TMC: దీదీకి షాక్‌ల మీద షాక్‌లు.. రాజ్యసభకు టీఎంసీ ఎంపీ ప్రకాశ్ చిక్ బరైక్ రాజీనామా!

TMC: పశ్చిమ బెంగాల్ తృణమూల్ కాంగ్రెస్ (TMC) లో గతంలో ఎన్నడూ లేనంతటి అత్యంత తీవ్రమైన రాజకీయ సంక్షోభం నెలకొంది. పార్టీ అధినేత్రి మమతా బెనర్జీకి సొంత పార్టీ నేతలే ఊహించని షాక్‌లు ఇస్తున్నారు. సీనియర్ నాయకులు ఒక్కొక్కరుగా పార్టీని వీడుతుండటంతో రాజీనామాల పరంపర కొనసాగుతోంది.

టీఎంసీ పార్లమెంటరీ పార్టీలో వరుస వికెట్లు పడుతున్నాయి. మూడు రోజుల క్రితం మమతా బెనర్జీకి అత్యంత నమ్మిన బంటుగా ఉన్న సీనియర్‌ నేత సుఖేందు శేఖర్‌ రాయ్‌ తన రాజ్యసభ సభ్యత్వానికి రాజీనామా చేసి సంక్షోభానికి తెరలేపారు. నిన్న మరో మహిళా ఎంపీ సుష్మితా దేవ్‌ తన రాజ్యసభ పదవికి రాజీనామా చేశారు. ఆమె త్వరలోనే బీజేపీ (BJP) గూటికి చేరతారనే ప్రచారం జోరుగా సాగుతోంది. తాజాగా ఇవాళ (గురువారం) మరో ఎంపీ ప్రకాశ్ చిక్ బరైక్ కూడా తన రాజ్యసభ సభ్యత్వానికి రాజీనామా సమర్పించారు.

ఈ వరుస రాజీనామాలతో రాజ్యసభలో టీఎంసీ ఎంపీల బలం ఒక్కసారిగా 10కి పడిపోయింది. అయితే ఇది కేవలం ఆరంభం మాత్రమేనని, వచ్చే వారంలో మరికొంత మంది ఎంపీలు కూడా క్విట్ అయ్యే ఛాన్స్ ఉందని రాజకీయ విశ్లేషకులు అంచనా వేస్తున్నారు.

మమతా బెనర్జీ ఒంటెద్దు పోకడలపై తిరుగుబాటు జెండా ఎగరేసిన టీఎంసీకి చెందిన 19 మంది ఎంపీలు అంతా కలిసి ఒక 'రెబెల్స్ బృందం' (Rebel Group) గా ఏర్పడి వేరుకుంపటి పెట్టుకున్నారు. ఈ తిరుగుబాటు బృందానికి టీఎంసీ సీనియర్‌ ఎంపీ కాకోలీ ఘోష్‌ నేతృత్వం వహిస్తుండటం గమనార్హం.

అంతేకాకుండా, ఇప్పటివరకు దీదీకి అత్యంత విధేయులుగా ముద్రపడిన సినీ నటుడు శత్రుఘ్న సిన్హా, మాజీ క్రికెటర్ యూసుఫ్‌ పఠాన్‌, సయాని ఘోష్‌ లాంటి కీలక నేతలు కూడా ఈ రెబెల్స్ గ్రూప్‌తో చేతులు కలపడం పార్టీని కోలుకోలేని దెబ్బతీసింది. వీరితో పాటు దాదాపు 64 మంది ఎమ్మెల్యేలు కూడా రెబెల్స్‌గా మారడంతో మమతా బెనర్జీ ప్రభుత్వం తీవ్రమైన దిక్కుతోచని స్థితిలో పడిపోయింది.

తృణమూల్ కాంగ్రెస్ పతనావస్థకు చేరుకున్న తరుణంలో జాతీయ రాజకీయాల్లో ఒక సంచలన పరిణామం తెరపైకి వచ్చింది. ఈ తీవ్ర సంక్షోభాన్ని అనుకూలంగా మార్చుకునే క్రమంలో.. టీఎంసీ పార్టీని జాతీయ కాంగ్రెస్‌ (INC) పార్టీలో విలీనం చేయాలని కాంగ్రెస్‌ అగ్రనాయకురాలు సోనియా గాంధీ ప్రతిపాదించినట్టు తెలుస్తోంది. కాంగ్రెస్‌లో విలీనం చేయడం ద్వారానే బెంగాల్‌లో బీజేపీని అడ్డుకోగలమని ఆమె సూచించినట్లు సమాచారం. అయితే, ఈ మెగా విలీన ప్రతిపాదనపై ఆలోచించి నిర్ణయం తీసుకునేందుకు కొంత సమయం కావాలని మమతా బెనర్జీ కోరినట్టు రాజకీయ వర్గాల్లో గట్టి టాక్ నడుస్తోంది. మొత్తానికి బెంగాల్ పాలిటిక్స్ ఇప్పుడు దేశవ్యాప్తంగా హాట్ టాపిక్‌గా మారాయి.