EPFO: మీ ఈపీఫ్ క్లెయిమ్ 20 రోజులుగా పెండింగ్‌లో ఉందా.? అస‌లు కార‌ణం ఏంటో తెలుసా.?

EPFO: ఉద్యోగుల భవిష్య నిధి సంస్థ (EPFO) వద్ద లక్షలాది మంది ఉద్యోగుల EPF క్లెయిమ్‌లు 20 రోజులకు పైగా పెండింగ్‌లో ఉన్నట్లు సమాచారం. EPFO డిజిటల్ సేవలను వేగవంతం చేస్తున్నప్పటికీ, క్లెయిమ్‌ల పరిష్కారంలో ఆలస్యం జరుగుతోందని EPF అధికారుల సంఘం ఆందోళన వ్యక్తం చేసింది. ఈ ఆల‌స్యానికి కార‌ణం ఏంటంటే?

లక్షలాది EPF క్లెయిమ్‌లు పెండింగ్‌లోనే..

సాధారణంగా ఆటోమేటిక్‌గా ప్రాసెస్ కావాల్సిన అనేక EPF క్లెయిమ్‌లు కూడా 20 రోజులకు పైగా పెండింగ్‌లోనే ఉన్నాయని EPF అధికారుల సంఘం తెలిపింది. కొత్త డిజిటల్ వ్యవస్థ వచ్చిన తర్వాత క్లెయిమ్‌లు మరింత వేగంగా పూర్తవుతాయని భావించినప్పటికీ, ప్రస్తుతం ఫీల్డ్ కార్యాలయాలు, సభ్యులు ఇద్దరూ ఇబ్బందులు ఎదుర్కొంటున్నారు. క్లెయిమ్ ఏ దశలో ఉందో కూడా స్పష్టమైన సమాచారం అందడం లేదని అధికారులు చెబుతున్నారు. ఈ సమస్యపై EPF అధికారుల సంఘం ఆగస్టు 3న కేంద్ర కార్మిక, ఉపాధి మంత్రికి లేఖ రాసింది. అదే లేఖను EPFO సెంట్రల్ బోర్డ్ ఆఫ్ ట్రస్టీస్ ఛైర్మన్‌కు కూడా పంపి, సంస్థలో నెలకొన్న సమస్యలను పరిష్కరించాలని కోరింది.

కొత్త CITES వ్యవస్థ అమలులో జాప్యమే ప్రధాన కారణమా?

EPFO క్లెయిమ్‌లను రెండు నుంచి మూడు రోజుల్లో ఆటోమేటిక్‌గా పరిష్కరించాలనే లక్ష్యంతో సెంట్రలైజ్డ్ ఐటీ ఎనేబుల్డ్ సిస్టమ్ (CITES)ని తీసుకొచ్చారు. ఈ ప్రాజెక్టును 2023 జనవరిలో C-DACకు అప్పగించారు. పది నెలల్లో పూర్తిచేయాలని లక్ష్యంగా పెట్టుకున్నప్పటికీ, ప్రాజెక్టు అభివృద్ధిలో గణనీయమైన జాప్యం జరిగినట్లు అధికారుల సంఘం పేర్కొంది.

చివరకు 2026 జూలై నుంచి ఈ వ్యవస్థను దశలవారీగా అమలు చేస్తున్నారు. అయితే సాంకేతిక లోపాల కారణంగా EPF క్లెయిమ్‌ల పరిష్కారం మాత్రమే కాకుండా సభ్యుల ఫిర్యాదుల పరిష్కారంలో కూడా ఆలస్యం జరుగుతోందని అధికారులు అంటున్నారు.

ఐటీ నిపుణుల కొరత.. 22 ఏళ్లుగా ప్రత్యక్ష నియామకాలు లేవు

EPFOలోని ఇన్ఫర్మేషన్ సర్వీస్ డివిజన్ (ISD)లో తీవ్ర సిబ్బంది కొరత ఉందని అధికారుల సంఘం వెల్లడించింది. ఈ విభాగంలో చివరిసారిగా 2004లో ప్రత్యక్ష నియామకాలు జరిగాయని, అప్పటి నుంచి కొత్త నియామకాలు జరగలేదని తెలిపింది. అంటే దాదాపు 22 సంవత్సరాలుగా ఐటీ విభాగంలో డైరెక్ట్ రిక్రూట్‌మెంట్ జరగలేదు.

అంతేకాదు, గత మూడు సంవత్సరాలుగా EPFOలో పూర్తి స్థాయి చీఫ్ టెక్నాలజీ ఆఫీసర్ (CTO) కూడా లేరని అధికారులు పేర్కొన్నారు. సంస్థ వేగంగా డిజిటల్ సేవల వైపు అడుగులు వేస్తున్నప్పటికీ, తగినంత మంది ఐటీ నిపుణులు లేకపోవడం వల్ల సాంకేతిక సమస్యలు మరింత పెరుగుతున్నాయని వెల్లడించారు.

పెరుగుతున్న పనిభారం.. ఉద్యోగుల కొరతపై చర్యలు తీసుకోవాలని డిమాండ్

EPFOలో ప్రస్తుతం ఉన్న సిబ్బంది సంఖ్య, సంస్థపై ఉన్న పనిభారానికి సరిపోవడం లేదని అధికారుల సంఘం తెలిపింది. ప్రస్తుతం ఉన్న ఉద్యోగుల బలం దాదాపు 2008 మార్చి నాటి స్థాయిలోనే ఉందని, కానీ అప్పటి నుంచి సభ్యుల సంఖ్య, క్లెయిమ్‌లు, సేవల వినియోగం భారీగా పెరిగాయని పేర్కొంది. ముఖ్యంగా ముంబై, ఢిల్లీ, బెంగళూరు, గురుగ్రామ్ వంటి నగరాల్లోని EPFO కార్యాలయాలపై మరింత ఒత్తిడి ఉందని వెల్లడించింది.

అలాగే ఉద్యోగుల పెన్షన్ పథకం (EPS)లో కూడా సంస్కరణలు అవసరమని అధికారుల సంఘం అభిప్రాయపడింది. EPS ఆర్థిక పరిస్థితిని మరింత బలోపేతం చేయాలని, EPFOలో సాంకేతిక నిపుణుల పాత్రను పెంచాలని, ఉన్నత పదవుల నియామక విధానాన్ని సమీక్షించాలని సూచించింది. ఆధునిక ఆర్థిక సంస్థగా EPFO మరింత సమర్థవంతంగా పనిచేయాలంటే బలమైన ఐటీ వ్యవస్థ, తగిన సిబ్బంది, నిపుణుల నాయకత్వం అత్యవసరమని అధికారుల సంఘం స్పష్టం చేసింది.