SRH vs PBKS : పంజాబ్‌ను పాతరేసిన హైదరాబాద్.. పాయింట్ల పట్టికలో నంబర్ 1గా నిలిచిన కావ్య మారన్ టీమ్

SRH vs PBKS : ఐపీఎల్ 2026 సీజన్‌లో సన్‌రైజర్స్ హైదరాబాద్ (SRH) తమ విశ్వరూపాన్ని ప్రదర్శించింది. ఉప్పల్ స్టేడియం వేదికగా పంజాబ్ కింగ్స్‌తో జరిగిన పోరులో ఆరెంజ్ ఆర్మీ ఏకపక్ష విజయాన్ని నమోదు చేసింది. కేవలం మ్యాచ్ గెలవడమే కాకుండా, పంజాబ్‌ను అగ్రస్థానం నుంచి కిందికి నెట్టి, పాయింట్ల పట్టికలో కావ్య మారన్ సేన నంబర్ 1 పొజిషన్‌కు దూసుకెళ్లింది. బ్యాటింగ్‌లో హెన్రిచ్ క్లాసెన్, ఇషాన్ కిషన్ మెరుపులు మెరిపిస్తే.. బౌలింగ్‌లో కెప్టెన్ ప్యాట్ కమిన్స్ పంజాబ్ పతనాన్ని శాసించాడు.

టాస్ గెలిచి మొదట బ్యాటింగ్‌కు దిగిన సన్‌రైజర్స్ హైదరాబాద్ ఆరంభం నుంచే పంజాబ్ బౌలర్లపై విరుచుకుపడింది. నిర్ణీత 20 ఓవర్లలో 5 వికెట్ల నష్టానికి 235 పరుగుల భారీ స్కోరు సాధించింది. స్టార్ బ్యాటర్ హెన్రిచ్ క్లాసెన్ కేవలం 69 పరుగులతో టాప్ స్కోరర్‌గా నిలిచి పంజాబ్ బౌలర్లను ముప్పుతిప్పలు పెట్టాడు. మరోవైపు కొత్తగా టీమ్‌లోకి వచ్చిన ఇషాన్ కిషన్ 55 పరుగులతో హాఫ్ సెంచరీ బాదాడు. ఓపెనర్లు అభిషేక్ శర్మ (35), ట్రావిస్ హెడ్ (38) కూడా మెరుపు ఇన్నింగ్స్ ఆడటంతో హైదరాబాద్ భారీ లక్ష్యాన్ని నిర్దేశించగలిగింది. చివర్లో నితీష్ కుమార్ రెడ్డి (29) వేగంగా ఆడటంతో స్కోరు 230 దాటింది.

236 పరుగుల భారీ లక్ష్యంతో బరిలోకి దిగిన పంజాబ్ కింగ్స్ ఏ దశలోనూ హైదరాబాద్‌కు పోటీ ఇవ్వలేకపోయింది. మొదటి ఓవర్లోనే ప్రియాంశ్ ఆర్య (1) వికెట్ తీసి ప్యాట్ కమిన్స్ పంజాబ్‌కు గట్టి షాక్ ఇచ్చాడు. ఆ వెంటనే నితీష్ రెడ్డి వేసిన రెండో ఓవర్లో ప్రభ్‌సిమ్రన్ సింగ్ (3) పెవిలియన్ చేరాడు. కెప్టెన్ శ్రేయస్ అయ్యర్ (5) కూడా చేతులెత్తేయడంతో పంజాబ్ కష్టాల్లో పడింది. స్టోయినిస్ (28), సూర్యాంశ్ (25) కాసేపు పోరాడినా ఫలితం లేకపోయింది. కూపర్ కాన్లీ చివర్లో అద్భుతమైన సెంచరీతో పోరాడినా, అప్పటికే జరగాల్సిన నష్టం జరిగిపోయింది. నిర్ణీత ఓవర్లలో పంజాబ్ కేవలం 202 పరుగులు మాత్రమే చేయగలిగింది.

బ్యాటింగ్‌లోనే కాకుండా బౌలింగ్‌లోనూ సన్‌రైజర్స్ సత్తా చాటింది. కెప్టెన్ ప్యాట్ కమిన్స్ తన 4 ఓవర్లలో కేవలం 34 పరుగులిచ్చి 2 కీలక వికెట్లు పడగొట్టాడు. స్పిన్నర్ శివాంగ్ కుమార్ కూడా 2 వికెట్లతో ఆకట్టుకున్నాడు. నితీష్ రెడ్డి కేవలం 11 పరుగులే ఇచ్చి ఒక వికెట్ తీశాడు. ఇషాన్ మలింగ, సాకిబ్ హుస్సేన్ చెరో వికెట్ సాధించారు. హైదరాబాద్ బౌలర్ల క్రమశిక్షణతో కూడిన బౌలింగ్ ముందు పంజాబ్ బ్యాటర్లు తలవంచక తప్పలేదు. ఈ విజయంతో గత 12 ఏళ్లుగా హైదరాబాద్ గడ్డపై పంజాబ్ గెలవలేదన్న రికార్డు అలాగే కొనసాగింది.

ఈ అద్భుత విజయంతో సన్‌రైజర్స్ హైదరాబాద్ 11 మ్యాచ్‌లలో 14 పాయింట్లు సాధించి పాయింట్ల పట్టికలో అగ్రస్థానానికి చేరుకుంది. వరుసగా మూడో ఓటమిని చవిచూసిన పంజాబ్ కింగ్స్ 13 పాయింట్లతో రెండో స్థానానికి పడిపోయింది. ప్రస్తుతం ఆర్సీబీ 9 మ్యాచ్‌ల్లో 12 పాయింట్లతో మూడో స్థానంలో ఉండగా, రాజస్థాన్ రాయల్స్ 10 మ్యాచ్‌ల్లో 12 పాయింట్లతో నాలుగో స్థానంలో కొనసాగుతోంది. ఈ విజయంతో సన్‌రైజర్స్ ప్లే ఆఫ్ అవకాశాలు మరింత మెరుగయ్యాయి.