Bhimavaram: నాకో నిబంధనలకు తూట్లు 'దిశ లెడ్' సంస్థలో అక్రమాల దందా!

Bhimavaram: ఉమ్మడి పశ్చిమగోదావరి జిల్లాలో నేషనల్ ఎయిడ్స్ కంట్రోల్ ఆర్గనైజేషన్ (NACO) ఆధ్వర్యంలో పనిచేస్తున్న 'Disha led' (Disha led) సంస్థ నిర్వాకంపై తీవ్ర విమర్శలు వస్తున్నాయి. హెచ్ఐవి బాధితులకు అండగా ఉండాల్సిన, ప్రజల్లో అవగాహన కల్పించాల్సిన ఈ సంస్థలో బాధ్యతాయుతమైన అధికారులే అక్రమాలకు పాల్పడుతున్నారనే ఆరోపణలు వెల్లువెత్తుతున్నాయి.

బంధుప్రీతి, విధులకు గైర్హాజరు

ఏలూరు కేంద్రంగా పనిచేస్తున్న ఈ కార్యాలయంలో డిఆర్పి (DRP) గా విధులు నిర్వహిస్తున్న ఒక వ్యక్తి నిబంధనలను తుంగలో తొక్కి తన బంధువులకే పెద్దపీట వేసి ఉద్యోగాలు కట్టబెట్టినట్లు సమాచారం. అర్హులైన వారికి అవకాశం ఇవ్వకుండా కేవలం బంధుప్రీతితో నియమించబడిన ఈ సిబ్బంది విధులకు సక్రమంగా హాజరుకాకుండా ఇష్టానుసారంగా వ్యవహరిస్తున్నారు.

క్షేత్రస్థాయిలో హెచ్ఐవి పట్ల అవగాహన కార్యక్రమాలు నిర్వహించాల్సిన ఉద్యోగులు కార్యాలయానికి డుమ్మా కొడుతూ, ఎలాంటి పనులు చేయకుండానే జీతాలు స్వాహా చేస్తున్నారనే ఆరోపణలు బలంగా వినిపిస్తున్నాయి.

టెస్టుల కొనుగోలు, దొంగ బిల్లుల దందా

నాకో మార్గదర్శకాల ప్రకారం క్షేత్రస్థాయిలో నిర్వహించాల్సిన హెచ్ఐవి పరీక్షలను గాలికొదిలేశారనే విమర్శలున్నాయి. నిబంధనల ప్రకారం టెస్టులు నిర్వహించకుండా, ఏఆర్టి (ART) సెంటర్ల వద్ద అక్రమ మార్గాల్లో టెస్టులను కొనుగోలు చేస్తూ ఉన్నతాధికారులను, నాకో సంస్థను మోసం చేస్తున్నట్లు తెలుస్తోంది.

క్షేత్రస్థాయి సిబ్బందికి నిర్వహించే సమావేశాల సమయంలో కనీస వసతులు, భోజన సౌకర్యాలు కల్పించకుండానే అన్నీ సమకూర్చినట్లుగా నకిలీ (దొంగ) బిల్లులు సృష్టించి ప్రభుత్వ నిధులను స్వాహా చేస్తున్నట్లు ఆరోపణలు వస్తున్నాయి.

హెచ్ఐవి బాధితుల సంక్షేమం, నిర్మూలన కోసం కోట్ల రూపాయల నిధులు వెచ్చిస్తున్న ప్రభుత్వ లక్ష్యానికి ఈ సంస్థ అధికారుల తీరు తూట్లు పొడుస్తోంది. ఇప్పటికైనా సంబంధిత ఉన్నతాధికారులు స్పందించి, ఉమ్మడి పశ్చిమగోదావరి జిల్లాలోని Disha led కార్యాలయంపై సమగ్ర విచారణ జరిపితేనే అసలు నిజాలు బయటపడే అవకాశం ఉంది.