షితంగా, సంతోషంగా ఉండే ప్రాంతంగా తీర్చిదిద్దడంలో పోలీసుల పాత్ర కీలకమని పేర్కొన్నారు.

రోడ్డు ప్రమాదాల నివారణపై దృష్టి

రోడ్డు ప్రమాదం అంటే ఒక వ్యక్తి ప్రాణాలు కోల్పోవడమే కాదని, ఆ కుటుంబం మొత్తం రోడ్డున పడే పరిస్థితి ఏర్పడుతుందని సీఎం ఆవేదన వ్యక్తం చేశారు. ప్రమాదాల నివారణకు తీసుకుంటున్న చర్యల ఫలితాలు క్షేత్రస్థాయిలో కనిపించాలని పోలీసు అధికారులకు సూచించారు. ట్రాఫిక్ నియంత్రణ, రహదారి భద్రత, ప్రజల్లో అవగాహన పెంపు వంటి అంశాలపై నిరంతరం దృష్టి సారించాలని పిలుపునిచ్చారు.

పోలీసుల సంక్షేమానికి ప్రభుత్వం అండ

పోలీసులు తీవ్రమైన ఒత్తిడితో కూడిన విధులు నిర్వహిస్తున్నారని చంద్రబాబు పేర్కొన్నారు. శారీరకంగా మాత్రమే కాకుండా మానసికంగా కూడా దృఢంగా ఉండాలని సూచించారు. యోగా, ధ్యానం వంటి పద్ధతుల ద్వారా ఒత్తిడిని తగ్గించుకోవాలని చెప్పారు.

ప్రతి పౌరుడు ప్రశాంతంగా నిద్రపోవాలని, ప్రతి ఒక్కరి ప్రాణాలకు, ఆస్తులకు భద్రత ఉండాలని ఆకాంక్షించారు. రాష్ట్రంలో శాంతిభద్రతల పరిరక్షణలో ఏపీ మోడల్‌ను దేశానికి ఆదర్శంగా నిలపాలని పిలుపునిచ్చారు. పోలీసు అమరవీరుల కుటుంబాలకు ప్రభుత్వం అండగా ఉంటుందని, పోలీసు సిబ్బంది సంక్షేమానికి కృషి చేస్తామని భరోసా ఇచ్చారు.

ప్రజల భద్రత కోసం ప్రాణాలను అర్పించిన అమరవీరుల త్యాగాలను గౌరవిస్తూ, వారి ఆశయాలకు అనుగుణంగా పనిచేయడమే వారికి అందించే నిజమైన నివాళి అని ముఖ్యమంత్రి చంద్రబాబు పేర్కొన్నారు...