Makthal: మక్తల్ సివిల్ హాస్పిటల్‌లో ఘనంగా సేవా కార్యక్రమం!

Makthal: మానవత్వమే లక్ష్యంగా సోషల్ జస్టిస్ ఫర్ వరల్డ్ హ్యూమన్ రైట్స్ కౌన్సిల్ ఆధ్వర్యంలో మక్తల్ సివిల్ హాస్పిటల్‌లో సేవా కార్యక్రమం నిర్వహించారు. సంస్థ వ్యవస్థాపకులు, నేషనల్ చైర్మన్, ప్రముఖ హైకోర్టు న్యాయవాది డా. శ్రీ కొప్పుల విజయ్ కుమార్, తెలంగాణ రాష్ట్ర ఇన్‌చార్జి ఎండి. సాదిక్ అలీ ఆదేశాల మేరకు, మక్తల్ మండల చైర్మన్ ఎ. భగవాన్ ఆధ్వర్యంలో ఈ కార్యక్రమం జరిగింది.

ఈ సందర్భంగా ఆసుపత్రిలో చికిత్స పొందుతున్న రోగులు, వారి సహాయకులు, ఆసుపత్రి సిబ్బంది, ప్రజలు కలిపి సుమారు 200 మందికి పండ్లు, బ్రెడ్, బిస్కెట్లు, అల్పాహారం, పులిహోర పంపిణీ చేశారు. సేవా కార్యక్రమం ద్వారా ఆసుపత్రికి వచ్చిన వారికి ఆహారాన్ని అందించి మానవతా దృక్పథాన్ని చాటుకున్నారు.

కార్యక్రమానికి ముఖ్య అతిథిగా మక్తల్ టౌన్ ఏఎస్ఐ బి. సురేష్ కుమార్ హాజరయ్యారు. ఈ సందర్భంగా సోషల్ జస్టిస్ ఫర్ వరల్డ్ హ్యూమన్ రైట్స్ కౌన్సిల్ తెలంగాణ రాష్ట్ర ఇన్‌చార్జి ఎండి. సాదిక్ అలీ, ఏఎస్ఐ బి. సురేష్ కుమార్‌ను శాలువాతో ఘనంగా సన్మానించి గౌరవించారు.

ఈ సందర్భంగా ఎండి. సాదిక్ అలీ మాట్లాడుతూ మానవత్వంతో సేవ చేయడం, బాధితులకు అండగా నిలవడం, అవసరంలో ఉన్న వారికి చేతనైన సహాయం అందించడం తమ సంస్థ ప్రధాన లక్ష్యమని తెలిపారు. మానవ హక్కుల పరిరక్షణతో పాటు ప్రజల్లో చట్టాలు, హక్కులపై అవగాహన కల్పిస్తూ సామాజిక సేవా కార్యక్రమాలను నిరంతరం నిర్వహిస్తున్నామని చెప్పారు.

ఆసుపత్రుల్లో చికిత్స పొందుతున్న రోగులు, వారి కుటుంబ సభ్యులకు అందించే చిన్న సహాయం కూడా ఎంతో ధైర్యాన్ని, భరోసాను ఇస్తుందని పేర్కొన్నారు. డా. శ్రీ కొప్పుల విజయ్ కుమార్ మార్గదర్శకత్వంలో ప్రజల సమస్యల పరిష్కారానికి చట్టబద్ధంగా కృషి చేస్తూ “సేవే లక్ష్యం — మానవత్వమే మార్గం” అనే స్ఫూర్తితో సంస్థ ముందుకు సాగుతుందని తెలిపారు.

ఈ కార్యక్రమంలో మహబూబ్‌నగర్ టౌన్ చైర్మన్ ఎం. లక్ష్మీకాంత్, మహబూబ్‌నగర్ టౌన్ వైస్ చైర్మన్ వి. గిరిప్రసాద్, ఉట్కూరు టౌన్ చైర్మన్ శివ ప్రసాద్ తదితరులు పాల్గొని సేవా కార్యక్రమంలో తమ వంతు సహకారం అందించారు.

కార్యక్రమాన్ని విజయవంతం చేసిన సంస్థ సభ్యులు, ఆసుపత్రి సిబ్బంది, పోలీసు అధికారులు, సహకరించిన ప్రతి ఒక్కరికీ నిర్వాహకులు ప్రత్యేక కృతజ్ఞతలు తెలిపారు.