IPL Century : క్వింటన్ డికాక్ రికార్డు బద్ధలు.. ఐపీఎల్‌లో సెంచరీ కొట్టిన అతి పిన్న వయస్కుడైన విదేశీయుడిగా కాన్లీ

IPL Century : ఐపీఎల్ 2026 సీజన్ సరికొత్త రికార్డులకు వేదికవుతోంది. సన్‌రైజర్స్ హైదరాబాద్‌తో జరిగిన మ్యాచ్‌లో పంజాబ్ కింగ్స్ ఓడిపోయినప్పటికీ, ఆ జట్టు యువ కెరటం కూపర్ కాన్లీ మాత్రం తన అద్భుత బ్యాటింగ్‌తో చరిత్ర సృష్టించాడు. ఆస్ట్రేలియాకు చెందిన ఈ 22 ఏళ్ల కుర్రాడు కళ్లు చెదిరే సెంచరీతో ఐపీఎల్ చరిత్రలోనే అత్యంత పిన్న వయస్కుడైన విదేశీ సెంచరీ వీరుడిగా రికార్డులకెక్కాడు. సన్‌రైజర్స్ హైదరాబాద్ నిర్దేశించిన 236 పరుగుల భారీ లక్ష్య ఛేదనలో పంజాబ్ కింగ్స్ తడబడినప్పటికీ, కూపర్ కాన్లీ మాత్రం ఒంటరి పోరాటం చేశాడు. కేవలం 59 బంతుల్లోనే 7 ఫోర్లు, 8 సిక్సర్ల సాయంతో 107 పరుగులు చేసి అజేయంగా నిలిచాడు. 181.35 స్ట్రైక్ రేట్‌తో సాగిన ఇతని ఇన్నింగ్స్ టీ20 కెరీర్‌లోనే మొదటి సెంచరీ కావడం విశేషం. పంజాబ్ జట్టు 33 పరుగుల తేడాతో ఓటమి పాలైనప్పటికీ, కాన్లీ ఆడిన తీరు క్రికెట్ విశ్లేషకులను సైతం ఆశ్చర్యపరిచింది.

ఈ సెంచరీతో కూపర్ కాన్లీ ఒక అరుదైన ఘనతను తన ఖాతాలో వేసుకున్నాడు. కేవలం 22 ఏళ్ల 257 రోజుల వయసులో సెంచరీ బాదడం ద్వారా, ఐపీఎల్ చరిత్రలో సెంచరీ చేసిన అతి పిన్న వయస్కుడైన విదేశీ ఆటగాడిగా నిలిచాడు. ఇంతకుముందు ఈ రికార్డు దక్షిణాఫ్రికా ఆటగాడు క్వింటన్ డికాక్ (23 ఏళ్ల 122 రోజులు) పేరు మీద ఉండేది. ఇప్పుడు కాన్లీ ఆ రికార్డును అధిగమించడమే కాకుండా డేవిడ్ వార్నర్, డేవిడ్ మిల్లర్ వంటి దిగ్గజాలను కూడా వెనక్కి నెట్టేశాడు.

ఈ సీజన్‌లో పంజాబ్ కింగ్స్ తరఫున కూపర్ కాన్లీ అత్యంత నిలకడైన ఆటగాడిగా కనిపిస్తున్నాడు. ఇప్పటివరకు ఆడిన 10 మ్యాచ్‌ల్లో 53.86 సగటుతో 377 పరుగులు సాధించాడు. ఇందులో ఒక సెంచరీతో పాటు రెండు హాఫ్ సెంచరీలు ఉన్నాయి. కేవలం పరుగులు చేయడమే కాకుండా, 171.36 స్ట్రైక్ రేట్‌తో మెరుపు వేగంతో పరుగులు రాబట్టడం ఇతని ప్రత్యేకత. గతంలో లక్నోతో జరిగిన మ్యాచ్‌లో కూడా 87 పరుగులతో మెరిసిన ఈ యువ ఆటగాడు, భవిష్యత్తులో ఆస్ట్రేలియా జట్టుకు పెద్ద ఆస్తిగా మారతాడని క్రికెట్ వర్గాలు భావిస్తున్నాయి.

విదేశీ కుర్రాళ్ల సెంచరీల జాబితా (వయసు రీత్యా):

ఐపీఎల్ చరిత్రలో అతి తక్కువ వయసులో సెంచరీ చేసిన విదేశీ ఆటగాళ్ల జాబితా ఇప్పుడు ఇలా ఉంది:

* కూపర్ కాన్లీ: 22 ఏళ్ల 257 రోజులు (2026)

* క్వింటన్ డికాక్: 23 ఏళ్ల 122 రోజులు (2016)

* డేవిడ్ వార్నర్: 23 ఏళ్ల 153 రోజులు (2010)

* డేవిడ్ మిల్లర్: 23 ఏళ్ల 330 రోజులు (2013)

* కామెరాన్ గ్రీన్: 23 ఏళ్ల 352 రోజులు (2023)