రూ. 10 ల‌క్ష‌లు పెడితే రూ. 20 ల‌క్ష‌లు.. 115 నెల‌ల్లో మీ డ‌బ్బులు డ‌బుల్ అవుతాయి

Post Office: షేర్ మార్కెట్ రిస్క్ లేకుండా సురక్షితంగా పెట్టుబడి పెట్టాలనుకునే వారికి పోస్టాఫీస్ అందించే కిసాన్ వికాస్ పత్ర (KVP) బెస్ట్ ఆప్ష‌న్‌గా చెప్పొచ్చు. ప్రస్తుతం ఈ పథకంపై 7.5 శాతం వార్షిక వడ్డీ లభిస్తోంది. చక్రవడ్డీ విధానంతో పెట్టుబడి చేసిన మొత్తం 115 నెలల్లో అంటే 9 సంవత్సరాల 7 నెలల్లో రెట్టింపు అవుతుంది.

115 నెలల్లో పెట్టుబడి మొత్తం రెట్టింపు

కిసాన్ వికాస్ పత్ర పథకంలో ప్రస్తుతం 7.5 శాతం వార్షిక వడ్డీ అందిస్తున్నారు. ఈ వడ్డీని చక్రవడ్డీ పద్ధతిలో లెక్కిస్తారు. ప్రస్తుతం అమలులో ఉన్న వడ్డీ రేటు ప్రకారం పెట్టుబడి చేసిన మొత్తం 115 నెలల్లో రెట్టింపు అవుతుంది. అంటే రూ.1 లక్ష పెట్టుబడి పెడితే మెచ్యూరిటీ సమయానికి రూ.2 లక్షలు వస్తాయి. అదే రూ.10 లక్షలు పెట్టుబడి పెడితే 115 నెలల తర్వాత రూ.20 లక్షలు పొందవచ్చు. దీంతో అసలు పెట్టుబడికి సమానంగా వడ్డీ రూపంలో లాభం లభిస్తుంది.

రూ.10 లక్షలు పెడితే ఎంత వస్తుంది?

కిసాన్ వికాస్ పత్రలో పెద్ద మొత్తంలో పెట్టుబడి పెట్టాలనుకునే వారికి కూడా అవకాశం ఉంది. ఉదాహరణకు రూ.10 లక్షలు పెట్టుబడి పెడితే ప్రస్తుత వడ్డీ రేటు ప్రకారం మెచ్యూరిటీ సమయంలో మొత్తం రూ.20 లక్షలు అందుతాయి.

ప్రారంభ పెట్టుబడి రూ.10,00,000 అనుకుంటే వార్షిక వడ్డీ రేటు 7.5 శాతానికి లెక్కిస్తే.. మెచ్యూరిటీ కాలం 115 నెలలు త‌ర్వాత మొత్తం రూ.20,00,000 అవుతుంది. అంటే వ‌డ్డీ రూపంలోనే మీరు రూ. 10 ల‌క్ష‌లు పొందొచ్చ‌న్న‌మాట‌. అయితే ప్రభుత్వం కాలానుగుణంగా వడ్డీ రేట్లను సవరించే అవకాశం ఉంటుంది. కాబట్టి పెట్టుబడి చేసే సమయంలో అమలులో ఉన్న నిబంధనలు పరిశీలించడం మంచిది.

కేవలం రూ.1,000తోనే పెట్టుబడి ప్రారంభం

ఈ పథకంలో పెట్టుబడి ప్రారంభించడానికి పెద్ద మొత్తం అవసరం లేదు. కేవలం రూ.1,000తో KVP ఖాతాను ప్రారంభించవచ్చు. ఆ తర్వాత రూ.100 గుణిజాల్లో ఎంత మొత్తమైనా పెట్టుబడి పెట్టే అవకాశం ఉంటుంది.

ఈ పథకంలో గరిష్ట పెట్టుబడికి పరిమితి లేదు. ఒక వ్యక్తి తన అవసరాలకు అనుగుణంగా ఒకటి కంటే ఎక్కువ KVP ఖాతాలను కూడా కలిగి ఉండవచ్చు. దీంతో చిన్న మొత్తంతో పొదుపు ప్రారంభించాలనుకునే వారికి, పెద్ద మొత్తాన్ని సురక్షితంగా పెట్టుబడి పెట్టాలనుకునే వారికి ఈ పథకం ఉపయోగపడుతుంది.

ఎవరు పెట్టుబడి పెట్టవచ్చు? మధ్యలో డబ్బు తీసుకోవచ్చా?

భారతీయ పౌరులు కిసాన్ వికాస్ పత్ర పథకంలో పెట్టుబడి పెట్టవచ్చు. పెద్దవారు తమ వ్యక్తిగత పేరుతో ఖాతా తెరవడంతో పాటు జాయింట్ అకౌంట్ కూడా ప్రారంభించవచ్చు. అలాగే 10 సంవత్సరాలు పైబడిన మైనర్ల పేరుతో కూడా కొన్ని నిబంధనల ప్రకారం పెట్టుబడి పెట్టే అవకాశం ఉంది. తల్లిదండ్రులు లేదా సంరక్షకులు మైనర్ల తరఫున ఖాతాను నిర్వహించవచ్చు. అవసరమైతే మెచ్యూరిటీకి ముందే డబ్బు తీసుకునే అవకాశం కూడా ఉంది. సాధారణంగా నిబంధనలకు అనుగుణంగా 2 సంవత్సరాల 6 నెలలు అంటే 30 నెలలు పూర్తయిన తర్వాత ఖాతాను ముందస్తుగా మూసివేసి డబ్బు పొందవచ్చు.

KVP ఖాతా ఎలా తెరవాలి? ఏ పత్రాలు అవసరం?

కిసాన్ వికాస్ పత్రలో పెట్టుబడి పెట్టాలంటే సమీపంలోని పోస్టాఫీస్ లేదా ఈ పథకాన్ని అందించే అధికారిక బ్యాంకుకు వెళ్లాలి. అక్కడ దరఖాస్తు ఫారాన్ని పూర్తి చేసి అవసరమైన పత్రాలను సమర్పించాలి. సాధారణంగా గుర్తింపు, చిరునామా ధ్రువీకరణ కోసం పాస్‌పోర్ట్ సైజ్ ఫొటో, ఆధార్ కార్డు, పాన్ కార్డు, పాస్‌పోర్ట్, డ్రైవింగ్ లైసెన్స్ వంటివి కావాల్సి ఉంటుంది. ప్రక్రియ పూర్తయిన తర్వాత KVP సర్టిఫికేట్ లేదా పాస్‌బుక్ జారీ చేస్తారు. ఈ ఖాతాను అవసరమైన నిబంధనల ప్రకారం ఒక పోస్టాఫీస్ నుంచి మరో పోస్టాఫీస్‌కు బదిలీ చేసుకోవచ్చు. అలాగే ఖాతాను ఒక వ్యక్తి నుంచి మరొకరి పేరుకు బదిలీ చేసే సౌకర్యం కూడా కొన్ని ప్రత్యేక పరిస్థితుల్లో అందుబాటులో ఉంటుంది.