Limited Edition : 100 ఏళ్ల సంబరాలు..డుకాటి స్పెషల్ ఎడిషన్.. కేవలం 100 బైక్‌లే..

Limited Edition : ప్రపంచవ్యాప్తంగా లగ్జరీ బైక్ ప్రేమికులను ఎంతగానో ఆకట్టుకునే ఇటాలియన్ ప్రీమియం మోటార్‌సైకిల్ తయారీ సంస్థ 'డుకాటి' (Ducati) సరికొత్త మైలురాయిని అధిగమించింది. తన 100వ వార్షికోత్సవాన్ని పురస్కరించుకుని అత్యంత ప్రతిష్టాత్మకంగా ‘Collezione 100’ బైక్ సిరీస్‌ను మార్కెట్లోకి పరిచయం చేసింది. ఇటలీలోని ముగెల్లో సర్క్యూట్‌లో అత్యంత వైభవంగా జరిగిన ఇటాలియన్ గ్రాండ్ ప్రిక్స్ వేదికగా డుకాటి ఈ ప్రత్యేక లైనప్‌ను అధికారికంగా ఆవిష్కరించింది. ఈ ప్రత్యేక కలెక్షన్‌లో మొత్తం 10 రకాల స్పెషల్ ఎడిషన్ మోటార్‌సైకిళ్లు ఉండగా, ప్రతి మోడల్‌ను ప్రపంచవ్యాప్తంగా కేవలం 100 యూనిట్లకు మాత్రమే పరిమితం చేయడం విశేషం.

అబ్బురపరిచే ‘Collezione 100’ వినూత్న ఫీచర్లు

ఈ శతాబ్ది కలెక్షన్‌లోని అన్ని మోటార్‌సైకిళ్లను ప్రత్యేకమైన సెంటెనరీ డిజైన్ అంశాలతో డుకాటి అద్భుతంగా తీర్చిదిద్దింది. ఇందులో భాగంగా బైక్‌లకు ప్రత్యేకమైన సెంటెనరీ బ్రాంజ్ బ్రేక్ కాలిపర్స్, బ్రాంజ్ ఫినిష్‌తో కూడిన ఫ్యూయల్ ఫిల్లర్ క్యాప్‌ను అమర్చారు. వాహనదారులకు మరింత ప్రీమియం అనుభూతిని ఇవ్వడానికి స్టీరింగ్ హెడ్ , బిల్లెట్ ట్రిపుల్ క్లాంప్‌పై ప్రత్యేక నంబర్డ్ ప్లేట్‌ను ఉంచారు. అలాగే 'Ducati 100' లోగోతో అలంకరించిన విలాసవంతమైన అల్కాంటారా, లెదర్ సీట్లు, బైక్ స్టార్ట్ చేయగానే కనిపించే ప్రత్యేక టీఎఫ్‌టీ (TFT) స్టార్ట్-అప్ యానిమేషన్ వంటి ఎలిమెంట్లు ఈ లిమిటెడ్ ఎడిషన్‌కు ప్రత్యేక గుర్తింపును తీసుకువస్తున్నాయి.

స్పోర్టీ రైడింగ్ కోసం ప్రత్యేక డ్రై క్లచ్ సెటప్

ఈ సరికొత్త కలెక్షన్‌లో భాగంగా విడుదల చేసిన బైక్‌లలో డెజర్ట్ఎక్స్ 100 (DesertX 100), స్క్రాంబ్లర్ 100 (Scrambler 100) మోడళ్లు మినహా మిగిలిన అన్ని వీ2 (V2) మోడళ్లకు డుకాటి ప్రత్యేక డ్రై క్లచ్ సెటప్‌ను అందించింది. ఈ సరికొత్త టెక్నాలజీ రైడింగ్ అనుభవాన్ని మునుపటి కంటే మరింత స్పోర్టీగా మార్చడమే కాకుండా, బైక్‌కు ఒక ప్రత్యేకమైన రేసింగ్ క్యారెక్టర్‌ను జోడిస్తుంది. వేగంగా ప్రయాణించడాన్ని ఇష్టపడే బైక్ రైడర్లకు ఈ ఫీచర్ ఒక సరికొత్త థ్రిల్‌ను ఇస్తుంది.

