AG Perarivalan: రాజీవ్ హత్యకేసు దోషి ఇక లాయర్.. 31 ఏళ్ల జైలు జీవితం తర్వాత పేరరివాళన్ సరికొత్త ప్రస్థానం!

AG Perarivalan: రాజీవ్ గాంధీ హత్య కేసులో 31 ఏళ్ల సుదీర్ఘ జైలు జీవితం గడిపి విడుదలైన ఎ.జి. పేరరివాళన్ తన జీవితంలో మరో కొత్త అధ్యాయాన్ని ప్రారంభించారు. తాజాగా ఆయన అడ్వకేట్‌గా మారి, తమిళనాడు-పుదుచ్చేరి బార్ అసోసియేషన్‌లో న్యాయవాదిగా తన పేరును నమోదు చేసుకున్నారు. త్వరలోనే ఆయన మద్రాస్ హైకోర్టులో ప్రాక్టీస్ మొదలుపెట్టనున్నారు.

31 ఏళ్లపాటు జైలు గోడల మధ్య ఉన్న పేరరివాళన్, 2022లో సుప్రీంకోర్టు ఆదేశాల మేరకు స్వేచ్ఛ పొందిన విషయం తెలిసిందే. జైలులో ఉన్నప్పుడే తన చదువుపై దృష్టి సారించిన ఆయన, బెంగళూరులోని డాక్టర్ బి.ఆర్. అంబేద్కర్ లా కాలేజీలో న్యాయ విద్య (Law) పూర్తి చేశారు. అనంతరం 2025లో నిర్వహించిన ఆల్ ఇండియా బార్ ఎగ్జామినేషన్‌లో ఉత్తీర్ణత సాధించి, లాయర్‌గా తన ప్రయాణాన్ని మొదలుపెట్టారు.

ఈ సందర్భంగా పేరరివాళన్ మీడియాతో మాట్లాడుతూ కీలక వ్యాఖ్యలు చేశారు. "సరైన న్యాయ సహాయం అందక జైళ్లలో మగ్గిపోతున్న వేలాది మంది ఖైదీల గొంతుకగా మారడమే నా లక్ష్యం. ముఖ్యంగా న్యాయం అందని నిరుపేద జీవిత ఖైదీల కోసం పనిచేయాలనుకుంటున్నాను" అని ఆయన వెల్లడించారు. తన స్వంత అనుభవాలే తనను ఈ దిశగా ప్రేరేపించాయని ఆయన పేర్కొన్నారు.

1991లో శ్రీ పెరంబుదూరులో జరిగిన ఆత్మాహుతి దాడికి అవసరమైన బ్యాటరీలను కొనుగోలు చేసి ఇచ్చారనే ఆరోపణలతో 19 ఏళ్ల వయసులో పేరరివాళన్ అరెస్టయ్యారు. 1998లో మరణశిక్ష పడగా, 2014లో అది జీవిత ఖైదుగా మారింది. చివరకు సుప్రీంకోర్టు అసాధారణ అధికారాలను (Article 142) ఉపయోగించి 2022లో ఆయనను విడుదల చేసింది.