Mahabubabad: మహబూబాబాద్ జిల్లా గూడూరులో బీజేపీ నాయకుల విలేకరుల సమావేశం

Mahabubabad: గూడూరు మండల కేంద్రంలో భారతీయ జనతా పార్టీ మండల అధ్యక్షులు రసమల్ల వెంకటేశ్వర్లు, రాష్ట్ర నాయకులు రాంబాబు నాయక్ ల ఆధ్వర్యంలో మంగళవారం విలేకరుల సమావేశం నిర్వహించారు. ఈ సందర్భంగా వారు మాట్లాడుతూ... దేశంలో చేపడుతున్న 'సేవా సంకల్ప అభియాన్', అలాగే ప్రధానమంత్రి నరేంద్ర మోదీ సుపరిపాలనకు 25 సంవత్సరాలు పూర్తయిన సందర్భాన్ని పురస్కరించుకుని ప్రత్యేక కార్యక్రమాలు చేపడుతున్నట్లు తెలిపారు. ప్రధాని మోదీ జన్మదినం సందర్భంగా నిర్వహించనున్న వివిధ సేవా కార్యక్రమాల వివరాలను వారు ఈ సమావేశంలో వెల్లడించారు.

తహసీల్దార్‌కు వినతిపత్రం సమర్పణ

అదేవిధంగా, సెప్టెంబర్ 17న నిర్వహించే తెలంగాణ విమోచన దినోత్సవాన్ని రాష్ట్ర ప్రభుత్వం అధికారికంగా జరపాలని బీజేపీ నాయకులు డిమాండ్ చేశారు. విమోచన దినోత్సవ ప్రాముఖ్యతను, దానిని ప్రభుత్వం అధికారికంగా పాటించాల్సిన ఆవశ్యకతను వివరిస్తూ గూడూరు మండల తహసీల్దార్‌కు వినతిపత్రాన్ని అందజేశారు. ప్రభుత్వం వెంటనే స్పందించి 17న అధికారిక వేడుకలు నిర్వహించేలా తగిన చర్యలు తీసుకోవాలని కోరారు.

ఈ కార్యక్రమంలో బీజేపీ జిల్లా కౌన్సిల్ మెంబర్ మెరుగు మల్లయ్య గౌడ్, జిల్లా నాయకులు పడాల నాగరాజు, మండల ప్రధాన కార్యదర్శి అనిల్, గిరిజన మోర్చా మండల అధ్యక్షులు దేవేందర్, నాయకులు గుండెబోయిన మల్లేష్, బాల్సుకూరి సంపత్, బూత్ అధ్యక్షులు శ్రీనివాస్, శాంతమ్మ, హరిదాసు, రమేష్‌తో పాటు పలువురు బీజేపీ నాయకులు, కార్యకర్తలు పాల్గొన్నారు.