బైక్‌తో పాటు లభించే అదిరిపోయే గిఫ్ట్ ప్యాక్

ఈ శతాబ్ది ఉత్సవాల వేడుకల్లో భాగంగా ‘Collezione 100’ సిరీస్‌లోని బైక్‌ను సొంతం చేసుకునే కొనుగోలుదారులకు డుకాటి సంస్థ కొన్ని అరుదైన, విలువైన అదనపు బహుమతులను కూడా ఉచితంగా అందిస్తోంది. ఇందులో భాగంగా బైక్ భద్రత కోసం రియర్ ప్యాడాక్ స్టాండ్, ప్రత్యేకమైన మోటార్‌సైకిల్ కవర్‌తో పాటు ఆ బైక్ ఒరిజినాలిటీని ధృవీకరించే ప్రామాణికత పత్రాన్ని (Certificate of Authenticity) ఇస్తున్నారు. వీటితో పాటు ప్రముఖ ఇటాలియన్ లగ్జరీ ఆర్టిస్ట్ ఉగో నెస్పోలో స్వయంగా సంతకం చేసిన, ప్రత్యేక నంబర్ కలిగిన రెండు అరుదైన ఆర్ట్ ప్రింట్లను కూడా ఈ గిఫ్ట్ ప్యాక్‌లో అందించడం విశేషం.

డుకాటి శతాబ్ది శ్రేణిలోని 10 ప్రత్యేక మోడళ్లు

ఈ వందవ సంవత్సరాల వేడుకల కలెక్షన్‌లో భాగంగా డుకాటి సంస్థ పానిగాలే వీ4 ఎస్ 100 (Panigale V4 S 100), పానిగాలే వీ2 ఎస్ 100 (Panigale V2 S 100), స్ట్రీట్‌ఫైటర్ వీ4 ఎస్ 100 (Streetfighter V4 S 100), మాన్‌స్టర్ 100 (Monster 100) మోడళ్లను విడుదల చేసింది. వీటితో పాటు ఎక్స్‌డయావెల్ వీ4 100 (XDiavel V4 100), డయావెల్ వీ4 ఆర్‌ఎస్ 100 (Diavel V4 RS 100), మల్టీస్ట్రాడా వీ4 ఆర్‌ఎస్ 100 (Multistrada V4 RS 100), స్క్రాంబ్లర్ 100 (Scrambler 100), హైపర్‌మోటార్డ్ వీ2 ఎస్‌పీ 100 (Hypermotard V2 SP 100) , డెజర్ట్ఎక్స్ 100 (DesertX 100) వంటి శక్తివంతమైన మోడళ్లను అందుబాటులోకి తెచ్చింది.

కలెక్టర్లకు దక్కనున్న అరుదైన అవకాశం

ప్రపంచవ్యాప్తంగా ఉన్న డుకాటి అభిమానులకు, అరుదైన వస్తువులను సేకరించే కలెక్టర్లకు ఈ సిరీస్ ఒక పెద్ద వరమనే చెప్పాలి. ఎందుకంటే ఇందులో లభించే ప్రతి మోడల్ కేవలం 100 యూనిట్లు మాత్రమే అందుబాటులో ఉండటం వల్ల వీటికి మార్కెట్లో విపరీతమైన డిమాండ్ ఏర్పడింది. డుకాటి సంస్థ శతాబ్ది వేడుకలకు గుర్తుగా ఎంతో ప్రతిష్టాత్మకంగా రూపొందించిన ఈ మోటార్‌సైకిళ్లు, భవిష్యత్తులో అత్యంత అరుదైన , విలువైక కలెక్టర్ ఎడిషన్‌లుగా నిలిచిపోతాయని ఆటోమొబైల్ నిపుణులు భావిస్తున్నారు.