Kurupam: భద్రగిరి ఆస్పత్రిలో కనీస వసతులు లేవు - పుష్ప శ్రీవాణి ఆగ్రహం

కురుపాం: భద్రగిరి ప్రభుత్వ ఆస్పత్రిలో నెలకొన్న మౌలిక వసతుల సమస్యలపై మాజీ ఉప ముఖ్యమంత్రి పాముల పుష్ప శ్రీవాణి తీవ్ర ఆగ్రహం వ్యక్తం చేశారు. గిరిజన ప్రాంత ప్రజలకు మెరుగైన వైద్య సేవలు అందించాల్సిన ప్రభుత్వ ఆస్పత్రిలో కనీస సౌకర్యాలు కూడా లేకపోవడం బాధాకరమని అన్నారు.

ఆస్పత్రి ప్రారంభమై 20 రోజులు గడిచినా విద్యుత్ సౌకర్యం లేకపోవడం, జనరేటర్ అందుబాటులో లేకపోవడంతో వైద్య సిబ్బంది సెల్‌ఫోన్ టార్చ్‌ల వెలుగులో చికిత్స అందించాల్సిన పరిస్థితి ఏర్పడిందని విమర్శించారు. చిన్నారికి సెల్‌ఫోన్ వెలుగులో వైద్యం చేయడం కురుపాం నియోజకవర్గానికి అవమానకరమని పేర్కొన్నారు.

మంత్రి సంధ్యారాణి, ఎమ్మెల్యే జగదీశ్వరి గిరిజనుల సమస్యల పట్ల చిత్తశుద్ధితో వ్యవహరించడం లేదని ఆరోపించారు. శిలాఫలకాలపై పేర్లు చెక్కించుకోవడంపై చూపుతున్న ఆసక్తిని ఆస్పత్రిలో పూర్తిస్థాయి వసతులు కల్పించడంపై చూపడం లేదన్నారు. గిరిజన ప్రాంతాల అభివృద్ధి విషయంలో కూటమి ప్రభుత్వం నిర్లక్ష్య ధోరణితో వ్యవహరిస్తోందని విమర్శించారు.

ఆస్పత్రిలో పనులు పూర్తికాకముందే వ్యవసాయ శాఖ మంత్రి అచ్చెన్నాయుడు అట్టహాసంగా ప్రారంభించడం వెనుక ఉద్దేశం ఏమిటని ప్రశ్నించారు. ఆరోగ్య సేవలపై ప్రభుత్వం గొప్పలు చెప్పుకోవడం కంటే ప్రజలకు అవసరమైన సౌకర్యాలు కల్పించడంపైనే దృష్టి పెట్టాలని సూచించారు.

జగన్ ప్రభుత్వ హయాంలో జీరో వేకెన్సీ పాలసీ ద్వారా ఆస్పత్రికి అవసరమైన సిబ్బందిని నియమించామని గుర్తు చేశారు. ఆస్పత్రిలో వాస్తవ పరిస్థితులను పరిశీలించి వెంటనే సమస్యల పరిష్కారానికి చర్యలు తీసుకోవాలని జిల్లా కలెక్టర్‌ను కోరారు. ప్రజా సమస్యలను పక్కనబెట్టి రాజకీయ విమర్శలు చేయడం మాని, నియోజకవర్గ అభివృద్ధి మరియు గిరిజనుల సంక్షేమంపై ప్రజాప్రతినిధులు దృష్టి సారించాలని పుష్ప శ్రీవాణి హితవు పలికారు.