Devarapalli: ప్రభుత్వ బడుల్లో పెరిగిన చేరికలు అభినందనీయం: సుబ్బరాజు!

తూర్పు గోదావరి జిల్లా: దేవరపల్లి మండలం యర్నగూడెం ప్రభుత్వ పాఠశాలల్లో విద్యార్థుల చేరికలు పెరగడం అభినందనీయం: సొసైటీ అధ్యక్షులు పెన్మెత్స సుబ్బరాజు

యర్నగూడెం: ప్రైవేట్, కార్పొరేట్ పాఠశాలల నుంచి ప్రభుత్వ పాఠశాలల్లో విద్యార్థుల చేరికలు గణనీయంగా పెరగడం ప్రభుత్వ విద్యా వ్యవస్థపై ప్రజల్లో పెరుగుతున్న నమ్మకానికి నిదర్శనమని యర్నగూడెం శ్రీ వేణుగోపాల సొసైటీ అధ్యక్షులు పెన్మెత్స సుబ్బరాజు అన్నారు. యర్నగూడెం గ్రామంలోని శ్రీ బొల్లిన గంగరాజు జడ్పీ హైస్కూల్‌లో నిర్వహించిన మెగా పేరెంట్-టీచర్ మీటింగ్ (మెగా పీటీఎం) కార్యక్రమానికి ఆయన ముఖ్య అతిథిగా హాజరై మాట్లాడారు.

ఈ సందర్భంగా ఆయన మాట్లాడుతూ, రాష్ట్రంలోని కూటమి ప్రభుత్వం విద్యకు అత్యున్నత ప్రాధాన్యత ఇస్తూ ప్రభుత్వ పాఠశాలల్లో మౌలిక వసతుల అభివృద్ధి, నాణ్యమైన బోధన, డిజిటల్ విద్య, విద్యార్థుల సంక్షేమ పథకాల అమలుపై ప్రత్యేక దృష్టి సారిస్తోందన్నారు. విద్యార్థుల విద్యా పురోగతిని తల్లిదండ్రులకు తెలియజేయడం, వారి సమస్యలను తెలుసుకోవడం, ఉపాధ్యాయులు-తల్లిదండ్రుల మధ్య సమన్వయాన్ని పెంపొందించడం కోసం మెగా పేరెంట్-టీచర్ మీటింగ్స్ ఎంతో ఉపయోగకరంగా నిలుస్తున్నాయని పేర్కొన్నారు.

'తల్లికి వందనం' పథకం ద్వారా ప్రతి కుటుంబానికి ప్రభుత్వం ఆర్థికంగా అండగా నిలుస్తోందన్నారు. యర్నగూడెం గ్రామంలోని 949 మంది విద్యార్థుల తల్లుల బ్యాంకు ఖాతాల్లో ఒక్కొక్కరికి రూ.13 వేల చొప్పున మొత్తం రూ.1.23 కోట్లకు పైగా జమ చేసినట్లు తెలిపారు. ఈ పథకం వల్ల విద్యార్థుల చదువుకు అవసరమైన ఖర్చులు భరించేందుకు కుటుంబాలకు ఎంతో ఊరటనిస్తోందని చెప్పారు.

ప్రభుత్వ పాఠశాలల్లో ప్రస్తుతం నాణ్యమైన విద్యతో పాటు ఆధునిక సౌకర్యాలు, నైపుణ్యాభివృద్ధి కార్యక్రమాలు, క్రీడలు, సాంస్కృతిక కార్యక్రమాలకు కూడా ప్రాధాన్యత ఇస్తున్నారని తెలిపారు. అందువల్ల తల్లిదండ్రులు ప్రభుత్వ పాఠశాలలపై విశ్వాసం ఉంచి తమ పిల్లలను అక్కడ చేర్పించడం ఆనందదాయకమని అన్నారు. విద్యార్థుల భవిష్యత్తు బాగుండాలంటే ఉపాధ్యాయులు, తల్లిదండ్రులు, సమాజం కలిసి బాధ్యతగా వ్యవహరించాలని సూచించారు.

ఈ కార్యక్రమంలో మాజీ ఎంపీపీ గద్దె వెంకటరామారావు, పాఠశాల కమిటీ చైర్మన్ బొంతా సోమరాజు, ప్రధానోపాధ్యాయులు ఉబ్బా చంద్రరావు, కూటమి నాయకులు, ఉపాధ్యాయులు, విద్యార్థుల తల్లిదండ్రులు, గ్రామ పెద్దలు మరియు పాఠశాల సిబ్బంది పాల్గొని కార్యక్రమాన్ని విజయవంతం చేశారు. మెగా పేరెంట్-టీచర్ మీటింగ్ ద్వారా విద్యార్థుల అభ్యాసం, క్రమశిక్షణ, వ్యక్తిత్వ వికాసంపై చర్చించడం అభినందనీయమని పలువురు అభిప్రాయపడ్డారు.