తక్కువ బడ్జెట్, 55 కిమీల మైలేజ్.. కాలేజీ అమ్మాయిల కోసం బెస్ట్ 110సీసీ స్కూటర్లు ఇవే..!

Best Scooters For College Girls: కాలేజీకి వెళ్లే అమ్మాయిలకు తక్కువ బడ్జెట్‌లో బెస్ట్ మైలేజ్, సులువైన హ్యాండ్లింగ్ అందించే 110cc స్కూటర్లు మార్కెట్లో అందుబాటులో ఉన్నాయి. రూ.68,150 ప్రారంభ ధరతో లభించే ఈ మోడళ్లు తేలికపాటి బరువుతో పాటు రోజువారీ ప్రయాణాలకు ఎంతో సౌకర్యవంతంగా ఉంటాయి. విద్యార్థుల బడ్జెట్‌కు సరిపోయే టాప్ స్కూటర్ల ఫీచర్లు, ధరల వివరాలు మీకోసం.

బడ్జెట్ ధరలో తేలికపాటి టీవీఎస్ జెస్ట్, ప్లెజర్ ప్లస్..

కాలేజీ విద్యార్థినులను దృష్టిలో ఉంచుకుని ప్రత్యేకంగా డిజైన్ చేసిన టీవీఎస్ స్కూటీ జెస్ట్ 110 కేవలం రూ.68,150 ప్రారంభ ఎక్స్-షోరూమ్ ధరతో లభిస్తోంది. కేవలం 103 కిలోల బరువు, 760 మి.మీ తక్కువ సీటు ఎత్తు ఉండటం వల్ల రద్దీ ట్రాఫిక్‌లోనూ సులువుగా నడపవచ్చు.

ఇందులో 109.7 cc ఎకోథ్రస్ట్ ఇంజిన్, 19 లీటర్ల బూట్ స్పేస్, యూఎస్‌బీ ఛార్జర్ వంటి ఫీచర్లు ఉన్నాయి. మరోవైపు రెట్రో లుక్‌తో ఆకట్టుకునే హీరో ప్లెజర్ ప్లస్ ప్రారంభ ధర రూ.69,766గా ఉంది. 110.9 cc ఇంజిన్‌తో వచ్చే ఈ స్కూటర్‌లో ఎల్ఈడీ ప్రొజెక్టర్ హెడ్‌ల్యాంప్, బ్లూటూత్ స్పీడోమీటర్, ఐబీఎస్ బ్రేకింగ్ సిస్టమ్ ఉన్నాయి. ఈ రెండు మోడళ్లు లీటరుకు 50-55 కి.మీ మైలేజ్ అందిస్తాయి.

33 లీటర్ల స్టోరేజ్‌తో టీవీఎస్ జూపిటర్ 110..

కాలేజ్ బ్యాగులు, ఇతర వస్తువులు పెట్టుకోవడానికి భారీగా 33 లీటర్ల అండర్-సీట్ స్టోరేజ్ అందించే టీవీఎస్ జూపిటర్ ఎక్స్-షోరూమ్ ప్రారంభ ధర రూ.74,000గా నిర్ణయించారు. ఇది 113.3 cc సింగిల్ సిలిండర్ ఇంజిన్‌తో 8.02 PS పవర్ ఇస్తుంది. టర్న్-బై-టర్న్ నేవిగేషన్, బ్లూటూత్ కనెక్టివిటీ, ఫ్రంట్ ఫ్యూయల్ ఫిల్లింగ్ సౌకర్యాలు ఇందులో ఉన్నాయి.

మెటల్ బాడీ భరోసాతో హోండా యాక్టివా..

ఎంతో కాలంగా మార్కెట్లో నమ్మకమైన బ్రాండ్‌గా పేరుగాంచిన హోండా యాక్టివా ఎక్స్-షోరూమ్ ధర రూ.77,081 నుంచి ప్రారంభమవుతుంది. ధృడమైన మెటల్ బాడీ, 109.51 cc ఫ్యూయల్-ఇంజెక్షన్ ఇంజిన్‌తో పనిచేసే ఈ స్కూటర్ 45-50 కి.మీల మైలేజ్ ఇస్తుంది. అధునాతన స్మార్ట్ కీ, టెలిస్కోపిక్ సస్పెన్షన్, ఎక్స్‌టర్నల్ ఫ్యూయల్ క్యాప్ వంటి సౌకర్యాలు రోజువారీ ప్రయాణాన్ని మరింత సులభతరం చేస్తాయి.

సరసమైన ధర, అద్భుతమైన మైలేజీ, తక్కువ మెయింటెనెన్స్ కోరుకునే కాలేజీ విద్యార్థినులకు ఈ 110cc స్కూటర్లు సరైన ఎంపికగా నిలుస్తాయి. ట్రాఫిక్‌లో తేలికపాటి బరువు కావాలనుకుంటే జెస్ట్ లేదా ప్లెజర్ ప్లస్, ఎక్కువ స్టోరేజ్ కోసం జూపిటర్, రీసేల్ నమ్మకం కోసం యాక్టివాను ఎంచుకోవచ్చు.