Se*ual Harassment :13 ఏళ్ల బాలికపై ఘోరం.. స్కూల్‌లో ఏం జరిగింది.?

Se*ual Harassment : కేరళలో తీవ్ర కలకలం రేపిన ఒక ఘటన వెలుగులోకి వచ్చింది. కేవలం 13 ఏళ్ల పాఠశాల విద్యార్థినిపై ఆమె తోటి విద్యార్థులే గత కొన్ని నెలలుగా వరుసగా లైంగిక వేధింపులకు గురిచేసినట్లు ఆరోపణలు వచ్చాయి. ఈ ఘటనపై పోలీసులు దర్యాప్తు ప్రారంభించగా, రాష్ట్ర బాలల హక్కుల పరిరక్షణ కమిషన్ (సుమోటోగా) రంగంలోకి దిగింది.

పాఠశాల ఆవరణలోనే అఘాయిత్యం

పోలీసుల ప్రాథమిక సమాచారం ప్రకారం.. ఈ ఏడాది మే నెలలో ఈ దారుణ సంఘటనలు జరిగాయి. పాఠశాల ఆవరణ, నిందితుల్లో ఒకరైన బాలిక నివాసం, అలాగే పాఠశాల వాష్‌రూమ్‌తో సహా పలు ప్రాంతాల్లో ఈ వేధింపులు జరిగినట్లు తెలుస్తోంది. ఈ కేసులో ఒక బాలికతో సహా మొత్తం 10 మందిని నిందితులుగా చేర్చారు. వీరిలో ఆరుగురు మైనర్లు కావడం గమనార్హం.

కౌన్సిలింగ్ సెషన్‌లో వెలుగులోకి..

బాధిత బాలిక తన పాఠశాలలో జరిగిన ఒక మానసిక కౌన్సిలింగ్ సెషన్‌లో తనకు జరిగిన అన్యాయాన్ని, వేధింపులను వివరించడంతో ఈ ఘోరం బయటపడింది. దీనిపై వెంటనే స్పందించిన స్కూల్ సిబ్బంది చైల్డ్‌లైన్ అధికారులకు సమాచారం అందించారు. చైల్డ్‌లైన్ ఫిర్యాదు మేరకు రంగంలోకి దిగిన పోలీసులు బాలిక స్టేట్‌మెంట్‌ను రికార్డు చేసి, లోతైన విచారణను ప్రారంభించారు.

పోలీసుల విస్తృత దర్యాప్తు.. చైల్డ్ రైట్స్ కమిషన్ సీరియస్

బాధిత మైనర్ బాలికపై వేర్వేరు చోట్ల తోటి విద్యార్థులు పదే పదే వేధింపులకు పాల్పడినట్లు తేలడంతో పోలీసులు అన్ని కోణాల్లో ఆధారాలను సేకరిస్తున్నారు. దాదాపు ఏడాదిన్నర క్రితం ఇదే ప్రాంతంలో జరిగిన మరో లైంగిక దాడి కేసుకు, దీనికి ఏమైనా సంబంధం ఉందా అనే కోణంలోనూ దర్యాప్తు చేస్తున్నారు. మరోవైపు, ఈ ఘటనపై మీడియాలో వచ్చిన కథనాల ఆధారంగా కేరళ రాష్ట్ర బాలల హక్కుల పరిరక్షణ కమిషన్ సుమోటోగా కేసు నమోదు చేసింది. ఈ సంఘటనపై , దర్యాప్తు పురోగతిపై సమగ్ర నివేదిక సమర్పించాలని పోలీసులను ఆదేశించింది.

ఆందోళన కలిగిస్తున్న బాలల భద్రత

విద్యాసంస్థల్లో పిల్లల భద్రతపై ఈ ఘటన మరోసారి తీవ్ర ఆందోళనలను రేకెత్తించింది. ఇలాంటి దారుణాలను ముందే గుర్తించి అడ్డుకునేందుకు కఠినమైన నిబంధనలు ఉండాలని నిపుణులు అభిప్రాయపడుతున్నారు. పాఠశాలలో నిర్వహించిన కౌన్సిలింగ్ సెషన్ వల్లే ఈ విషయం వెలుగులోకి రావడంతో.. విద్యార్థులకు మానసిక ఆరోగ్య మద్దతు వ్యవస్థలు , చైల్డ్ ప్రొటెక్షన్ మెకానిజమ్స్ ఎంత అవసరమో ఈ ఘటన స్పష్టం చేస్తోంది. ప్రస్తుతం ఈ కేసులో దర్యాప్తు కొనసాగుతోందని, మరిన్ని ఆధారాలు లభించిన తర్వాత తదుపరి చర్యలు తీసుకుంటామని పోలీసులు తెలిపారు.