Amaravati: ఏపీలో 10,060 ప్రభుత్వ ఉద్యోగాల భర్తీకి గ్రీన్‌సిగ్నల్!

Amaravati: రాష్ట్రంలో ప్రభుత్వ ఉద్యోగాల కోసం ఎదురుచూస్తున్న నిరుద్యోగులకు ప్రభుత్వం శుభవార్త అందించింది. 2026 జాబ్ క్యాలెండర్‌లో భాగంగా మొత్తం 10,060 ప్రభుత్వ పోస్టుల భర్తీకి ప్రభుత్వం అనుమతి ఇచ్చింది. నాలుగు దశల్లో ఈ నియామక ప్రక్రియను చేపట్టేందుకు ప్రభుత్వం కార్యాచరణ సిద్ధం చేసింది. ఇప్పటికే తొలి దశలో 1,523 పోస్టులకు నోటిఫికేషన్ జారీ కాగా మిగిలిన పోస్టులకు విడతల వారీగా నోటిఫికేషన్లు విడుదల చేయనున్నారు.

రెండో దశలో భాగంగా సెప్టెంబర్ 15న 3,231 పోస్టులకు నోటిఫికేషన్ విడుదల చేయనున్నారు. ఇందులో గ్రూప్-1 కేటగిరీలో 149 పోస్టులు ఉండనున్నాయి. పోలీస్ శాఖలోనూ భారీగా ఉద్యోగాల భర్తీకి ప్రభుత్వం నిర్ణయించింది. రెండో దశలో 542 పోలీస్ కానిస్టేబుల్ పోస్టులు, 182 సివిల్ ఎస్ఐ పోస్టులు భర్తీ చేయనున్నారు. దీంతో పోలీస్ ఉద్యోగాల కోసం సిద్ధమవుతున్న అభ్యర్థులకు ఈ నోటిఫికేషన్లు కీలకంగా మారనున్నాయి.

ఇక మూడో దశలో అక్టోబర్ 15న 2,311 పోస్టులకు నోటిఫికేషన్ జారీ చేయనున్నారు. ఇందులో గ్రూప్-2 పోస్టులకు ప్రత్యేక ప్రాధాన్యత ఇచ్చారు. గ్రూప్-2 కేటగిరీలో 673 పోస్టులు భర్తీ చేయనున్నారు. అదేవిధంగా డిప్యూటీ తహసీల్దార్ పోస్టులు 200 ఉన్నాయి. రెవెన్యూ శాఖలో కీలకమైన ఈ పోస్టులతో పాటు ఇంజినీరింగ్, ఇతర ప్రభుత్వ విభాగాల్లో కలిపి మరో 1,638 పోస్టులను ఈ దశలో భర్తీ చేయనున్నారు.

నాలుగో దశలోనూ భారీ సంఖ్యలో ఉద్యోగాల భర్తీకి ప్రభుత్వం ప్రణాళిక రూపొందించింది. అక్టోబర్ 15న 2,995 పోస్టులకు నోటిఫికేషన్ విడుదల చేయనున్నారు. ఈ దశలో అత్యధికంగా స్కూల్ ఎడ్యుకేషన్ శాఖలోనే 2,991 పోస్టులు ఉండటం విశేషం. ఉపాధ్యాయులు, విద్యా రంగానికి సంబంధించిన ఇతర ఉద్యోగాల కోసం ఎదురుచూస్తున్న అభ్యర్థులకు ఈ నోటిఫికేషన్ కీలకంగా మారనుంది.

2026 జాబ్ క్యాలెండర్ ద్వారా నాలుగు దశల్లో 10,060 ఉద్యోగాలను భర్తీ చేయాలని ప్రభుత్వం లక్ష్యంగా పెట్టుకుంది. తొలి దశ నోటిఫికేషన్లతో నియామక ప్రక్రియకు శ్రీకారం చుట్టగా.. సెప్టెంబర్, అక్టోబర్ నెలల్లో వరుసగా మిగిలిన దశల నోటిఫికేషన్లు వెలువడనున్నాయి. గ్రూప్-1, గ్రూప్-2, పోలీస్, రెవెన్యూ, ఇంజినీరింగ్, స్కూల్ ఎడ్యుకేషన్ తదితర విభాగాల్లో అవకాశాలు కల్పించడంతో వివిధ పోటీ పరీక్షలకు సిద్ధమవుతున్న వేలాది మంది అభ్యర్థులకు ఈ జాబ్ క్యాలెండర్ ప్రయోజనం కలిగించనుంది.

ఉద్యోగాల భర్తీ ప్రక్రియను నిర్ణీత షెడ్యూల్ ప్రకారం పూర్తి చేసి, ఖాళీలను దశల వారీగా భర్తీ చేయాలని ప్రభుత్వం నిర్ణయించింది. నోటిఫికేషన్ల విడుదలతో రాష్ట్రంలో పోటీ పరీక్షలకు సిద్ధమవుతున్న అభ్యర్థుల్లో ఉత్సాహం నెలకొంది.