NASA Artemis 2 Mission:చందమామపై సెల్ ఫోన్ నెట్‌వర్క్..ఆర్టెమిస్-2 మిషన్‌తో మొబైల్‌ ఫోన్.. కానీ ఓ కండీషన్?

NASA Artemis 2 Mission: అమెరికా అంతరిక్ష పరిశోధనా సంస్థ (నాసా) తలపెట్టిన ఆర్టెమిస్-2 మిషన్, 2026 ఏప్రిల్ 2వ తేదీ వేకువజామున 3:54 గంటలకు ఫ్లోరిడాలోని కెన్నెడీ స్పేస్ సెంటర్ నుంచి విజయవంతంగా ప్రయోగించారు. అర్ధ శతాబ్దం తర్వాత మనుషులు చంద్రుడి కక్ష్యలోకి వెళ్తుండటం ఒక ఎత్తు అయితే, ఈసారి వారు తమ వెంట ఐఫోన్లను తీసుకెళ్లడం విశేషం. వ్యోమగాముల స్పేస్ సూట్లలో ఈ ఫోన్లను అమర్చడం కెమెరాలకు చిక్కింది. సామాన్యులు వాడే సాంకేతికతను ఇంతటి భారీ మిషన్‌లో భాగం చేయడం ఇదే తొలిసారి.

ఐఫోన్‌ను ఎంచుకోవడానికి గల కారణాలేంటి?

ప్రస్తుత కాలంలో స్మార్ట్‌ఫోన్ కెమెరాలు వృత్తిపరమైన కెమెరాలకు ధీటుగా నాణ్యమైన చిత్రాలను అందిస్తున్నాయి. అందుకే నాసా తన నిబంధనలను సడలించి, అంతరిక్షంలోకి ఫోన్లను అనుమతించింది. చంద్రుడికి సంబంధించిన అత్యంత స్పష్టమైన చిత్రాలను, వీడియోలను సామాన్య ప్రజలకు మరింత దగ్గరగా చూపేందుకు ఈ నిర్ణయం తీసుకున్నారు. వ్యోమగాములు తమ వ్యక్తిగత అనుభూతులను, చంద్రుడి అద్భుత దృశ్యాలను ఈ ఫోన్ల ద్వారా బంధించనున్నారు. అయితే వారు ఏ మోడల్ ఫోన్ వాడుతున్నారనే విషయాన్ని నాసా గోప్యంగా ఉంచింది.

నాసా విధించిన ఆ కఠినమైన షరతు ఏమిటి?

అంతరిక్ష నౌకలోని సున్నితమైన పరికరాలకు ఎటువంటి అంతరాయం కలగకుండా ఉండేందుకు నాసా ఒక ముఖ్యమైన షరతు విధించింది. వ్యోమగాములు తీసుకెళ్లే ఫోన్లు ప్రయాణమంతా ఖచ్చితంగా 'ఎయిర్‌ప్లేన్ మోడ్'లోనే ఉండాలి. అంటే అక్కడ సిగ్నల్స్ ఉండవు, నెట్‌వర్క్ పనిచేయదు. ఈ ఫోన్లను కేవలం కెమెరాగా, డేటా రికార్డింగ్ పరికరాలుగా మాత్రమే ఉపయోగించడానికి అనుమతి ఇచ్చారు. దీనివల్ల స్పేస్‌క్రాఫ్ట్ సిగ్నల్స్‌కు ఎటువంటి ప్రమాదం ఉండదు.

ఆర్టెమిస్-2 మిషన్ ప్రధాన లక్ష్యం..

ఈ మిషన్ దాదాపు 10 రోజుల పాటు సాగుతుంది. నలుగురు వ్యోమగాములు చంద్రుడి చుట్టూ ప్రదక్షిణలు చేసి సురక్షితంగా భూమికి తిరిగి వస్తారు. అయితే ఈ ప్రయోగంలో వారు చంద్రుడి ఉపరితలంపై అడుగు పెట్టరు. భవిష్యత్తులో చంద్రుడిపై మనుషులు నివసించడానికి అవసరమైన పరిస్థితులను అంచనా వేయడమే ఈ యాత్ర ముఖ్య ఉద్దేశం. ఆధునిక స్మార్ట్‌ఫోన్ సాంకేతికత అంతరిక్షంలోని కఠిన వాతావరణాన్ని ఎలా తట్టుకుంటుందో కూడా ఈ ప్రయోగం ద్వారా తెలియనుంది.