మైదానంలో ఇదేం ఆటిట్యూడ్ రా భయ్.. దిమ్మతిరిగే షాకిచ్చిన బీసీసీఐ..!

IPL 2026 Hardik Pandya Fined BCCI: ముంబై ఇండియన్స్ కెప్టెన్ హార్దిక్ పాండ్యాకు ఐపీఎల్ గవర్నింగ్ కౌన్సిల్ గట్టి షాక్ ఇచ్చింది. కోల్‌కతా నైట్ రైడర్స్‌తో జరిగిన మ్యాచ్‌లో నిరాశతో వికెట్లపై తన ప్రతాపం చూపిన పాండ్యాపై క్రమశిక్షణా చర్యలు తీసుకుంది. ఐపీఎల్ నియమావళిని ఉల్లంఘించినందుకుగాను అతనికి భారీ జరిమానా విధిస్తూ బీసీసీఐ నిర్ణయం తీసుకుంది.

ఐపీఎల్ 2026: హార్దిక్‌కు కలిసిరాని కాలం..

ఐపీఎల్ 2026 సీజన్ ముంబై ఇండియన్స్‌తో పాటు ఆ జట్టు కెప్టెన్ హార్దిక్ పాండ్యాకు అస్సలు కలిసి రావడం లేదు. మైదానంలో వరుస ఓటములు, వ్యక్తిగత ఫామ్ లేమి, గాయాలతో సతమతమవుతున్న హార్దిక్.. తాజాగా వివాదాల్లో చిక్కుకున్నాడు. ఈ సీజన్‌లో ఇప్పటికే ప్లేఆఫ్స్ రేసు నుంచి నిష్క్రమించిన తొలి జట్టుగా ముంబై నిలిచిన సంగతి తెలిసిందే. జట్టు వైఫల్యాలకు హార్దిక్ కెప్టెన్సీనే ప్రధాన కారణమంటూ అభిమానులు, విశ్లేషకులు తీవ్రస్థాయిలో విమర్శిస్తున్నారు. ఇలాంటి క్లిష్ట సమయంలో బీసీసీఐ తీసుకున్న క్రమశిక్షణా చర్య పాండ్యాను మరింత ఇరకాటంలోకి నెట్టింది.

కోపంతో ఊగిపోయిన ముంబై కెప్టెన్..

వెన్నునొప్పి కారణంగా గత మూడు మ్యాచ్‌లకు దూరమైన హార్దిక్ పాండ్యా, బుధవారం ఈడెన్ గార్డెన్స్ వేదికగా కోల్‌కతా నైట్ రైడర్స్‌తో జరిగిన మ్యాచ్‌లో తిరిగి జట్టులోకి వచ్చాడు. అయితే, అతని పునరాగమనం ఏమాత్రం ఆశాజనకంగా సాగలేదు. వర్షం కారణంగా కుదించిన ఈ మ్యాచ్‌లో ముంబై ఇండియన్స్ మరో ఓటమిని మూటగట్టుకుంది. ఈ మ్యాచ్‌లోనే హార్దిక్ తన సహనాన్ని కోల్పోయాడు.

కోల్‌కతా ఇన్నింగ్స్ 10వ ఓవర్ వేసిన హార్దిక్, ఆ ఓవర్ ముగిసిన తర్వాత తీవ్ర అసహనానికి గురయ్యాడు. తీవ్ర నిరాశ, కోపంతో మైదానంలో ఉన్న వికెట్లపై ఉన్న బెయిల్స్‌ను గట్టిగా కిందకు నెట్టేశాడు. కెప్టెన్ హోదాలో ఉండి మైదానంలో ఇలాంటి ప్రవర్తన ప్రదర్శించడంపై మ్యాచ్ అంపైర్లు, రిఫరీ తీవ్ర అభ్యంతరం వ్యక్తం చేశారు.

మ్యాచ్ ఫీజులో కోత.. బీసీసీఐ అధికారిక ప్రకటన..

మైదానంలో క్రీడా స్ఫూర్తికి విరుద్ధంగా ప్రవర్తించినందుకుగాను హార్దిక్ పాండ్యా మ్యాచ్ ఫీజులో 10 శాతం జరిమానా విధిస్తున్నట్లు ఐపీఎల్ యాజమాన్యం అధికారిక ప్రకటన విడుదల చేసింది. ఐపీఎల్ ప్రవర్తనా నియమావళిలోని 'లెవెల్ 1' నిబంధనల ప్రకారం ఆర్టికల్ 2.2ను హార్దిక్ ఉల్లంఘించినట్లు నిర్ధారించారు.

"మ్యాచ్ జరుగుతున్న సమయంలో క్రికెట్ కిట్, దుస్తులు, మైదానంలోని వస్తువులు లేదా వికెట్లను దురుసుగా పాడుచేయడం లేదా పడదోయడం ఆర్టికల్ 2.2 కింద నేరంగా పరిగణించబడుతుంది. ఈ నిబంధనను ఉల్లంఘించినందుకు ముంబై ఇండియన్స్ కెప్టెన్ హార్దిక్ పాండ్యాకు 10 శాతం మ్యాచ్ ఫీజు జరిమానాతో పాటు ఒక డీమెరిట్ పాయింట్‌ను విధిస్తున్నాము," అని ఐపీఎల్ తన ప్రకటనలో పేర్కొంది. మ్యాచ్ రిఫరీ రాజీవ్ సేథ్ విధించిన ఈ శిక్షను హార్దిక్ పాండ్యా కూడా అంగీకరించాడు.

ఆటలోనూ నిరాశే మిగిలింది..

ఈ మ్యాచ్‌లో ముంబై ఇండియన్స్ జట్టు చెత్త ఆరంభాన్ని పొందింది. ఒక దశలో 41 పరుగులకే 4 వికెట్లు కోల్పోయి తీవ్ర కష్టాల్లో పడింది. ఆ సమయంలో హార్దిక్ పాండ్యా (26 పరుగులు), కార్బిన్ బాష్ కలిసి జట్టును ఆదుకునే ప్రయత్నం చేసి గౌరవప్రదమైన స్కోరు అందించారు. అయితే బౌలింగ్‌లో మాత్రం హార్దిక్ ఆకట్టుకోలేకపోయాడు. రెండు ఓవర్లు వేసి 13 పరుగులు ఇచ్చినప్పటికీ, కీలకమైన వికెట్లు పడగొట్టడంలో విఫలమయ్యాడు. ఫలితంగా ముంబై ఈ సీజన్‌లో 9వ ఓటమిని చవిచూడాల్సి వచ్చింది.

ఒకవైపు కెప్టెన్‌గా విఫలమవుతూ, మరోవైపు మైదానంలో సహనం కోల్పోతూ హార్దిక్ పాండ్యా తన గ్రాఫ్‌ను తానే తగ్గించుకుంటున్నాడు. ఈ సీజన్ ముంబై ఇండియన్స్‌కు ఒక పీడకలలా మారగా, హార్దిక్ పాండ్యా ప్రవర్తన జట్టు ప్రతిష్టను మరింత మసకబార్చేలా ఉందనడంలో ఎలాంటి సందేహం లేదు. రాబోయే మ్యాచ్‌ల్లోనైనా హార్దిక్ తన ఆటను, ప్రవర్తనను మెరుగుపరుచుకుంటాడో లేదో చూడాలి.