Ichoda: ఇచ్చోడలో దుర్గమ్మకు 56 రకాల వంటకాలతో 'ఛప్పన్ భోగ్' మహా నైవేద్యం

ఇచ్చోడ: ​ఇచ్చోడ మండల కేంద్రంలోని టీచర్స్ కాలనీలో దసరా శరన్నవరాత్రి ఉత్సవాలు భక్తిశ్రద్ధలతో, కన్నులపండువగా కొనసాగుతున్నాయి. శ్రీ ప్రసన్న నవదుర్గ కమిటీ ఆధ్వర్యంలో ప్రతిష్ఠించిన దుర్గామాతకు శనివారం భక్తులు 56 రకాల సంప్రదాయ పిండి వంటలతో 'ఛప్పన్ భోగ్' మహా నైవేద్యాన్ని సమర్పించారు.

అమ్మవారిపై తమకున్న అపార భక్తిప్రపత్తులకు నిదర్శనంగా మహిళా భక్తులు ఎంతో నిష్ఠతో ఈ వంటకాలను సిద్ధం చేసి సమర్పించగా, రంగురంగుల నైవేద్యాలతో అలంకరించిన మండపం భక్తులను విశేషంగా ఆకట్టుకుంది.

​ఈ సందర్భంగా అర్చకులు అమ్మవారికి ప్రత్యేక పూజలు, విశేష అర్చనలు, హారతులు నిర్వహించారు. ప్రజలందరికీ ఆయురారోగ్యాలు, సుఖసంతోషాలు చేకూరాలని, లోకకల్యాణం సిద్ధించాలని భక్తులు అమ్మవారిని మనస్ఫూర్తిగా ప్రార్థించారు. భక్తుల జయజయధ్వానాలు, అమ్మవారి నామస్మరణలతో టీచర్స్ కాలనీ అంతటా ఆధ్యాత్మిక వాతావరణం నెలకొంది. భక్తులకు ఎలాంటి అసౌకర్యం కలగకుండా నిర్వాహకులు ఏర్పాట్లు చేయగా, దర్శనానంతరం తీర్థప్రసాదాలు పంపిణీ చేశారు.