Vijayawada: స్థానిక సంస్థల ఎన్నికలకు బీజేపీ శ్రేణులు సన్నద్ధం!

Vijayawada: బీజేపీ రాష్ట్ర కార్యాలయంలో నిర్వహించిన పాత్రికేయుల సమావేశంలో ఆ పార్టీ రాష్ట్ర ప్రధాన కార్యదర్శి నాగోతు రమేష్ నాయుడు, ఎమ్మెల్సీ పోతుల సునీత మాట్లాడారు. తొలుత నాగోతు రమేష్ నాయుడు మాట్లాడుతూ.. వైసీపీ నేతలపై విమర్శలు గుప్పించారు.

కూటమి ప్రభుత్వం అధికారంలోకి వచ్చిన తర్వాత ఆంధ్రప్రదేశ్‌లో పెట్టుబడులకు అనుకూల వాతావరణం ఏర్పడిందని నాగోతు రమేష్ నాయుడు అన్నారు. భూముల లభ్యత, పారిశ్రామిక అభివృద్ధికి అనుకూల పరిస్థితులు, మౌలిక వసతుల కల్పనతో పెట్టుబడిదారులు రాష్ట్రం వైపు చూస్తున్నారని చెప్పారు. అభివృద్ధి పనులు కూడా వేగంగా కొనసాగుతున్నాయని తెలిపారు.

రాష్ట్రంలో సాగునీటి ప్రాజెక్టుల ద్వారా నీరు పారుతున్న పరిస్థితులను ప్రజలు ప్రత్యక్షంగా చూస్తున్నారని అన్నారు. వెలుగోడు ప్రాజెక్టు నుంచి నీటి ప్రవాహాన్ని ప్రజలు గమనించారని చెప్పారు. గతంలో కుప్పానికి నీళ్లు తీసుకువస్తామని చెప్పిన సందర్భంలో చోటుచేసుకున్న పరిణామాలను కూడా ప్రజలు గుర్తు చేసుకుంటున్నారని పేర్కొన్నారు. గత ప్రభుత్వ పాలనకు, ప్రస్తుత కూటమి పాలనకు ప్రజలు స్వయంగా పోలిక చేసుకుంటున్నారని అన్నారు.

ప్రజాస్వామ్యంలో ప్రతి ఒక్కరికీ తమ అభిప్రాయాలను వ్యక్తం చేసే హక్కు ఉందని నాగోతు రమేష్ నాయుడు చెప్పారు. ఒక వర్గానికి ఉద్యమం చేసే హక్కు ఉన్నట్లే.. మరో వర్గానికి తమ వాస్తవాలను ప్రజలకు వివరించే హక్కు ఉంటుందని అన్నారు. భిన్నాభిప్రాయాలను వినే ఓపిక ప్రజాస్వామ్యంలో ప్రతి ఒక్కరికీ ఉండాలని సూచించారు.

ప్రజల్లో గందరగోళం సృష్టించడం, మద్యం సేవించిన వారిని ప్రేరేపించి ఇతరులపై దాడులకు పాల్పడేలా చేయడం, అవహేళన చేయడం వంటి చర్యలను కూటమి ప్రభుత్వం సహించబోదని హెచ్చరించారు. ప్రజాస్వామ్య గొంతుకలు స్వేచ్ఛగా పనిచేసే వాతావరణం రాష్ట్రంలో ఉండాలని ప్రభుత్వం కోరుకుంటోందని తెలిపారు. వైసీపీ అధినేత వైఎస్ జగన్ రాజకీయ ప్రస్థానంలో అనుసరించిన విధానాలను, గత పరిణామాలను ప్రజలు గమనిస్తున్నారని అన్నారు. కూటమి ప్రభుత్వం చేపడుతున్న అభివృద్ధి కార్యక్రమాలను చిన్నవిగా చూపించే ప్రయత్నాలు చేసినా ప్రజల అనుభవాలను మార్చలేరని పేర్కొన్నారు.

అనంతరం ఎమ్మెల్సీ పోతుల సునీత మాట్లాడుతూ.. 2024 అసెంబ్లీ ఎన్నికల్లో టీడీపీ, జనసేన, బీజేపీ కలిసి కూటమిగా పోటీ చేసి ప్రజల మద్దతుతో ప్రభుత్వం ఏర్పాటు చేశాయని తెలిపారు. అధికారంలోకి వచ్చిన తర్వాత ప్రజలకు ఇచ్చిన హామీల అమలుతో పాటు సంక్షేమం, అభివృద్ధికి ప్రభుత్వం ప్రాధాన్యత ఇస్తోందన్నారు.

ప్రధానమంత్రి నరేంద్ర మోదీ నాయకత్వంలోని కేంద్ర ప్రభుత్వం ఆంధ్రప్రదేశ్ అభివృద్ధికి సహకరిస్తోందని పోతుల సునీత అన్నారు. అమరావతి అభివృద్ధి, పోలవరం ప్రాజెక్టుతో పాటు రాష్ట్రంలోని పలు అభివృద్ధి కార్యక్రమాలకు కేంద్రం సహకారం అందిస్తోందని తెలిపారు.

రాబోయే స్థానిక సంస్థల ఎన్నికలకు బీజేపీ కార్యకర్తలు ఉత్సాహంగా సిద్ధమవుతున్నారని చెప్పారు. గ్రామస్థాయి నుంచి పార్టీని మరింత బలోపేతం చేసేందుకు కార్యకర్తలు ప్రజల్లో విస్తృతంగా పనిచేస్తున్నారని అన్నారు. టీడీపీ, జనసేనతో సమన్వయంతో స్థానిక సంస్థల ఎన్నికలను ఎదుర్కొనే అంశంపై కూటమి నాయకత్వం కృషి చేస్తోందని తెలిపారు.

ముఖ్యమంత్రి చంద్రబాబు నాయుడు, జనసేన అధినేత పవన్ కళ్యాణ్‌తో పాటు బీజేపీ నాయకత్వం సమన్వయంతో ముందుకు సాగాలని కోరుకుంటున్నామని పోతుల సునీత అన్నారు. స్థానిక సంస్థల ఎన్నికల్లో అభివృద్ధి, సంక్షేమం, ప్రజా సమస్యల పరిష్కారానికి ప్రాధాన్యతనిచ్చే అభ్యర్థులను ప్రజలు ఆదరించాలని కోరారు. పార్టీని గ్రామస్థాయి వరకు బలోపేతం చేసేందుకు బీజేపీ శ్రేణులంతా కలిసికట్టుగా పనిచేస్తామని తెలిపారు.