Anakapalle: అనకాపల్లిలో ఉత్సాహభరితంగా న్యాయవాదుల క్రికెట్ టోర్నీ!

అనకాపల్లి: అనకాపల్లి జిల్లాలో స్వాతంత్ర్య దినోత్సవ వేడుకల లో భాగంగా నిర్వహించిన న్యాయవాదుల క్రికెట్ టోర్నమెంట్ ఉత్సాహభరితంగా సాగింది. అనకాపల్లి బార్ అసోసియేషన్ ఆధ్వర్యంలో న్యాయమూర్తులు, న్యాయవాదులు, పోలీసులు, కోర్టు సిబ్బంది పాల్గొన్న ఈ టోర్నీ క్రీడాస్ఫూర్తిని ప్రతిబింబించింది.

అనకాపల్లిలోని ఏ.ఎం.ఏ.ఎల్. కళాశాల మైదానంలో నిర్వహించిన ఈ టోర్నీలో మొత్తం నాలుగు జట్లు పాల్గొనగా, మూడు మ్యాచ్‌లు ఆసక్తికరంగా జరిగాయి. ప్రతి జట్టు విజయం కోసం పోటాపోటీగా తలపడటంతో ప్రేక్షకులను అలరించాయి. చివరికి కే. ఈశ్వర్ రావు జట్టు అద్భుత ప్రతిభ కనబరిచి ప్రథమ స్థానాన్ని కైవసం చేసుకుంది.

ఈ కార్యక్రమానికి 10వ అదనపు జిల్లా న్యాయమూర్తి నరేష్, అడిషనల్ సబ్ కోర్టు జడ్జి రామకృష్ణ, మొదటి అదనపు తరగతి జూనియర్ సివిల్ జడ్జి రమేష్ హాజరై క్రీడాకారులను అభినందించారు. బార్ అసోసియేషన్ అధ్యక్షుడు వడ్డాది వెంకటరావు, కార్యదర్శి శివాచారి, ఉపాధ్యక్షుడు దివాకర్, స్పోర్ట్స్ సెక్రటరీ యుగంధర్‌తో పాటు పలువురు సీనియర్ న్యాయవాదులు కార్యక్రమంలో పాల్గొన్నారు.

న్యాయవాదులు, న్యాయమూర్తులు, పోలీసులు, కోర్టు సిబ్బంది ఒకే వేదికపై క్రీడాస్ఫూర్తితో పాల్గొనడం ఈ టోర్నమెంట్‌కు ప్రత్యేక ఆకర్షణగా నిలిచింది. స్వాతంత్ర్య దినోత్సవ వేడుకల్లో భాగంగా నిర్వహించిన ఈ క్రీడా పోటీలు న్యాయవర్గంలో ఐక్యత, స్నేహభావం, క్రీడాస్ఫూర్తిని మరింత బలోపేతం చేశాయని నిర్వాహకులు తెలిపారు.