Iran Nuclear Bomb : ఇరాన్ చేతికి అణు బాంబు? ముజ్తబా నిర్ణయంతో అమెరికా, ఇజ్రాయెల్‌లలో వణుకు

Iran Nuclear Bomb : మధ్యప్రాచ్యంలో మరో తీవ్ర ఉద్రిక్తత నెలకొంది. ఇరాన్ అధికారికంగా అణు బాంబును తయారుచేసే దిశగా వేగంగా అడుగులు వేస్తోందంటూ అమెరికా నిఘా సంస్థలు సంచలన నివేదికను విడుదల చేశాయి. ఈ వార్తతో వాషింగ్టన్ సహా ఇజ్రాయెల్ తీవ్ర భయాందోళనలకు గురవుతున్నాయి. ఇరాన్ కొత్త తీవ్రవాద నాయకత్వం తమ పాత విధానాలను పక్కనపెట్టి, ఎలాంటి పరిస్థితిలోనైనా సరే అణు ఆయుధాన్ని సొంతం చేసుకోవాలని పట్టుదలతో ఉందనే నివేదికలు పశ్చిమాసియాలో యుద్ధ మేఘాలను మరింత దట్టం చేస్తున్నాయి.

ముజ్తబా ఖమేనీ కొత్త అణు వ్యూహం

న్యూయార్క్ టైమ్స్ నివేదిక ప్రకారం.. ఇరాన్ కొత్త సుప్రీం లీడర్ ముజ్తబా ఖమేనీ తన తండ్రి అయాతొల్లా అలీ ఖమేనీ విధానాలకు పూర్తి భిన్నంగా వ్యవహరిస్తున్నారు. అలీ ఖమేనీ దశాబ్దాలుగా అణు ఆయుధాల అభివృద్ధికి బహిరంగంగా దూరంగా ఉండేవారు. కానీ ముజ్తబా మాత్రం ఎలాగైనా అణుబాంబు సాధించడమే లక్ష్యంగా తీవ్రంగా శ్రమిస్తున్నారని అమెరికా ఇంటెలిజెన్స్ అంచనా వేసింది. ముజ్తబా తీసుకుంటున్న ఈ ఆక్రమణ నిర్ణయాల వల్లే అమెరికా, ఇజ్రాయెల్ ఈ ప్రాంతంలో యుద్ధ వాతావరణాన్ని పెంచుతున్నాయనే వార్తలు బలంగా వినిపిస్తున్నాయి.

భూగర్భంలో తిరుగుతున్న సెంట్రిఫ్యూజ్‌లు

అమెరికా నిఘా నివేదికల ప్రకారం.. ఇరాన్‌లోని కొండల కింద నిర్మించిన రహస్య భూగర్భ న్యూక్లియర్ టన్నెళ్లలో సెంట్రిఫ్యూజ్‌లు విరామం లేకుండా నిరంతరం తిరుగుతున్నాయి. దీంతో అణు పేలుడు కౌంట్‌డౌన్ ప్రారంభమైందనే సంకేతాలు వెలువడుతున్నాయి. గతంలో 2015లో జరిగిన జేసీపీఓఏ ఒప్పందం ప్రకారం ఇరాన్ కేవలం 3.67 శాతం వరకు మాత్రమే యురేనియంను శుద్ధి చేయడానికి అనుమతి ఉండేది. ఇది కేవలం విద్యుత్ ఉత్పత్తికి సరిపోయే పరిమితి. కానీ 2019 నాటికి ఆ పరిమితిని 20 శాతానికి పెంచిన ఇరాన్, ప్రస్తుతం ఏకంగా 60 శాతం వరకు యురేనియం సంవర్ధనం పూర్తి చేసుకున్నట్లు సమాచారం.

ప్రస్తుతం ఇరాన్ వద్ద దాదాపు 1000 పౌండ్ల శుద్ధి చేసిన అణు పదార్థం ఉన్నట్లు అంచనా వేస్తున్నారు. ఇది గనుక 90 శాతానికి చేరితే, ఇరాన్ అణుబాంబు తయారు చేయడాన్ని ఎవ్వరూ ఆపలేరు. అదే గనుక జరిగితే మధ్యప్రాచ్యంలో ఆధిపత్య పోరు పూర్తిగా మారిపోతుంది. అణు శక్తి కలిగిన ఇరాన్‌ను ఎదుర్కోవడం అమెరికా, ఇజ్రాయెల్‌లకు అత్యంత సంక్లిష్టంగా మారుతుంది. ముజ్తబా ఖమేనీ తన నిర్ణయంతో వాషింగ్టన్ కు నిద్ర లేకుండా చేస్తున్నారనేది స్పష్టమవుతోంది.