Kitchen safety tips: గ్యాస్ స్టవ్ పక్కన ఈ 5 వస్తువులు అస్సలు పెట్టొద్దు

వంటగదిలో చిన్న నిర్లక్ష్యం కూడా ఒక్కోసారి పెద్ద ప్రమాదానికి దారితీయొచ్చు. ముఖ్యంగా గ్యాస్ స్టవ్ చుట్టూ మండే వస్తువులు, వేడికి త్వరగా ప్రభావితమయ్యే పదార్థాలను ఉంచడం వల్ల అగ్నిప్రమాదాల ముప్పు పెరుగుతుంది. వంట చేస్తున్నప్పుడు వచ్చే మంట, అధిక వేడి, నూనె చిమ్మడం వంటి కారణాలతో కొన్ని వస్తువులు సులభంగా మంటలు అంటుకునే పరిస్థితి ఏర్పడొచ్చు. అందుకే గ్యాస్ స్టవ్ చుట్టుపక్కల ఏ వస్తువులు ఉంచకూడదో తెలుసుకోవడం చాలా ముఖ్యం.

ప్లాస్టిక్ డబ్బాలు, ఇతర వస్తువులు

టీ పొడి, చక్కెర, కారం వంటి వంటింటి సరుకులను ప్లాస్టిక్ డబ్బాల్లో నిల్వ చేసి స్టవ్ పక్కనే ఉంచడం చాలామందికి అలవాటు. అయితే స్టవ్ నుంచి వెలువడే వేడి కారణంగా ప్లాస్టిక్ కంటైనర్లు, బాటిళ్లు, చెంచాలు వంటి వస్తువులు కరిగిపోయే అవకాశం ఉంటుంది. అధిక ఉష్ణోగ్రతలకు గురైన కొన్ని ప్లాస్టిక్ వస్తువుల నుంచి హానికరమైన పొగ వెలువడే ప్రమాదం కూడా ఉంది. అందువల్ల వీటిని స్టవ్‌కు దూరంగా ఉన్న అల్మారాల్లో భద్రపరచడం మంచిది.

వంట నూనె, నెయ్యి, ఆయిల్ స్ప్రేలు

వంట సమయంలో సులభంగా తీసుకునేందుకు నూనె సీసాలు, నెయ్యి డబ్బాలు, వంటనూనె స్ప్రేలను స్టవ్ పక్కనే ఉంచుతుంటారు. అయితే అధిక వేడి కారణంగా నూనె వేడెక్కి మంటలు చెలరేగే ప్రమాదం ఉంటుంది. ముఖ్యంగా ఏరోసోల్ స్ప్రే క్యాన్లను వేడి దగ్గర ఉంచడం మరింత ప్రమాదకరం. అందుకే నూనె, నెయ్యి, స్ప్రేలను మంటకు దూరంగా, చల్లటి ప్రదేశంలో ఉంచాలి.

పేపర్లు, టిష్యూలు, కిచెన్ టవల్స్

చేతులు తుడుచుకోవడానికి ఉపయోగించే టిష్యూ పేపర్లు, కిచెన్ టవల్స్, క్లాత్‌లు, న్యూస్ పేపర్లు వంటి వాటికి చాలా త్వరగా మంట అంటుకుంటుంది. వంట చేస్తున్న సమయంలో గాలి వీచడం లేదా అనుకోకుండా చేయి తగలడం వల్ల ఇవి మంటకు దగ్గరగా వెళ్లే అవకాశం ఉంది. కాబట్టి ఇలాంటి వస్తువులను గ్యాస్ స్టవ్ పక్కన ఉంచకుండా, ఉపయోగించిన వెంటనే నిర్ణీత ప్రదేశంలో పెట్టడం మంచిది.

మసాలా డబ్బాలు, ఎలక్ట్రానిక్ పరికరాలు

మసాలా డబ్బాలను స్టవ్ పక్కనే ఉంచడం వల్ల సౌకర్యంగా అనిపించినా.. స్టవ్ నుంచి వచ్చే వేడి కారణంగా మసాలాల నాణ్యత దెబ్బతినే అవకాశం ఉంది. అలాగే ఎలక్ట్రిక్ కెటిల్, మిక్సీ, మొబైల్ ఛార్జర్, వైర్లు వంటి ఎలక్ట్రానిక్ పరికరాలను కూడా గ్యాస్ స్టవ్‌కు దగ్గరగా ఉంచకూడదు. వేడి, నూనె చిమ్మడం వల్ల పరికరాలు దెబ్బతినడంతో పాటు విద్యుత్ సంబంధిత ప్రమాదాలు జరిగే అవకాశం ఉంటుంది.

వంటగదిలో ఈ జాగ్రత్తలు తప్పనిసరి

వంట చేస్తున్నప్పుడు గ్యాస్ స్టవ్‌ను ఎప్పుడూ పర్యవేక్షణ లేకుండా వదిలిపెట్టకూడదు. గ్యాస్ లీక్ అవుతున్నట్లు వాసన వస్తే వెంటనే రెగ్యులేటర్‌ను ఆఫ్ చేసి, విద్యుత్ స్విచ్‌లను ఆన్ లేదా ఆఫ్ చేయకుండా కిటికీలు, తలుపులు తెరిచి గాలి ప్రసరణకు అవకాశం కల్పించాలి. పిల్లలను గ్యాస్ స్టవ్‌కు దూరంగా ఉంచాలి.

వంటగదిలో చిన్న అగ్నిమాపక పరికరాన్ని అందుబాటులో ఉంచుకోవడం కూడా ఉపయోగకరం. గ్యాస్ పైపు, రెగ్యులేటర్ వంటి పరికరాలను ఎప్పటికప్పుడు పరిశీలించి, అవసరమైతే మార్చాలి. ముఖ్యంగా మండే పదార్థాలను స్టవ్‌కు దూరంగా ఉంచడం ద్వారా అనుకోని ప్రమాదాల ముప్పును తగ్గించవచ్చు.

ముఖ్య గమనిక: ఈ కథనంలోని సమాచారం సాధారణ అవగాహన కోసం మాత్రమే. అగ్నిప్రమాదాలు, గ్యాస్ లీకేజీ వంటి అత్యవసర పరిస్థితుల్లో సంబంధిత నిపుణులు లేదా అధికారుల సూచనలను పాటించాలి.