Best CNGSUV in India: లేటెస్ట్ ఫీచర్లేకాదు, సేఫ్టీలోనూ తోపులు.. అత్యధిక మైలేజ్ ఇచ్చే టాప్ 5 సీఎన్‌జీ ఎస్‌యూవీలు ఇవే..!

Best CNGSUV in India: పెట్రోల్, డీజిల్ ధరలు మండిపోతుండటంతో మధ్యతరగతి ప్రజలు సీఎన్‌జీ వాహనాల వైపు మొగ్గుచూపుతున్నారు. సామాన్యుడి జేబుకు చిల్లు పడకుండా, తక్కువ ఖర్చుతో సుదూర ప్రయాణాలు చేసేందుకు ఇవి ఎంతగానో ఉపయోగపడతాయి. అత్యుత్తమ మైలేజ్, పటిష్టమైన భద్రత, ఆధునిక ఫీచర్ల కలయికగా భారత మార్కెట్లో విపరీతమైన ఆదరణ పొందుతున్న టాప్ 5 సీఎన్‌జీ ఎస్‌యూవీల పూర్తి వివరాలు తెలుసుకుందాం.

భారతీయ రోడ్లపై ఎన్నో ఏళ్లుగా మారుతి సుజుకి సంస్థ తిరుగులేని ఆధిపత్యం చెలాయిస్తోంది. సగటు మధ్యతరగతి ప్రజల నాడి పట్టుకోవడంలో ఈ బ్రాండ్‌కు సాటిలేరు. ఈ క్రమంలోనే మార్కెట్లోకి వచ్చిన మారుతి సుజుకి ఫ్రాంక్స్ రికార్డు స్థాయిలో మైలేజ్ ఇస్తూ టాప్ స్థానాన్ని కైవసం చేసుకుంది. శక్తివంతమైన 1.2 లీటర్ల పెట్రోల్ ఇంజిన్‌తో వచ్చే ఈ కారు సీఎన్‌జీ మోడ్‌లో ఏకంగా 28 కి.మీ మైలేజ్ ఇస్తుంది. అత్యధిక ఇంధన సామర్థ్యం అందించే వాహనంగా తన సెగ్మెంట్‌లో అగ్రగామిగా నిలిచింది. ట్రాఫిక్‌తో కిటకిటలాడే నగర ప్రయాణాలకు, రోజువారీ ఆఫీసు పనులకు ఇది అత్యుత్తమ ఎంపిక. దీని నిర్వహణ ఖర్చు చాలా తక్కువ కాబట్టి సామాన్యుల బడ్జెట్‌కు సరిగ్గా సరిపోతుంది.

మారుతి సంస్థకే చెందిన మరో అద్భుతమైన మోడల్ బ్రెజా. ప్రీమియం ఫీచర్లతో వచ్చే ఈ కాంపాక్ట్ ఎస్‌యూవీ యువతను విపరీతంగా ఆకట్టుకుంటోంది. దీనిలోని 1.5 లీటర్ల ఇంజిన్ సునాయాసంగా కిలో సీఎన్‌జీకి 26 కిలోమీటర్ల మైలేజ్ ఇస్తుంది. ఆకట్టుకునే బాహ్య రూపం, కుటుంబం మొత్తం కూర్చునేలా విశాలమైన క్యాబిన్ దీని సొంతం. బేస్ వేరియంట్ నుంచి టాప్ ఎండ్ వరకు అన్ని మోడళ్లలో కంపెనీ మెరుగైన ప్రమాణాలను పాటిస్తోంది. దీర్ఘకాలం మన్నిక వచ్చే కారు కావాలనుకునేవారికి బ్రెజా సరైన ఛాయిస్.

జేబుకు సరిపోయే ధరలో నిస్సాన్ మాగ్నైట్, రెనాల్ట్ కైగర్..

తక్కువ బడ్జెట్‌లో ఎస్‌యూవీ అనుభూతిని కోరుకునేవారికి రెనాల్ట్ కైగర్ ఒక అద్భుతమైన ఆల్టర్నేటివ్. 1.0 లీటర్ల పవర్‌ఫుల్ ఇంజిన్ సామర్థ్యంతో వచ్చే ఈ వాహనం కిలో సీఎన్‌జీకి ఏకంగా 24 కిలోమీటర్ల ప్రయాణ పరిధిని అందిస్తుంది. తక్కువ ధరలో స్టైలిష్ ఏరోడైనమిక్ లుక్, మోడ్రన్ ఇంటీరియర్స్ కోరుకునే వినియోగదారులకు ఇది పర్ఫెక్ట్ మ్యాచ్ అవుతుంది. గ్రామీణ, పట్టణ ప్రాంతాల్లో సైతం దీనికి మంచి డిమాండ్ నెలకొంది.

