Vijay Devarakonda: రౌడీ హీరో ఆశ‌ల‌న్నీ ఆ సినిమాపైనే.. హిట్టు కొట్టేనా

Vijay Devarakonda: టాలీవుడ్‌లో స్టార్ హీరోగా కొనసాగుతున్న విజయ్ దేవరకొండ ఈసారి ఎలా అయినా సక్సెస్ అందుకోవాలని కసిగా ఉన్నారు. వరుసగా విడుదలైన ఆయన సినిమాలు ఆశించిన స్థాయిలో ఫలితం ఇవ్వకపోవడంతో, రాబోతున్న యాక్షన్ స్పై థ్రిల్లర్‌ ‘కింగ్డమ్’పైనే ఆయన భారీ ఆశలు పెట్టుకున్నారు. ఇప్పటికే ఈ సినిమాపై అభిమానుల్లో మంచి అంచనాలు నెలకొన్నాయి.

విజయ్ చివరి అయిదు సినిమాల ట్రాక్ రికార్డ్ చూస్తే, 'డియర్ కామ్రేడ్' మిశ్రమ స్పందన పొందింది. ‘వరల్డ్ ఫేమస్ లవర్’, ‘లైగర్’ చిత్రాలు భారీ అపజయాలను చవిచూశాయి. ‘ఖుషి’ సినిమా మాత్రం కాస్త పాజిటివ్ టాక్‌తో విజయ్‌కు ఊరటనిచ్చింది. ఇటీవల విడుదలైన ‘ది ఫ్యామిలీ స్టార్’ కూడా కమర్షియల్‌గా ఫెయిలయింది. ఈ నేపథ్యంలో, విజయ్ ఫ్యాన్స్‌కు ‘కింగ్డమ్’ చిత్రం చాలా కీలకంగా మారింది.

‘జెర్సీ’ లాంటి హిట్ అందించిన దర్శకుడు గౌతమ్ తిన్ననూరి దర్శకత్వంలో తెరకెక్కుతున్న ‘కింగ్డమ్’ స్పై థ్రిల్లర్‌గా రూపొందుతోంది. ఇందులో విజయ్ దేవరకొండ సరసన భాగ్యశ్రీ బోర్స్లే నటిస్తుండగా, సత్యదేవ్ ముఖ్య పాత్రలో కనిపించనున్నాడు. సితార ఎంటర్‌టైన్‌మెంట్స్, ఫార్చూన్ ఫోర్ క్రియేషన్స్ సంస్థలు రూ.110 కోట్ల భారీ బడ్జెట్‌తో ఈ సినిమాను నిర్మిస్తున్నాయి. మ్యూజిక్ డైరెక్టర్‌గా అనిరుధ్ రవిచంద్రన్ పని చేస్తున్నారు. మే 30న ఈ సినిమా థియేటర్లలో విడుదల కాబోతోంది.

ఇదిలా ఉంటే విజయ్ దేవరకొండ కెరీర్‌ను మలుపు తిప్పిన చిత్రం ‘పెళ్లి చూపులు’. ఈ సినిమాను తెరకెక్కించిన దర్శకుడు తరుణ్ భాస్కర్‌ మొదటి సినిమాతోనే నేషనల్ అవార్డు గెలుచుకున్నారు. అప్పటినుంచి వీరిద్దరూ మళ్లీ కలిసి సినిమా చేయలేదు. తాజాగా ఈ హిట్ కాంబో మళ్లీ రిపీట్ కాబోతోందన్న టాక్ వినిపిస్తోంది. ‘బినామీ’ అనే టైటిల్‌తో ఈ సినిమా రూపొందనుండగా, గీతా ఆర్ట్స్ బ్యానర్‌పై అల్లు అరవింద్ దీన్ని నిర్మించనున్నట్లు సమాచారం.

విజయ్ దేవరకొండ కెరీర్‌లో 'పెళ్లి చూపులు', 'అర్జున్ రెడ్డి', 'గీతా గోవిందం' వంటి మూడు సినిమాలు మాత్రమే పెద్ద హిట్లు అందించాయి. మిగతా చిత్రాలన్నీ ఆశించిన స్థాయిలో విజయాన్ని సాధించలేకపోయాయి. అందుకే ఈసారి ఎలాగైనా హిట్ కొట్టాలని విజయ్ గట్టిగా ప్రయత్నిస్తున్నారు. గౌతమ్ తిన్ననూరి దర్శకత్వంలో తెరకెక్కుతున్న ‘కింగ్డమ్’ మూవీతో విజయ్ మళ్లీ ఫామ్‌లోకి వస్తాడా? అన్నది అభిమానుల్లో ఆసక్తిగా మారింది.