Off The Record: సాలూరులో గ్రూప్ వార్!

Off The Record: ఉమ్మడి విజయనగరం జిల్లా సాలూరు రాజకీయాల్లో సీనియారిటీకి కొదవలేని, హ్యాట్రిక్ విజయాలతో దూసుకుపోయిన టీడీపీ నాయకుడు.. రాజేంద్ర ప్రతాప్ భంజ్‌దేవ్. తెలుగుదేశం పార్టీ ద్వారా రాజకీయాల్లోకి వచ్చిన భంజ్‌దేవ్ ఆ పార్టీలో వివిధ హోదాల్లో పని చేశారు.

1989లో సాలూరు నియోజకవర్గం నుంచి ఎమ్మెల్యేగా పోటీ చేసి ఓడిపోయారు. 1994, 1999, 2004లో జరిగిన అసెంబ్లీ ఎన్నికల్లో వరుసగా మూడుసార్లు ఎమ్మెల్యేగా గెలిచి హ్యాట్రిక్ విక్టరీ సాధించారు. 2009లో ఎన్నికల్లో పోటీ చేయలేదు. తిరిగి 2014, 2019 అసెంబ్లీ ఎన్నికల్లో వైసీపీ అభ్యర్థి పీడిక రాజన్నదొర చేతిలో ఓటమిపాలయ్యారు.

భంజ్‌దేవ్‌కు సుదీర్ఘ రాజకీయ చరిత్ర కలిగినప్పటికీ.. ప్రస్తుత పరిస్థితి కాలం కలిసి రాకపోతే కప్పకు కూడా కష్టాలే అన్నట్టుగా మారిందన్న చర్చ సాగుతోంది. ఎలాంటి విషయంలోనూ పెద్దగా జోక్యం చేసుకోకపోయినా.. ఎక్కడ తాడు లాగినా చివరికి ముడి తన మెడకే పడుతోందట.

ఇటీవల కాలంలో భంజదేవ్ రాజకీయంగా కాస్త సైలెంట్‌గానే ఉన్నారు. కానీ.. నోరు మూసుకున్నా పేరు మాత్రం బయటకు వస్తోందట. సొంత పార్టీలో కొందరు కావాలనే తనను ఇరుకున పెడుతున్నారని భంజదేవ్ వర్గం బావురుమంటోందట.

ఇంట్లో ఈగల మోత.. బయట పల్లకీ మోత అన్నట్టుగా.. ఒకవైపు పార్టీలో రాజకీయంగా ఇబ్బందులు, మరోవైపు బయట నుంచి ఆరోపణలు. భంజదేవ్‌కు రెండు వైపులా మోత మోగుతోందనే టాక్ రీసౌండ్ చేస్తోంది.

ఇక మంత్రి సంధ్యారాణి పీఏ సతీష్ ఆత్మహత్యాయత్నం వ్యవహారం కూడా భంజదేవ్ మెడకు చుట్టుకుందన్న ప్రచారం రాజకీయ వర్గాల్లో చర్చనీయాంశంగా మారింది. సూసైడ్ నోట్‌లో భంజదేవ్ పేరు ప్రస్తావనకు రావడం ఈ వ్యవహారానికి మరింత రాజకీయ రంగు పులుముకుంది.

అయితే.. ఆరోపణ వేరు.. ఆధారం వేరు అన్నది మర్చిపోకూడదు. ఈ వ్యవహారంలో భంజదేవ్ పాత్రపై అధికారికంగా తేలాల్సిన అంశాలు ఇంకా ఉన్నాయన్న చర్చ కూడా లేకపోలేదు. మరోవైపు.. మంత్రివర్గంలో మెప్పు పొందేందుకే కొందరు భంజదేవ్‌ను టార్గెట్ చేస్తున్నారన్న గుసగుసలు వినిపిస్తున్నాయి.

ఎందుకంటే.. భంజదేవ్, మంత్రి సంధ్యారాణి మధ్య రాజకీయ విభేదాలు కొత్తేమీ కాదన్నది సాలూరు రాజకీయాల్లో వినిపించే మాట. పుండు మీద కారం చల్లినట్టు.. ఇప్పటికే ఉన్న గ్యాప్‌ను కొందరు మరింత పెంచుతున్నారన్న ఆరోపణలు కూడా వస్తున్నాయి.

దీంతో.. ఒక వైపు పార్టీ నుంచి సపోర్ట్ కరువు.. మరోవైపు ఆరోపణల ఉచ్చు.. మధ్యలో భంజదేవ్ పరిస్థితి మాత్రం మింగలేక.. కక్కలేక అన్నట్టుగా మారిందట. తనను కావాలనే ఇరికిస్తున్నారని భంజదేవ్ బహిరంగంగానే చెబుతున్నట్లు తెలుస్తోంది.

మరి ఇది నిజంగానే రాజకీయంగా గొయ్యి తవ్వుతున్న వ్యవహారమా.. లేక మెప్పు కోసం వేసిన రాజకీయ ఎత్తుగడనా.. సాలూరు రాజకీయాల్లో మాత్రం.. ఎవరికి వారు పావులు కదుపుతుంటే.. భంజదేవ్ మాత్రం రాజకీయ చదరంగంలో చిక్కుకున్నారా అన్న చర్చ జోరుగా సాగుతోంది.