ప్రస్తుతం ఉల్లిపాయల ధర వినియోగదారులకు కన్నీరు తెప్పిస్తోంది. కేజీ ఉల్లి రూ.100 వరకు పెట్టి కొనాల్సిన పరిస్థితి. ప్రభుత్వం ఏర్పాటు చేసిన సబ్సిడీ కేంద్రాల్లో ఒకరికి ఒక కేజీ మాత్రమే విక్రయిస్తున్నారు. దీంతో ఎక్కువమొత్తంలో కావలసిన వారు అధిక ధర వెచ్చించి కొంటున్నారు. ఉల్లిపాయ ధరల పెరుగుదలకు వ్యతిరేకంగా నిరసన కొత్త మార్గంలో పయనిస్తోంది, విశాఖపట్నం దక్షిణ ఎమ్మెల్యే వాసుపల్లి గణేష్ కుమార్ ఉల్లిపాయలను రూ .75 కు కొనుగోలు చేసి, కిలోకు రూ .25 కి వినియోగదారులకు విక్రయిస్తున్నారు. కూరగాయల ధర పెరుగుతూనే ఉండటంతో, వినియోగదారుల కోసం ధరను తగ్గించడంలో రాష్ట్ర ప్రభుత్వం విఫలమైందని ఎమ్మెల్యే అసంతృప్తి వ్యక్తం చేశారు. ఈ సందర్భంగా ఎమ్మెల్యే మాట్లాడుతూ, రోజూ 300 కుటుంబాలకు సబ్సిడీ రేట్లతో అందిస్తోన్నట్టు చెప్పారు.
తాను ఉల్లిపాయలను హోల్‌సేల్ మార్కెట్ నుండి కిలోకు 75 రూపాయలకు కొనుగోలు చేసి.. వాటిని కిలోకు 25 రూపాయలకు విక్రయిస్తున్నట్టు చెప్పారు. రైతు బజార్లలో సబ్సిడీ రేట్లతో లభించే పరిమాణం వినియోగదారులకు సరిపోని కారణంగా తాను ఈ నిర్ణయం తీసుకున్నట్టు చెప్పారు. ఇది చిన్న సహకారమే అయినప్పటికీ పేద వాళ్ళకోసం తనవంతు సహాయం అని గణేష్ కుమార్ అన్నారు. సబ్సిడీ ఉల్లిపాయలను కింగ్ జార్జ్ హాస్పిటల్ కు సమీపంలో వినియోగదారులకు అందుబాటులో ఉంచారు ఎమ్మెల్యే .