Pet dog: ఇంటి శునకాలపై కఠిన నియమాలు.. 10 మంది పొరుగువాళ్ల సమ్మతిపత్రం తప్పనిసరి!

Pet dog: పెంపుడు జంతువులపై ప్రేమ కలిగినవారికి ఇది షాక్‌లాంటి వార్తే! గుజరాత్‌లోని సూరత్‌ మున్సిపల్‌ కార్పొరేషన్‌ (SMC) తాజాగా శునకాల పెంపకంపై కఠిన నిబంధనలు విధించింది. బహుళ అంతస్తుల భవనాల్లో లేదా రెసిడెన్షియల్‌ అపార్ట్‌మెంట్‌లలో కుక్కను పెంచాలంటే కనీసం 10 మంది పొరుగువారిలో నుంచి నిరభ్యంతర పత్రం (NOC) తీసుకోవాల్సిందేనని ఆదేశాలు జారీ చేసింది.

అంతే కాదు, సమాచార సంఘాల ఛైర్‌పర్సన్‌, కార్యదర్శుల అనుమతి కూడా తప్పనిసరి అని పేర్కొంది. మున్సిపల్‌ అధికారులు వెల్లడించిన వివరాల ప్రకారం, గత మే నెలలో ఓ చిన్నారి కుక్క దాడిలో ప్రాణాలు కోల్పోవడంతో ఈ విధంగా నిర్ణయం తీసుకోవాల్సి వచ్చిందని తెలిపారు.

పెంపుడు శునకాల యజమానులు తమ జంతువులను నియంత్రణలో ఉంచకపోవడం, భద్రతా లోపాలు వంటి అంశాలపై సూరత్‌ వాసుల్లో ఆందోళన పెరిగిందని అధికారులు వివరించారు. దీంతో ప్రజల హితాన్ని దృష్టిలో ఉంచుకుని ఈ కొత్త నిబంధనలు అమలులోకి తీసుకువచ్చినట్లు తెలిపారు.

ఇకపై శునకాలను ఇళ్లలో పెంచుకునే వారు స్థానిక మున్సిపల్‌ కార్యాలయంలో అనుమతి కోసం దరఖాస్తు చేసుకోవాలి. దరఖాస్తుతో పాటు 10 మంది పొరుగువారి ఎన్‌ఓసీని సమర్పించాల్సి ఉంటుంది. ఇదే సమయంలో బిల్డింగ్‌ సంక్షేమ సంఘం అధికారుల నుండి కూడా లిఖిత పత్రం పొందాలి.

ఈ నిర్ణయంపై ఇప్పటికే సామాజిక మాధ్యమాల్లో చర్చ జోరుగా నడుస్తోంది. కొన్ని వర్గాలు దీన్ని ప్రజల భద్రతకు మేలు చేస్తుందంటూ అభినందిస్తుండగా, మరికొందరు ఇది పెంపుడు జంతు ప్రేమికుల హక్కులపై దాడిగా అభిప్రాయపడుతున్నారు.