Viral: పుట్టబోయే పాప కోసం అల్ట్రాసౌండ్ స్కాన్.. కనిపించింది చూడగా తండ్రి షాక్.!

Viral: కెనడాలో ఒక సాధారణ ప్రినేటల్ అల్ట్రాసౌండ్ స్కానింగ్ సమయంలో ఊహించని అద్భుతం చోటుచేసుకుంది. తన తండ్రి మాటలు విని కడుపులోని చిన్నారి అల్ట్రాసౌండ్ మానిటర్‌పై చిరునవ్వులు చిందించిన ఈ వైరల్ వీడియో పూర్తి వివరాలు ఇక్కడ చూడండి.

సోషల్ మీడియాలో ఎప్పుడూ రకరకాల వీడియోలు వైరల్ అవుతుంటాయి. కానీ కొన్ని మాత్రం మనసును హత్తుకునేలా ఉంటాయి. తాజాగా కెనడా దేశంలో చోటుచేసుకున్న ఒక ఘటన నెటిజన్లను ఎంతగానో ఆకట్టుకుంటోంది. లియా ఒలివెరా అనే మహిళ తన భాగస్వామితో కలిసి ఒక సాధారణ ప్రినేటల్ అల్ట్రాసౌండ్ చెకప్ కోసం ఆసుపత్రికి వెళ్లారు. స్కానింగ్ జరుగుతున్న సమయంలో ఆ మహిళ భాగస్వామి ఎంతో ప్రేమగా ఆమె కడుపుపై ముద్దుపెట్టుకుని తమ కాబోయే పాపతో మాట్లాడడం ప్రారంభించారు. "గుడ్ మార్నింగ్.. హ్యాపీ శనివారం, నీకు ఆకలిగా ఉందా?" అంటూ ఎంతో ఆప్యాయంగా పలకరించారు.

ఆ తండ్రి గొంతు విన్న వెంటనే అల్ట్రాసౌండ్ స్క్రీన్ పై కనిపించిన చిన్నారి ముఖంలో అద్భుతమైన మార్పు వచ్చింది. మానిటర్‌లో చూస్తున్నప్పుడు ఆ పాప ముఖంపై స్పష్టమైన చిరునవ్వు కనిపించింది. ఈ అనూహ్య పరిణామాన్ని చూసి అక్కడే ఉన్న వైద్య సిబ్బందితో పాటు కుటుంబ సభ్యులు ఒక్కసారిగా ఆశ్చర్యపోయారు. ఈ అందమైన క్షణాన్ని అక్కడే ఉన్న కుటుంబ సభ్యులు తమ కెమెరాలలో బంధించారు. తండ్రి మాటలకు కడుపులో ఉన్న పాప స్పందించి నవ్వినట్లుగా ఉన్న ఈ దృశ్యం ప్రస్తుతం సోషల్ మీడియాలో విపరీతంగా వైరల్ అవుతోంది.

ఈ అద్భుతమైన అనుభూతి గురించి తల్లి లియా ఒలివెరా మాట్లాడుతూ, తన జీవితంలో ఇది ఎప్పటికీ మరువలేని కోర్ మెమరీ అని భావోద్వేగానికి గురయ్యారు. పుట్టబోయే బిడ్డతో తల్లిదండ్రులకు ఉండే బంధం ఎంత బలమైనదో ఈ ఘటన మరోసారి నిరూపించిందని నెటిజన్లు కామెంట్లు పెడుతున్నారు. శాస్త్రీయంగా ఇది యాదృచ్ఛికం కావచ్చని నిపుణులు చెబుతున్నప్పటికీ, ఈ దృశ్యం మాత్రం కోట్లాది మంది హృదయాలను గెలుచుకుని అందరి ముఖాల్లో చిరునవ్వులు పూయిస్తోంది.