Bhupalpally: ఆస్పత్రిలో విధుల్లో రీల్స్.. రోగులపై నర్సుల దురుసు ప్రవర్తన!

Bhupalpally: ప్రభుత్వ ఆస్పత్రుల్లో పేదలకు నాణ్యమైన వైద్యం అందించాల్సిన సిబ్బంది తీరుపై భూపాలపల్లి వంద పడకల ఆస్పత్రిలో తీవ్ర ఆరోపణలు వినిపిస్తున్నాయి. ఆస్పత్రికి చికిత్స కోసం వచ్చే రోగుల పట్ల కొందరు స్టాఫ్ నర్సులు దురుసుగా వ్యవహరిస్తున్నారని, వైద్యులు సూచనలు చేసినా పట్టించుకోకుండా విధుల సమయంలో సెల్‌ఫోన్లలో రీల్స్ చూస్తూ కాలయాపన చేస్తున్నారంటూ రోగులు, వారి బంధువులు ఆవేదన వ్యక్తం చేస్తున్నారు.

ముఖ్యంగా ఎమర్జెన్సీ వార్డులో పరిస్థితి మరింత దారుణంగా ఉందని రోగుల బంధువులు ఆరోపిస్తున్నారు. ప్రాణాపాయ స్థితిలో ఆస్పత్రికి వచ్చే రోగులకు తక్షణ వైద్యం, సిబ్బంది స్పందన అత్యంత కీలకమైనప్పటికీ, కొందరు సిబ్బంది నిర్లక్ష్యంగా వ్యవహరిస్తున్నారని వారు వాపోతున్నారు. అత్యవసర సమయంలో సిబ్బంది అందుబాటులో లేకపోవడం, ప్రశ్నించిన రోగుల బంధువులతో దురుసుగా మాట్లాడటం వంటి ఘటనలు ఆందోళన కలిగిస్తున్నాయని చెబుతున్నారు.

ప్రభుత్వ ఆస్పత్రి అంటే పేదలు, సామాన్య ప్రజలకు ప్రధాన ఆధారం. అలాంటి చోట రోగుల పట్ల నిర్లక్ష్యం లేదా అమర్యాదకర ప్రవర్తనకు తావుండకూడదని ప్రజలు అంటున్నారు. విధి సమయంలో సిబ్బంది సెల్‌ఫోన్ల వినియోగం, రోగుల పట్ల వ్యవహరిస్తున్న తీరుపై ఆస్పత్రి ఉన్నతాధికారులు ఆకస్మిక తనిఖీలు నిర్వహించి వాస్తవాలను పరిశీలించాలని కోరుతున్నారు.

ఇటీవలే బాధ్యతలు చేపట్టిన ఆస్పత్రి సూపరింటెండెంట్ ఈ వ్యవహారంపై ప్రత్యేక దృష్టి సారించి, రోగుల నుంచి ఫిర్యాదులు స్వీకరించి విచారణ జరిపించాలని ప్రజలు డిమాండ్ చేస్తున్నారు. ఆరోపణలు నిజమని తేలితే బాధ్యులైన సిబ్బందిపై కఠిన చర్యలు తీసుకోవడంతో పాటు, ఎమర్జెన్సీ సేవల్లో నిర్లక్ష్యానికి ఏమాత్రం అవకాశం లేకుండా పర్యవేక్షణ వ్యవస్థను పటిష్టం చేయాలని కోరుతున్నారు.

రోగి ప్రాణం కంటే రీల్స్ ముఖ్యమా? అన్న ప్రశ్న ఇప్పుడు భూపాలపల్లి వంద పడకల ఆస్పత్రి తీరుపై ప్రజల్లో వినిపిస్తోంది. అధికారులు స్పందించి వాస్తవాలను వెలుగులోకి తీసుకురావాలని ప్రజలు కోరుతున్నారు.