Gudihatnur: ఎంపీడీవో కార్యాలయం వద్ద వృథాగా పోతున్న తాగునీరు!
Gudihatnur: గుడిహత్నూర్ మండల కేంద్రంలోని ఎంపీడీవో కార్యాలయంలో వాటర్ ట్యాంక్ ఓవర్‌ఫ్లో అయి విలువైన తాగునీరు వృథాగా పోతున్నా అధికారులు పట్టించుకోవడం లేదు.
Gudihatnur: ఎంపీడీవో కార్యాలయం వద్ద వృథాగా పోతున్న తాగునీరు!
Gudihatnur: ఓవైపు ఎల్‌నినో ప్రభావంతో కరువు పరిస్థితులు ఏర్పడే ప్రమాదం ఉందని, నీటిని పొదుపుగా వాడుకోవాలని ప్రభుత్వం విస్తృతంగా ప్రచారం చేస్తుంటే మరోవైపు అధికారుల నిర్లక్ష్యంతో ప్రభుత్వ కార్యాలయం వద్దే విలువైన తాగునీరు వృథాగా పోతోంది. గుడిహత్నూర్ మండల కేంద్రంలోని ఎంపీడీవో కార్యాలయ ఆవరణలో ఉన్న వాటర్ ట్యాంక్ నుంచి నిత్యం నీరు ఓవర్‌ఫ్లో అవుతున్నా పట్టించుకునే నాథుడే కరువయ్యారని స్థానికులు మండిపడుతున్నారు.
రానున్న రోజుల్లో నీటి ఎద్దడి తలెత్తకుండా ముందస్తు చర్యలు చేపట్టాల్సిన బాధ్యత కలిగిన అధికార యంత్రాంగం పర్యవేక్షణా లోపానికి ఇది అద్దం పడుతోంది. ట్యాంక్ నిండి నీరంతా రోడ్లపైకి చేరుతున్నా కనీస మరమ్మతులు చేపట్టకపోవడంపై ప్రజలు తీవ్ర అసంతృప్తి వ్యక్తం చేస్తున్నారు.
ప్రభుత్వం నీటి పొదుపుపై అవగాహన కల్పిస్తున్న వేళ, ప్రభుత్వ ప్రాంగణంలోనే జరుగుతున్న ఈ నిర్లక్ష్యాన్ని తక్షణమే అరికట్టాల్సిన బాధ్యత అధికారులపై ఉందని స్థానికులు గుర్తుచేస్తున్నారు. ఇప్పటికైనా సంబంధిత అధికారులు స్పందించి, ట్యాంక్ ఓవర్‌ఫ్లో సమస్యకు శాశ్వత పరిష్కారం చూపి తాగునీటిని కాపాడాలని ప్రజలు డిమాండ్ చేస్తున్నారు.
