Gurla: వెంకటరమణ భౌతికకాయానికి నివాళులర్పించిన కిమిడి రామ్ మల్లిక్ నాయుడు

గుర్ల: గుర్ల మండలం భూపాలపురం గ్రామానికి చెందిన కానిస్టేబుల్ శీర వెంకటరమణ నిన్న ప్రమాదవశాత్తు మృతి చెందడంతో ఆయన కుటుంబంలో విషాదఛాయలు అలుముకున్నాయి. ఈ విషయం తెలుసుకున్న టీడీపీ రాష్ట్ర కార్యనిర్వాహక కార్యదర్శి శ్రీ కిమిడి రామ్ మల్లిక్ నాయుడు గారు భూపాలపురం గ్రామానికి వెళ్లి వెంకటరమణ కుటుంబ సభ్యులను పరామర్శించారు.

ఈ సందర్భంగా వెంకటరమణ భౌతికకాయానికి పూలమాల వేసి ఘనంగా నివాళులు అర్పించారు. పోలీసు శాఖలో కానిస్టేబుల్‌గా విధులు నిర్వహిస్తూ ప్రజలకు సేవలందించిన వెంకటరమణ అకాల మరణం అత్యంత బాధాకరమని ఆవేదన వ్యక్తం చేశారు.

అనంతరం కుటుంబ సభ్యులతో మాట్లాడి వారి పరిస్థితిని తెలుసుకున్నారు. ఈ కష్టకాలంలో కుటుంబానికి ధైర్యం చెప్పారు. ఆప్తుడిని కోల్పోయిన బాధను మాటల్లో చెప్పలేమని, వెంకటరమణ కుటుంబానికి టీడీపీ నాయకులు, కార్యకర్తలు అండగా ఉంటారని భరోసా ఇచ్చారు.

ప్రజల భద్రత కోసం విధులు నిర్వహించే పోలీసు సిబ్బంది సేవలు ఎంతో విలువైనవని, అలాంటి సేవాభావం కలిగిన వెంకటరమణను కోల్పోవడం ఆయన కుటుంబానికే కాకుండా గ్రామానికి కూడా తీరని లోటని పేర్కొన్నారు.

వెంకటరమణ కుటుంబానికి ప్రభుత్వం, సంబంధిత శాఖల ద్వారా అందాల్సిన సహాయం, సంక్షేమ ప్రయోజనాలు సకాలంలో అందేలా కృషి చేస్తామని తెలిపారు. కుటుంబ సభ్యులు ఎలాంటి ఆందోళనకు గురికావద్దని, తమకు సాధ్యమైనంత మేరకు అండగా నిలుస్తామని హామీ ఇచ్చారు.

ఈ కార్యక్రమంలో ఆయన వెంట టీడీపీ నాయకులు, కార్యకర్తలు పాల్గొని వెంకటరమణకు నివాళులు అర్పించి, కుటుంబ సభ్యులకు సానుభూతి తెలిపారు. శీర వెంకటరమణ ఆత్మకు శాంతి చేకూరాలని, ఆయన కుటుంబ సభ్యులకు ఈ విషాదాన్ని తట్టుకునే మనోధైర్యాన్ని భగవంతుడు ప్రసాదించాలని ప్రార్థించారు.