H-CITI: హైదరాబాద్ కోర్ సిటీ అభివృద్ధిపై సీఎం రేవంత్ బిగ్ ప్లాన్ – సమగ్ర ప్రణాళిక రూపుదిద్దుకోనుంది

హైదరాబాద్ కోర్ సిటీకి కొత్త మారు రూపం.. సీఎం రేవంత్ ఆధ్వర్యంలో సమగ్ర ప్రణాళిక

హైదరాబాద్ న్యూస్ డెస్క్: హైదరాబాద్ నగర అభివృద్ధికి భారీ ప్రణాళికలతో తెలంగాణ ప్రభుత్వం ముందుకు వెళ్లుతోంది. ముఖ్యమంత్రి రేవంత్ రెడ్డి నేతృత్వంలో కోర్ సిటీతో పాటు సెమీ అర్బన్, గ్రామీణ ప్రాంతాలకు కూడా సమగ్ర అభివృద్ధి కల్పించే దిశగా H-CITI ప్రాజెక్టు రూపుదిద్దుకుంటోంది.

రాబోయే 25 ఏళ్ల అవసరాలకు అనుగుణంగా ప్రణాళికలు

నగర జనాభా వేగంగా పెరుగుతున్న నేపథ్యంలో, రాబోయే 25 సంవత్సరాల అవసరాలు దృష్టిలో పెట్టుకొని ప్రత్యేక ప్రణాళికలు రూపొందించాలని సీఎం అధికారులను ఆదేశించారు. ముఖ్యంగా ఔటర్ రింగ్ రోడ్ (ORR) లోపల ఉన్న కోర్ అర్బన్ రీజియన్ అభివృద్ధికి ప్రత్యేక పాలసీ అవసరమని పేర్కొన్నారు.

పరిశుభ్రత, రోడ్లు, నీటి సరఫరా, మెట్రో కనెక్టివిటీపై దృష్టి

తాగునీటి సరఫరా, డ్రైనేజ్ సిస్టమ్, రోడ్ల విస్తరణ, మెట్రో కనెక్టివిటీ, ఎలివేటెడ్ కారిడార్లు వంటి మౌలిక సదుపాయాలపై పూర్తి ప్రణాళిక రూపొందించాలని ముఖ్యమంత్రి అధికారులను ఆదేశించారు. గల్ఫ్ దేశాలను తలపించే స్థాయిలో హైదరాబాద్‌ను అభివృద్ధి చేయాలన్నదే లక్ష్యంగా ప్రభుత్వం ముందుకు సాగుతోంది.

అసంపూర్తి పనులకు ముగింపు.. పారిశుధ్యంపై కఠిన దృష్టి

ప్రస్తుతం GHMC పరిధిలో సాగుతున్న తాగునీటి, సీవరేజ్ ప్లాంట్ల పనుల పురోగతిని సీఎంకు అధికారులు వివరించారు. అసంపూర్తిగా ఉన్న పనులను త్వరితగతిన పూర్తి చేయాలని స్పష్టంగా ఆదేశించారు. ప్రత్యేకంగా వర్షాకాలంలో డెంగ్యూ, చికున్ గున్యా లాంటి సీజనల్ వ్యాధుల నివారణకు ముందస్తు చర్యలు తీసుకోవాలని సూచించారు.

సమీక్షలో కీలక నిర్ణయాలు

మున్సిపల్, పట్టణాభివృద్ధి శాఖలతో జరిగిన సమీక్షలో, కోర్ అర్బన్, సెమీ అర్బన్, రూరల్ ఏరియాలపై స్పష్టమైన అభివృద్ధి విధానాన్ని రూపొందించేందుకు దిశానిర్దేశం చేశారు. H-CITI ప్రాజెక్టు తెలంగాణలో నగరాభివృద్ధికి ముఖ్య కేంద్రంగా మారనుందని తెలుస్తోంది.