White House Shooter : గేమర్ నుంచి షూటర్‌గా.. వైట్ హౌస్ నిందితుడు అలెన్ మనస్తత్వం ఎలా మారింది?

White House Shooter : వైట్ హౌస్ డిన్నర్ పార్టీలో కాల్పులు జరిపి అమెరికాను వణికించిన నిందితుడు కోల్ థామస్ అలెన్ వెనుక ఉన్న అసలు కారణాలు వెలుగులోకి వస్తున్నాయి. వీడియో గేమ్స్ ఆడుకుంటూ ప్రశాంతంగా ఉండే ఒక సాధారణ యువకుడు, ఒక దేశాధ్యక్షుడినే అంతం చేయాలనుకునే స్థాయికి ఎలా వెళ్లాడనేది ఇప్పుడు చర్చనీయాంశంగా మారింది. అతని సోషల్ మీడియా పోస్టులను పరిశీలిస్తే, ఒక మనిషి మనస్తత్వం రాజకీయ ద్వేషంతో ఎలా విషపూరితంగా మారుతుందో అర్థమవుతోంది.

వీడియో గేమ్స్ నుంచి విద్వేషం వైపు

31 ఏళ్ల కోల్ థామస్ అలెన్ ఒకప్పుడు సోషల్ మీడియాలో చాలా యాక్టివ్‌గా ఉండేవాడు. అయితే అప్పట్లో అతని పోస్టులన్నీ వీడియో గేమ్స్, యూట్యూబ్ వీడియోల గురించే ఉండేవి. ముఖ్యంగా నింటెండో గేమ్స్‌పై అతను రివ్యూలు ఇచ్చేవాడు. కానీ 2024 నుంచి అతని పోస్టుల తీరు పూర్తిగా మారిపోయింది. గేమ్స్ స్థానంలో రాజకీయాలు చేరాయి. క్రమంగా డొనాల్డ్ ట్రంప్ ప్రభుత్వంపై కోపాన్ని పెంచుకున్నాడు. ట్రంప్‌ను జర్మన్ నియంత అడాల్ఫ్ హిట్లర్‌తో పోలుస్తూ వివాదాస్పద పోస్టులు చేశాడు. అమెరికాను ట్రంప్ మోసం చేస్తున్నారని, దేశాన్ని కాపాడుకోవడానికి తుపాకులు కొనాలని తన ఫాలోవర్లను రెచ్చగొట్టేవాడు.

డిజిటల్ ఫుట్‌ప్రింట్స్ వెలుగులోకి

అలెన్ తన ఎక్స్ ఖాతాలో సుమారు 4000కు పైగా పోస్టులు చేశాడు. బ్లూస్కై అనే మరో యాప్‌లో కూడా 700కు పైగా పోస్టులు ఉన్నాయి. వీటిని పరిశీలించిన సిఎన్ఎన్, దర్యాప్తు సంస్థలు.. అతను ట్రంప్ పాలనపై ఎంతటి ద్వేషంతో ఉన్నాడో గుర్తించాయి. ట్రంప్ తనపై తానే ఫేక్ హత్యాయత్నం చేయించుకోవచ్చన్న ఒక యూజర్ పోస్టును కూడా అలెన్ రీట్వీట్ చేయడం విశేషం. తుపాకులు కొనడానికి ఇదే సరైన సమయం అంటూ అతను చేసిన కామెంట్స్ ఇప్పుడు ప్రధాన సాక్ష్యాలుగా మారాయి.

అసలు జీవితంలో వేరే మనిషి

సోషల్ మీడియాలో అంతలా విద్వేషం వెళ్లగక్కిన అలెన్, బయట ప్రపంచానికి మాత్రం చాలా మర్యాదస్తుడిగా కనిపించేవాడు. లాస్ ఏంజిల్స్‌లోని టోరెన్స్ ప్రాంతంలో అతను పార్ట్ టైమ్ ట్యూటర్‌గా పనిచేసేవాడు. విద్యార్థులకు పాఠాలు చెప్పే సమయంలో అతను చాలా సాధారణంగా, తెలివైన వ్యక్తిగా ఉండేవడని అతని దగ్గర చదువుకున్న వారు చెబుతున్నారు. ఒక ప్రశాంతమైన ట్యూటర్ ఇలాంటి ఘాతుకానికి ఎలా ఒడిగట్టాడనేది వారిని ఆశ్చర్యానికి గురి చేస్తోంది.

కొనసాగుతున్న దర్యాప్తు

వైట్ హౌస్ కాల్పుల ఘటనలో నిందితుడి తుపాకీ తూటా వల్ల ఒక సీక్రెట్ సర్వీస్ ఏజెంట్ గాయపడినట్లు సమాచారం. నిందితుడు అలెన్ పట్టుబడిన తర్వాత చౌరస్తా(నిశ్శబ్దంగా ఉండే హక్కు)ను ఉపయోగిస్తున్నాడు. కోర్టులో కూడా చాలా ప్రశాంతంగా కనిపిస్తూ జడ్జి అడిగిన ప్రశ్నలకు సూటిగా సమాధానం ఇస్తున్నాడు. ఇతనికి ఏదైనా వామపక్ష ఉగ్రవాద సంస్థలతో సంబంధం ఉందా? లేక ఒంటరిగానే ఈ కుట్ర పన్నాడా? అనే కోణంలో దర్యాప్తు సంస్థలు లోతుగా విచారిస్తున్నాయి.