Tada: తడలో ప్రశాంతంగా వినాయక చవితి జరుపుకోవాలి: ఎస్సై కొండప్పనాయుడు

​తిరుపతి జిల్లా: తడ మండల ప్రజలందరూ రాబోయే వినాయక చవితి పండుగను ఎంతో భక్తిశ్రద్ధలతో, అత్యంత ప్రశాంతమైన వాతావరణంలో జరుపుకోవాలని స్థానిక సబ్ ఇన్స్పెక్టర్ (ఎస్సై) కె.కొండప్పనాయుడు ఆకాంక్షించారు. తడ మండలం అనేక భారీ పరిశ్రమలతో, నిరంతరం వాహనాల రాకపోకలు మరియు ప్రజల రద్దీతో కూడిన సున్నితమైన ప్రాంతం కావడం వల్ల, పండుగ సందర్భంగా ప్రజల రక్షణే ధ్యేయంగా విస్తృత భద్రతా చర్యలు చేపడుతున్నట్లు ఎస్సై వెల్లడించారు.

తిరుపతి జిల్లా ఎస్పీ ఎల్.సుబ్బారాయుడు జారీ చేసిన ఆదేశాలకు అనుగుణంగా, నాయుడుపేట డిఎస్పీ జి.చెంచుబాబు సలహాలు, మార్గదర్శకాల మేరకు, అలాగే సూళ్ళూరుపేట సర్కిల్ ఇన్స్పెక్టర్ ఎం.మురళీకృష్ణ ప్రత్యక్ష పర్యవేక్షణలో తడ పోలీసు యంత్రాంగం అంతా అప్రమత్తమై బలమైన బందోబస్తు ఏర్పాట్లు చేస్తోందని ఎస్సై వివరించారు.

​ఈ సందర్భంగా ఎస్సై కె. కొండప్పనాయుడు నేరుగా మాట్లాడుతూ పండుగ నిర్వాహకులకు, గ్రామస్తులకు పలు కీలక సూచనలు జారీ చేశారు.ముఖ్యంగా మండల పరిధిలోని వివిధ గ్రామాలు, కూడళ్లలో వినాయక విగ్రహాలను ఏర్పాటు చేయాలనుకునే ఉత్సవ కమిటీల ప్రతినిధులు తప్పనిసరిగా పోలీసు శాఖతో పాటు ఇతర సంబంధిత అధికారుల నుండి ముందస్తు అనుమతులు పొందాలని ఎస్సై కె. కొండప్పనాయుడు కచ్చితంగా ఆదేశించారు.

నియమనిబంధనలు పాటించకుండా ఇష్టారీతిన విగ్రహాలు ప్రతిష్టిస్తే చట్టపరమైన చర్యలు తప్పవని హెచ్చరించారు. అంతేకాకుండా, వేడుకల్లో లేదా విగ్రహాల నిమజ్జన ఊరేగింపుల్లో ఎలాంటి డీజే (DJ) సౌండ్ సిస్టమ్‌లను ఉపయోగించడానికి అనుమతి లేదని ఎస్సై కొండప్పనాయుడు స్పష్టం చేశారు. అధిక శబ్దాలతో ప్రజలకు, రోగులకు భంగం కలిగిస్తే సౌండ్ సిస్టమ్‌లను సీజ్ చేస్తామని తేల్చిచెప్పారు.

​పండుగ వేడుకల నెపంతో ఎక్కడా ఎలాంటి చిన్నపాటి గొడవలు, వివాదాలు లేదా శాంతిభద్రతల సమస్యలు తలెత్తకుండా స్థానిక ప్రజలంతా అత్యంత బాధ్యతాయుతంగా వ్యవహరించాలని ఎస్సై కొండప్ప నాయుడు పిలుపునిచ్చారు. చట్టాన్ని చేతుల్లోకి తీసుకునే వారిపై కఠినంగా వ్యవహరిస్తామని, ప్రజలకు ఏ క్షణంలోనైనా సాయం అందించేందుకు తడ పోలీసులు పూర్తి స్థాయిలో అందుబాటులో ఉంటారని ధైర్యం చెప్పారు.

మండలాన్ని ప్రశాంతంగా ఉంచడంలో మరియు పండుగను ప్రశాంత వాతావరణంలో విజయవంతం చేయడంలో ప్రజలందరూ పోలీసులకు పూర్తి స్థాయిలో సహకరించాలని ఎస్సై కె.కొండప్పనాయుడు ప్రత్యేకంగా కోరారు.