Nara Lokesh: మంత్రి లోకేష్‌ను కలిసిన ప్రఖ్యాత ఆర్చర్ జ్యోతి సురేఖ!

Nara Lokesh: జపాన్‌లో జరిగిన ఏషియన్ గేమ్స్-2026లో భారతదేశానికి ప్రాతినిధ్యం వహించి ఆర్చరీ కాంపౌండ్ మహిళల టీమ్ విభాగంలో స్వర్ణ పతకం సాధించిన ప్రఖ్యాత ఆర్చర్ వెన్నం జ్యోతి సురేఖ సోమవారం ఉండవల్లి నివాసంలో విద్య, ఐటీ శాఖల మంత్రి నారా లోకేష్‌ను కలిశారు. జ్యోతి సురేఖ తండ్రి సురేంద్రకుమార్ కూడా ఈ సందర్భంగా మంత్రిని కలిశారు.

ఏషియన్ గేమ్స్‌లో అద్భుత ప్రతిభ కనబరిచి స్వర్ణ పతకం సాధించిన జ్యోతి సురేఖను మంత్రి నారా లోకేష్ అభినందించారు. అంతర్జాతీయ క్రీడా వేదికపై భారత త్రివర్ణ పతాకాన్ని రెపరెపలాడించి దేశానికి, రాష్ట్రానికి గర్వకారణంగా నిలిచారని ప్రశంసించారు. వరుస విజయాలతో భారత ఆర్చరీలో తనకంటూ ప్రత్యేక గుర్తింపు తెచ్చుకున్న సురేఖ మరిన్ని విజయాలు సాధించాలని ఆకాంక్షించారు.

ఏషియన్ గేమ్స్‌లో ఇప్పటివరకు నాలుగు స్వర్ణ పతకాలు సహా మొత్తం ఆరు పతకాలు సాధించడం ద్వారా జ్యోతి సురేఖ ప్రత్యేక ఘనత సాధించారని మంత్రి పేర్కొన్నారు. భారత క్రీడా రంగంలో ఆమె సాధించిన విజయాలు యువ క్రీడాకారులకు స్ఫూర్తిదాయకమని అన్నారు. అంతర్జాతీయ స్థాయిలో అత్యుత్తమ ప్రతిభ కనబరుస్తూ దేశం తరఫున పతకాలు సాధించడం అభినందనీయమని తెలిపారు.

2028 ఒలింపిక్స్‌లో పతకం సాధించడమే లక్ష్యంగా ఇప్పటి నుంచే కఠిన సాధన కొనసాగించాలని మంత్రి లోకేష్ సూచించారు. ఒలింపిక్స్‌లోనూ దేశానికి పతకం అందించే స్థాయిలో జ్యోతి సురేఖ సత్తా చాటుతారనే నమ్మకం ఉందన్నారు. ఆమె లక్ష్య సాధనకు అవసరమైన సహకారం అందించేందుకు అన్నివిధాలా అండగా ఉంటామని హామీ ఇచ్చారు.

తనను అభినందించి, భవిష్యత్ లక్ష్యాలకు మద్దతు ప్రకటించిన మంత్రి నారా లోకేష్‌కు జ్యోతి సురేఖ కృతజ్ఞతలు తెలిపారు. అంతర్జాతీయ పోటీల్లో మరింత మెరుగైన ప్రదర్శన ఇచ్చేందుకు కృషి చేస్తానని చెప్పారు. 2028 ఒలింపిక్స్‌లో దేశానికి పతకం సాధించడమే తన ప్రధాన లక్ష్యమని తెలిపారు.

జ్యోతి సురేఖ సాధించిన విజయాలు ఆంధ్రప్రదేశ్ క్రీడాకారుల ప్రతిభకు నిదర్శనంగా నిలుస్తున్నాయని ఈ సందర్భంగా పేర్కొన్నారు. సరైన ప్రోత్సాహం, శిక్షణ, మౌలిక సదుపాయాలు అందితే రాష్ట్రం నుంచి మరింత మంది క్రీడాకారులు జాతీయ, అంతర్జాతీయ స్థాయిలో రాణించే అవకాశం ఉందని అన్నారు. క్రీడల్లో ప్రతిభ చూపుతున్న యువతను ప్రోత్సహించేందుకు ప్రభుత్వం అన్ని విధాలా సహకరిస్తుందని మంత్రి లోకేష్ తెలిపారు..

దేశం తరఫున అంతర్జాతీయ వేదికలపై పతకాలు సాధిస్తున్న క్రీడాకారులను అభినందించడం, వారి భవిష్యత్ లక్ష్యాలకు అవసరమైన సహకారం అందించడం ద్వారా మరింత మంది యువత క్రీడల వైపు ఆకర్షితులయ్యే అవకాశం ఉందని మంత్రి పేర్కొన్నారు. జ్యోతి సురేఖ భవిష్యత్‌లో మరిన్ని విజయాలు సాధించి దేశానికి, రాష్ట్రానికి మరింత పేరు తీసుకురావాలని ఆకాంక్షించారు.