Amaravati: ముగిసిన సీఎం చంద్రబాబు–డిప్యూటీ సీఎం పవన్ కల్యాణ్ భేటీ!

Amaravati: ముఖ్యమంత్రి చంద్రబాబు నాయుడు, డిప్యూటీ సీఎం పవన్ కల్యాణ్ మధ్య కీలక భేటీ ముగిసింది. సుమారు రెండు గంటల పాటు సాగిన ఈ సమావేశంలో రాష్ట్ర రాజకీయ పరిణామాలతో పాటు రానున్న స్థానిక సంస్థల ఎన్నికల్లో కూటమి అనుసరించాల్సిన వ్యూహంపై ప్రధానంగా చర్చించినట్లు సమాచారం. ముఖ్యంగా తెలుగుదేశం, జనసేన పార్టీల మధ్య మరింత సమన్వయంతో ముందుకు వెళ్లే అంశంపై ఇరువురు నేతలు దృష్టి సారించినట్లు తెలుస్తోంది.

స్థానిక సంస్థల ఎన్నికల్లో కూటమి 100 శాతం గెలుపే లక్ష్యంగా పనిచేయాలని చంద్రబాబు, పవన్ కల్యాణ్ నిర్ణయించినట్లు సమాచారం. ఎన్నికలను కేవలం పార్టీల పరంగా కాకుండా కూటమి సమిష్టి విజయంగా చూడాలని, క్షేత్రస్థాయి నుంచి రాష్ట్రస్థాయి వరకు రెండు పార్టీల మధ్య సమన్వయం పటిష్టంగా ఉండేలా చర్యలు తీసుకోవాలని నిర్ణయించినట్లు తెలుస్తోంది.

టీడీపీ–జనసేన మధ్య సమన్వయం కోసం ప్రత్యేకంగా జాయింట్ మెకానిజం ఏర్పాటు చేసే అంశం కూడా సమావేశంలో చర్చకు వచ్చినట్లు సమాచారం. గ్రామ, మండల, నియోజకవర్గ స్థాయిల నుంచి రాష్ట్రస్థాయి వరకు ఇరు పార్టీల నేతలు సమన్వయంతో పనిచేసేలా ఒక వ్యవస్థను రూపొందించే ఆలోచన ఉన్నట్లు తెలుస్తోంది. ఎన్నికల సమయంలో తలెత్తే స్థానిక సమస్యలను వెంటనే పరిష్కరించేలా ఈ సమన్వయ వ్యవస్థ పనిచేసే అవకాశం ఉంది.

స్థానిక సంస్థల ఎన్నికల్లో సీట్ల సర్దుబాటుపైనా చంద్రబాబు, పవన్ మధ్య చర్చ జరిగినట్లు సమాచారం. ఏ ప్రాంతంలో ఏ పార్టీకి బలం ఉందో అక్కడ ఆ పార్టీకి ప్రాధాన్యం ఇవ్వాలనే సూత్రప్రాయ అంగీకారం కుదిరినట్లు తెలుస్తోంది. స్థానికంగా పార్టీల బలాబలాలు, అభ్యర్థుల సామర్థ్యం, గత ఎన్నికల ఫలితాలు, క్షేత్రస్థాయి పరిస్థితులను పరిగణనలోకి తీసుకుని సీట్ల సర్దుబాటు చేయాలని నిర్ణయించినట్లు సమాచారం.

కూటమి భాగస్వామ్య పక్షాల్లో ఎవరికైతే ఏ ప్రాంతంలో బలం ఉందో.. అక్కడ ఆ పార్టీ పోటీ చేసేలా పరస్పర అవగాహనతో ముందుకు వెళ్లాలని ఇరువురు నేతలు భావించినట్లు తెలుస్తోంది. ఒకరి బలాన్ని మరొకరు దెబ్బతీయకుండా.. కూటమి ఓట్లను చీలకుండా ఎన్నికల వ్యూహాన్ని రూపొందించాలన్నదే ప్రధాన ఉద్దేశంగా కనిపిస్తోంది.

అదే సమయంలో స్థానిక ఎన్నికల్లో టీడీపీ–జనసేన నేతలు, కార్యకర్తల మధ్య ఎలాంటి విభేదాలకు తావులేకుండా కలిసి పనిచేయాలని చంద్రబాబు, పవన్ స్పష్టం చేసినట్లు సమాచారం. ముఖ్యంగా క్షేత్రస్థాయిలో రెండు పార్టీల కార్యకర్తల మధ్య సమన్వయం కీలకమని భావించినట్లు తెలుస్తోంది. స్థానికంగా సీట్ల విషయంలో భిన్నాభిప్రాయాలు వచ్చినా.. వాటిని చర్చల ద్వారా పరిష్కరించుకుని కూటమి అభ్యర్థి విజయానికి అందరూ కలిసి పనిచేసేలా మార్గదర్శకాలు ఇవ్వాలని నిర్ణయించినట్లు సమాచారం.

కూటమి ఐక్యతపై క్షేత్రస్థాయి నేతలు, కార్యకర్తలకు స్పష్టమైన సందేశం ఇవ్వాలని కూడా ఇద్దరు నేతలు నిర్ణయించినట్లు తెలుస్తోంది. ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజల్లోకి తీసుకెళ్లడంతో పాటు.. స్థానిక ఎన్నికల్లో కూటమి అభ్యర్థుల గెలుపు కోసం సమన్వయంతో పనిచేయాల్సిన అవసరాన్ని పార్టీ శ్రేణులకు వివరించనున్నారు.

రానున్న స్థానిక సంస్థల ఎన్నికలను కూటమి ఐక్యతకు కీలక పరీక్షగా భావిస్తున్న టీడీపీ, జనసేన.. సీట్ల సర్దుబాటు నుంచి ప్రచారం వరకు ప్రతి దశలోనూ సమన్వయంతో ముందుకు వెళ్లేలా వ్యూహాన్ని సిద్ధం చేస్తున్నట్లు ఈ భేటీ ద్వారా స్పష్టమవుతోంది.