ఇదే విభాగంలో నిస్సాన్ మాగ్నైట్ సైతం తనదైన ముద్ర వేస్తోంది. టెక్నాలజీ పరంగా కైగర్‌కు గట్టి పోటీనిచ్చే ఈ కారు కూడా 24 కి.మీ మైలేజ్ నమోదు చేస్తుంది. ఈ కారులో ఒక ఆసక్తికరమైన ప్రత్యేకత దాగిఉంది. సీఎన్‌జీ ఆప్షన్‌తో పాటు ఏఎమ్‌టీ (ఆటోమెటిక్) గేర్‌బాక్స్ సదుపాయం అందిస్తున్న ఏకైక ఎస్‌యూవీ ఇదే కావడం గొప్ప అడ్వాంటేజ్. పదే పదే క్లచ్ నొక్కే బాధ లేకుండా సాఫీగా సాగిపోయే ప్రయాణం కోసం దీనిని కళ్లుమూసుకుని ఎంచుకోవచ్చు. దీని బోల్డ్ స్టైలింగ్ రోడ్డుపై ప్రత్యేక ఆకర్షణగా దర్శనమిస్తుంది.

డ్యూయల్ సిలిండర్ టెక్నాలజీతో సత్తా చాటుతున్న టాటా నెక్సాన్..

భారతీయ మార్కెట్లో భద్రత అనగానే అందరికీ ముందుగా గుర్తొచ్చే పేరు టాటా. ఆ సంస్థ నుంచి వచ్చిన బెస్ట్ సెల్లింగ్ మోడల్ టాటా నెక్సాన్ ఇప్పుడు సీఎన్‌జీ వెర్షన్‌లో సరికొత్త బెంచ్‌మార్క్ క్రియేట్ చేస్తోంది. ఈ కారు సైతం సగటున కిలోకు 24 కిలోమీటర్ల మైలేజ్‌ను అందిస్తూ వినియోగదారుల మన్ననలు పొందుతోంది. సీఎన్‌జీ వాహనం అనగానే వెనుక బూట్ స్పేస్ ఉండదనే అపోహను టాటా పటాపంచలు చేసింది. దీనికోసం డ్యూయల్ సిలిండర్ టెక్నాలజీని రంగంలోకి దించింది.

సాధారణంగా ఒక్క పెద్ద సిలిండర్ వాడితే డెక్కీలో లగేజీ పెట్టుకోవడానికి చోటు ఉండదు. ఆ సమస్యను అధిగమించడానికి టాటా ఇంజినీర్లు రెండు చిన్న సిలిండర్లను బూట్ స్పేస్ అడుగు భాగంలో తెలివిగా అమర్చారు. దీనివల్ల ప్రయాణికులకు బ్యాగులు సర్దుకోవడానికి పుష్కలంగా జాగా దొరుకుతుంది. అద్భుతమైన పవర్, రాజీలేని సేఫ్టీ.. ఇలా అన్ని కోణాల్లో నెక్సాన్ తిరుగులేని ఎంపికగా నిలుస్తుంది. దేశవ్యాప్తంగా విస్తృతమైన సర్వీస్ నెట్‌వర్క్ ఉండటం వల్ల కస్టమర్లకు సర్వీసింగ్ విషయంలో ఎలాంటి ఇబ్బంది తలెత్తదు.

పెట్రోల్, డీజిల్ ధరలు సామాన్యులను భయపెడుతున్న ప్రస్తుత తరుణంలో, పైన పేర్కొన్న సీఎన్‌జీ ఎస్‌యూవీలు ఉత్తమ ప్రత్యామ్నాయంగా నిలుస్తున్నాయి. మీ బడ్జెట్, రోజువారీ ప్రయాణ అవసరాలను బట్టి సరైన మోడల్‌ను ఎంచుకోవడం ద్వారా భవిష్యత్తులో వేల రూపాయల ఇంధన ఖర్చును ఆదా చేసుకోవచ్చు.