OTT Releases : ఈ వారం ఓటీటీలో రచ్చ.. మస్ట్ వాచ్ లిస్ట్ ఇదే.!

OTT Releases : ఈ వారం ఓటీటీ ప్రపంచం సరికొత్త సినిమాలతో, అదిరిపోయే వెబ్ సిరీస్‌లతో సందడి చేయబోతోంది. యాక్షన్ థ్రిల్లర్ల నుంచి ఎమోషనల్ డ్రామాల వరకు అన్ని రకాల జోనర్లు ఈ లిస్టులో ఉన్నాయి. నెట్‌ఫ్లిక్స్, జియోహాట్‌స్టార్, యాపిల్ టీవీ వంటి ప్లాట్‌ఫామ్స్ ఈ మే నెల మధ్యలో ఆడియన్స్‌ను అలరించేందుకు సిద్ధమయ్యాయి. ముఖ్యంగా భారీ తారాగణంతో వస్తున్న 'ధురంధర్ 2' వంటి చిత్రాలు సినీ ప్రియులలో అంచనాలను పెంచేస్తున్నాయి. ఈ వారం డిజిటల్ స్క్రీన్‌పై రచ్చ చేయబోతున్న ఆ విశేషాలేంటో వివరంగా తెలుసుకుందాం.

ధురంధర్ (ది రివెంజ్)

ఈ వారం ఓటీటీలో రాబోతున్న మోస్ట్ అవైటెడ్ మూవీ 'ధురంధర్'. రణవీర్ సింగ్, సంజయ్ దత్, అర్జున్ రాంపాల్ వంటి భారీ తారాగణం నటించిన ఈ సినిమా మే 15న నెట్‌ఫ్లిక్స్ , జియోహాట్‌స్టార్‌లో స్ట్రీమింగ్ కానుంది. ఇండియన్ ఇంటెలిజెన్స్ ఆఫీసర్ జస్క్రీత్ సింగ్ రంగీ, హంజా అలీ మజారీ అనే పేరుతో పాకిస్థాన్‌లోని కరాచీలో అండర్ కవర్ ఆపరేషన్ చేయడం చుట్టూ ఈ కథ తిరుగుతుంది. 26/11 దాడులకు కారణమైన టెర్రర్ ఫండింగ్ నెట్‌వర్క్ ని ధ్వంసం చేసే మిషన్ లో హీరో ఎదుర్కొనే సవాళ్లు, అండర్ వరల్డ్ లో చోటుచేసుకునే ట్విస్టులు ప్రేక్షకులకు వెన్నులో వణుకు పుట్టించేలా ఉంటాయని తెలుస్తోంది.

కర్తవ్య, ఇన్‌స్పెక్టర్ అవినాష్

బహుముఖ ప్రజ్ఞాశాలి సైఫ్ అలీ ఖాన్ నటించిన 'కర్తవ్య' మే 15న నెట్‌ఫ్లిక్స్ లో రిలీజ్ కాబోతోంది. విధి నిర్వహణకు, కుటుంబ బంధాలకు మధ్య నలిగిపోయే ఒక వ్యక్తి కథగా ఇది తెరకెక్కింది. గ్రామీణ నేపథ్యంలో సాగే ఈ సినిమాలో సైఫ్ అలీ ఖాన్ పెర్ఫార్మెన్స్ హైలైట్ గా నిలవనుంది. మరోవైపు, యూపీ పోలీస్ బ్యాక్‌డ్రాప్‌లో సాగే 'ఇన్‌స్పెక్టర్ అవినాష్' సీజన్ 2 కూడా అదే రోజున జియోహాట్‌స్టార్‌లో రాబోతోంది. రణదీప్ హుడా లీడ్ రోల్ లో కనిపిస్తున్న ఈ సిరీస్ లో, అవినాష్ తన కొడుకుపై పడిన మర్డర్ కేసును ఎలా ఎదుర్కొన్నాడు, తన విచ్ఛిన్నమవుతున్న వైవాహిక జీవితాన్ని ఎలా కాపాడుకున్నాడు అనే అంశాలను ఎంతో ఎమోషనల్ గా చూపించనున్నారు.

హాలీవుడ్ సెన్సేషన్.. ప్రాజెక్ట్ హెయిల్ మేరీ

సైన్స్ ఫిక్షన్ సినిమాలను ఇష్టపడే వారికి 'ప్రాజెక్ట్ హెయిల్ మేరీ' ఒక కనువిందు అని చెప్పవచ్చు. ర్యాన్ గోస్లింగ్ నటించిన ఈ సినిమా యాపిల్ టీవీ , ప్రైమ్ వీడియోలో అందుబాటులోకి వచ్చింది. అంతరిక్ష నౌకలో స్పృహలోకి వచ్చిన ఒక సైన్స్ టీచర్, అసలు తను అక్కడికి ఎలా వచ్చాడో మర్చిపోతాడు. కానీ, భూమిని ఒక భారీ విపత్తు నుండి కాపాడగలిగే ఏకైక వ్యక్తి తనే అని తెలుసుకున్నాక ఏం జరిగింది అనేదే ఈ సినిమా కథ. హాలీవుడ్ రేంజ్ విజువల్స్ , థ్రిల్లింగ్ ఎలిమెంట్స్ తో ఈ చిత్రం ఆకట్టుకుంటుంది.

డాక్యుమెంటరీలు, రియాలిటీ షోలు

క్రీడా ప్రేమికుల కోసం ఫుట్‌బాల్ స్టార్ జేమీ వర్డీ జీవిత కథ ఆధారంగా రూపొందిన 'అన్‌టోల్డ్ యూకే' నెట్‌ఫ్లిక్స్ లో అందుబాటులో ఉంది. అలాగే కామెడీ దిగ్గజం మార్టిన్ షార్ట్ కెరీర్ విశేషాలతో కూడిన డాక్యుమెంటరీ కూడా స్ట్రీమింగ్ అవుతోంది. యువతను ఆకట్టుకునే 'పర్ఫెక్ట్ మ్యాచ్' సీజన్ 4 రియాలిటీ షో మే 13 నుండి ప్రేక్షకులను అలరిస్తోంది. ఇవే కాకుండా అనిమే ప్రియుల కోసం 'డెవిల్ మే క్రై' సీజన్ 2, యాక్షన్ ఇష్టపడే వారి కోసం 'నెమెసిస్' , ఎమోషనల్ కనెక్షన్స్ కోరుకునే వారి కోసం 'సోల్ మేట్' వంటి వెరైటీ చిత్రాలు ఈ వారం డిజిటల్ ప్రేక్షకులకు పండగ భోజనంలా మారనున్నాయి.