5 Kg LPG Cylinder Demand in India: డొమెస్టిక్‌ వద్దు.. 5 కేజీల సిలిండర్లే ముద్దు అంటున్న సామాన్యులు

5 Kg LPG Cylinder Demand in India: పశ్చిమాసియా యుద్ధ ప్రభావం భారత్‌లో స్పష్టంగా కనిపిస్తోంది. ముఖ్యంగా వంటగ్యాస్ సరఫరాలో వచ్చిన అంతరాయం కారణంగా సాధారణ ప్రజలు చిన్న సిలిండర్లవైపు మళ్లుతున్నారు. 14.2 కిలోల డొమెస్టిక్ సిలిండర్లు, 19 కిలోల కమర్షియల్ సిలిండర్ల కొరత నేపథ్యంలో 5 కిలోల ఎల్‌పీజీ సిలిండర్లు ఇప్పుడు సామాన్యులకు ప్రధాన ప్రత్యామ్నాయంగా మారాయి.

చిన్న సిలిండర్లకు పెరిగిన గిరాకీ

యుద్ధం కారణంగా అంతర్జాతీయంగా ఇంధన సరఫరా గొలుసు దెబ్బతిన్నది. భారత్ తన అవసరాల కోసం సుమారు 85-90% ఎల్‌పీజీని పశ్చిమాసియా నుంచే దిగుమతి చేసుకుంటుంది. సరఫరాలో అంతరాయం కలగడంతో 14.2 కిలోల గృహ వినియోగ సిలిండర్ల లభ్యత తగ్గింది. దీనికి ప్రత్యామ్నాయంగా కేంద్రం 5 కిలోల సిలిండర్ల సరఫరాను పెంచింది.

అధికారిక గణాంకాల ప్రకారం, మార్చి 23 నుంచి ఇప్పటివరకు 13 లక్షలకు పైగా 5 కిలోల సిలిండర్లు విక్రయించబడ్డాయి. ప్రస్తుతం రోజుకు సుమారు 1 లక్ష యూనిట్లకు పైగా అమ్మకాలు జరుగుతున్నాయి. ఇది డిమాండ్ ఎంత వేగంగా పెరిగిందో చూపిస్తోంది. ఈ సిలిండర్లకు ముఖ్యంగా వలస కార్మికులు, తక్కువ ఆదాయ కుటుంబాలు ఎక్కువగా మొగ్గు చూపుతున్నాయి. తక్కువ ధర, సులభ వినియోగం, తక్షణ లభ్యత వంటి కారణాలు వీటిని మరింత ఆకర్షణీయంగా చేస్తున్నాయి. పెద్ద సిలిండర్ కొనలేని పరిస్థితుల్లో చిన్న సిలిండర్ వారికి ఉపశమనంగా మారింది.

పీఎన్‌జీ కనెక్షన్లు

ఇక మరోవైపు, కేంద్రం పైప్డ్ నేచురల్ గ్యాస్ వినియోగాన్ని కూడా ప్రోత్సహిస్తోంది. మార్చి నెల నుంచి ఇప్పటివరకు 4,24,000 కొత్త పీఎన్‌జీ కనెక్షన్లు యాక్టివేట్ చేయబడ్డాయి. అదే సమయంలో సుమారు 30 వేల మంది ఎల్‌పీజీ కనెక్షన్లు సరెండర్ చేసి పీఎన్‌జీకి మారారు. ఇది గ్యాస్ వినియోగంలో మార్పును సూచిస్తోంది. అంతేకాదు, ప్రభుత్వం వాణిజ్య వినియోగదారుల కంటే గృహ వినియోగదారులకు ప్రాధాన్యం ఇస్తోంది. హోటళ్లు, రెస్టారెంట్లకు సరఫరా తగ్గించి, ఇళ్లకు గ్యాస్ అందించడంపై దృష్టి పెట్టింది.

సంక్షోభంలోనే మార్పు

సాధారణంగా ఏదైనా సంక్షోభం వస్తే ప్రజలు ఇబ్బంది పడతారు, కానీ ఇక్కడ ప్రభుత్వం స్మార్ట్‌గా వ్యవహరించింది. పెద్ద సిలిండర్ల కొరతను సాకుగా చూపి, ప్రజలను ఆధునిక పీఎన్‌జీ వైపు మళ్లించడంలో కేంద్రం విజయం సాధించింది. ఏప్రిల్ 11 ఒక్క రోజే దేశవ్యాప్తంగా 52 లక్షల సిలిండర్లను సరఫరా చేసినట్లు గణాంకాలు చెబుతున్నా, మార్కెట్‌లో చిన్న సిలిండర్ల హవానే నడుస్తోంది. ఇక మొత్తంగా చూస్తే, ఇంధన కొరత సమయంలో 5 కిలోల సిలిండర్లు సామాన్యులకు పెద్ద ఉపశమనంగా మారాయి. పరిస్థితులు సాధారణ స్థితికి చేరుకునే వరకు ఇవే ప్రధాన ఆధారంగా మారే అవకాశం ఉంది.