తగ్గేదేలే.! ఇంటర్నెట్ తెగ వాడేస్తున్న ఇండియన్స్.. టాప్ ఏదంటే.?

India Internet Users: భారతదేశంలో డిజిటల్ విప్లవం అత్యంత వేగంగా విస్తరిస్తోంది. స్మార్ట్‌ఫోన్ల వాడకం పెరగడం, చౌకైన డేటా ప్లాన్లు అందుబాటులోకి రావడంతో దేశవ్యాప్తంగా ఇంటర్నెట్ వినియోగం ఊహించని రీతిలో దూసుకుపోతోంది. ఈ నేపథ్యంలో, దేశీయ టెలికాం రంగ నియంత్రణ సంస్థ అయిన 'ట్రాయ్' (TRAI) తాజాగా విడుదల చేసిన నివేదిక భారత డిజిటల్ ప్రగతిని కళ్లకద్దినట్లు చూపిస్తోంది. దేశంలో మొత్తం ఇంటర్నెట్ యూజర్ల సంఖ్య సరికొత్త రికార్డు సృష్టిస్తూ ఏకంగా 1.09 బిలియన్లకు చేరిందని ట్రాయ్ అధికారికంగా వెల్లడించింది.

ట్రాయ్ నివేదిక ప్రకారం, ప్రస్తుత సంవత్సరంలో జనవరి నుంచి మార్చి త్రైమాసిక కాల వ్యవధిలో మొబైల్ వినియోగదారులు రీఛార్జ్‌ల కోసం చేస్తున్న ఖర్చు కూడా పెరిగింది. ఈ మూడు నెలల కాలంలో ప్రీపెయిడ్ వైర్‌లెస్ సేవలను వాడుతున్న ఒక్కో యూజర్ మొబైల్ రీఛార్జ్ కోసం నెలకు సగటున రూ. 196.04 ఖర్చు చేస్తున్నట్లు తేలింది. ఇక దేశంలో ఇంటర్నెట్ వ్యాప్తిని పరిశీలిస్తే.. ఓవరాల్‌గా దేశవ్యాప్తంగా ప్రతి 100 మంది జనాభాలో సగటున 76.59 శాతం మంది ఇంటర్నెట్ సదుపాయాన్ని కలిగి ఉన్నారు. అయితే, పట్టణ ప్రాంతాలతో పోలిస్తే గ్రామీణ (రూరల్) ప్రాంతాల్లో డిజిటల్ డివైడ్ ఇంకా కొనసాగుతోందని, రూరల్ ఏరియాల్లో ఇంటర్నెట్ వినియోగం కేవలం 48.31 శాతానికే పరిమితమైందని ఈ నివేదిక స్పష్టం చేస్తోంది.

ఇక దేశీయ టెలికాం మార్కెట్ షేర్ విషయానికి వస్తే, ప్రైవేట్ టెలికాం దిగ్గజాల మధ్య గట్టి పోటీ నడుస్తోంది. ఈ రేసులో ఎప్పటికప్పుడు సరికొత్త ఆఫర్లతో దూసుకుపోతున్న రిలయన్స్ జియో తన అగ్రస్థానాన్ని భద్రపరుచుకుంది. ఏకంగా 524.45 మిలియన్ల భారీ వినియోగదారుల బలంతో జియో మార్కెట్లో టాప్‌లో నిలిచింది. దీనికి గట్టి పోటీ ఇస్తూ భారతీ ఎయిర్‌టెల్ సంస్థ 492.90 మిలియన్ల యూజర్లతో దేశీయ టెలికాం రంగంలో రెండో స్థానంలో కొనసాగుతోంది. దేశంలో ఇంటర్నెట్ వాడకం ఎంత వేగంగా పుంజుకుంటోందో, టెలికాం కంపెనీల ఆదాయ వృద్ధి ఏ విధంగా సాగుతుందో చెప్పడానికి ట్రాయ్ విడుదల చేసిన ఈ తాజా గణాంకాలే నిదర్శనం.