LIC Saral Pension: ఒక్కసారి పెట్టుబడి పెడితే చాలు.. జీవితాంతం నెలకు రూ.21 వేలకుపైగా పెన్షన్

LIC Saral Pension: ప్రస్తుతం చాలా మంది ఉద్యోగ విరమణ తర్వాత కూడా ఆర్థికంగా ఎలాంటి ఇబ్బందులు లేకుండా జీవించాలని కోరుకుంటున్నారు. అందుకే భవిష్యత్తు కోసం వివిధ పెట్టుబడి పథకాలను పరిశీలిస్తున్నారు. అలాంటి వారికి భారతీయ జీవిత బీమా సంస్థ (LIC) అందిస్తున్న సరల్ పెన్షన్ పథకం (Saral Pension Scheme) మంచి ఎంపికగా చెప్పొచ్చు.

ఒక్కసారి ప్రీమియం చెల్లిస్తే చాలు

LIC సరల్ పెన్షన్ ఒక సింగిల్ ప్రీమియం అన్యుటీ ప్లాన్. అంటే పాలసీ తీసుకునే సమయంలో ఒకేసారి మొత్తం పెట్టుబడి పెట్టాలి. ఆ తర్వాత ప్రతి నెల, మూడు నెలలకు ఒకసారి, ఆరు నెలలకు ఒకసారి లేదా ఏడాదికి ఒకసారి పెన్షన్ పొందే అవకాశం ఉంటుంది. ఉద్యోగ విరమణ తర్వాత స్థిరమైన ఆదాయం కోరుకునే వారి కోసం ఈ పథకాన్ని ప్రత్యేకంగా రూపొందించారు. ఒకసారి పెన్షన్ మొత్తం నిర్ణయించిన తర్వాత అది జీవితాంతం మారదు.

వ్యక్తిగతంగా లేదా దంపతులు కలిసి తీసుకోవచ్చు

ఈ పథకాన్ని ఒక వ్యక్తి తన పేరుతో తీసుకోవచ్చు. అలాగే భార్యాభర్తలు కలిసి జాయింట్ పాలసీగా కూడా కొనుగోలు చేసే అవకాశం ఉంది. ఈ స్కీమ్‌లో 40 ఏళ్ల నుంచి 80 ఏళ్ల మధ్య వయస్సు ఉన్నవారు చేరవచ్చు. వృద్ధాప్యంలో ఆర్థిక భద్రత కల్పించడమే దీని ప్రధాన లక్ష్యం.

లోన్, సరెండర్ వంటి సదుపాయాలు

ఈ పథకంలో మరో ముఖ్యమైన ప్రయోజనం ఏమిటంటే, పాలసీ ప్రారంభమైన ఆరు నెలల తర్వాత కొన్ని నిబంధనల ప్రకారం సరెండర్ చేసే అవకాశం ఉంటుంది. అత్యవసర పరిస్థితుల్లో పాలసీపై రుణం కూడా పొందవచ్చు. పాలసీదారు మరణించిన తర్వాత పెట్టుబడి పెట్టిన అసలు మొత్తాన్ని నామినీకి తిరిగి చెల్లిస్తారు. దీంతో కుటుంబానికి కూడా ఆర్థిక భద్రత లభిస్తుంది.

పెన్షన్ మొత్తం ఎంత నుంచి ప్రారంభమవుతుంది?

సరల్ పెన్షన్ పథకంలో కనీస వార్షిక పెన్షన్ రూ.12,000 నుంచి ప్రారంభమవుతుంది. పెట్టుబడికి గరిష్ట పరిమితి లేదు. అంటే ఎంత ఎక్కువ పెట్టుబడి పెడితే అంత ఎక్కువ పెన్షన్ పొందవచ్చు. పాలసీదారులు తమ అవసరాన్ని బట్టి నెలవారీ, త్రైమాసిక, అర్ధవార్షిక లేదా వార్షిక పెన్షన్ విధానాన్ని ఎంచుకోవచ్చు.

రూ.40 లక్షలు పెట్టుబడి పెడితే ఎంత పెన్షన్ వస్తుంది?

LIC కాలిక్యులేటర్ ప్రకారం, 40 ఏళ్ల వయస్సులో ఉన్న వ్యక్తి ఈ పథకంలో రూ.40 లక్షలు ఒకేసారి పెట్టుబడి పెడితే సంవత్సరానికి సుమారు రూ.2.62 లక్షల పెన్షన్ పొందే అవకాశం ఉంటుంది. అంటే నెలకు దాదాపు రూ.21,800 నుంచి రూ.22,000 వరకు గ్యారంటీ ఆదాయం రావచ్చు. ఉద్యోగ విరమణ తర్వాత క్రమం తప్పకుండా ఆదాయం పొందాలనుకునే వారికి ఇది ఉపయోగకరమైన పథకంగా చెప్పవచ్చు.