Triber Facelift: మారుతి ఎర్టిగాకు గట్టి షాక్.. త్వరలో మార్కెట్లోకి చవకైన 7-సీటర్ కారు

Triber Facelift : రెనాల్ట్ ఇండియా జూలై 23న భారత్‌లో అత్యంత చవకైన 7-సీటర్ కారు అయిన ట్రైబర్ ఫేస్‌లిఫ్ట్ మోడల్‌ను విడుదల చేయనుంది. ఈ మోడల్‌ను చాలా కాలంగా టెస్ట్ చేస్తున్నారు. దీని గురించి ఇప్పటికే కొన్ని ఆసక్తికరమైన వివరాలు బయటకు వచ్చాయి. ఇప్పుడు దీని డిజైన్‌లో అనేక మార్పులు వచ్చే అవకాశం ఉంది. స్పై చిత్రాల ప్రకారం అప్‌డేటెడ్ ట్రైబర్‌లో కొత్త డిజైన్ గ్రిల్ ఉంటుంది. దీనిపై రెనాల్ట్ కొత్త లోగో ఉంటుంది. హెడ్‌ల్యాంప్స్‌ను కూడా మార్చారు. వాటి పై అంచున సన్నని LED స్ట్రిప్ ఉంటుంది. ఫాగ్ ల్యాంప్ క్లస్టర్‌లను కూడా కొత్త ప్లేసులో అమర్చారు. ముందు బంపర్‌లో ఇప్పుడు పెద్ద ఎయిర్ డామ్ లభిస్తుంది.

కారు సైడ్ ప్రొఫైల్‌లో కూడా మార్పులు ఉండవచ్చు, కొత్త డిజైన్ అల్లాయ్ వీల్స్ కనిపించవచ్చు. వెనుక భాగంలో ఎంపీవీలో కొత్త LED టెయిల్‌లైట్ సిగ్నేచర్, కొత్త బంపర్ ఉండవచ్చు. కొత్త రెనాల్ట్ ట్రైబర్‌లో సైజు పరంగా ఎటువంటి మార్పు ఉండదు. ప్రస్తుత మోడల్ 3,990 మిమీ పొడవు, 1,739 మిమీ వెడల్పు, 1,643 మిమీ ఎత్తు ఉంటుంది. దీని వీల్‌బేస్ 2,636 మిమీ.

క్యాబిన్ లోపల చాలా తక్కువ మార్పులు ఉంటాయని అంచనా. 2025 రెనాల్ట్ ట్రైబర్ ఫేస్‌లిఫ్ట్‌లో కొత్త ఇంటీరియర్ థీమ్, మరింత సాఫ్ట్-టచ్ మెటీరియల్, కొత్త సీట్ల కవరింగ్ ఇవ్వొచ్చు. ఇంజిన్ విషయానికి వస్తే, అప్‌డేటెడ్ ట్రైబర్‌లో ప్రస్తుతం ఉన్న 1.0L, 3-సిలిండర్ నాచురల్లీ ఆస్పిరేటెడ్ పెట్రోల్ ఇంజిన్ మాత్రమే లభిస్తుంది. ఈ ఇంజిన్ 72bhp పవర్, 96Nm టార్క్‌ను ఉత్పత్తి చేస్తుంది. ట్రాన్స్‌మిషన్ ఆప్షన్లలో 5-స్పీడ్ మాన్యువల్, 5-స్పీడ్ AMT ఉన్నాయి.

రెనాల్ట్ ఐకానిక్ డస్టర్ మోడల్ 2026లో తిరిగి రానుంది. ఈ ఎస్‌యూవీలో పెద్ద కాస్మెటిక్ మార్పులు, కొత్త ఫీచర్లు, కొత్త హైబ్రిడ్ పవర్‌ట్రెయిన్ లభిస్తాయి. కొత్త డస్టర్ తర్వాత 6 నుండి 12 నెలల్లో దీని త్రీ-రో (7-సీటర్) వెర్షన్ కూడా వస్తుంది. ఈ రెండు ఎస్‌యూవీలు ఒకే ప్లాట్‌ఫామ్, ఇంజిన్, ఫీచర్లు, డిజైన్‌ను షేర్ చేసుకుంటాయి. కంపెనీ రాబోయే నెలల్లో కైగర్ సబ్‌కాంపాక్ట్ ఎస్‌యూవీని కూడా అప్‌డేట్ చేస్తుంది. అయితే దీని అధికారిక లాంచ్ డేట్ ఇంకా ఖరారు కాలేదు.