Mahesh Kumar Goud: "రాహుల్ గాంధీకి స్వార్థం ఉంటే అప్పుడే ప్రధాని అయ్యేవారు".. టీపీసీసీ చీఫ్ మహేష్ కుమార్ గౌడ్ ఆసక్తికర వ్యాఖ్యలు!

Mahesh Kumar Goud: ప్రస్తుత కాలంలో ప్రతి అంశంపైనా సోషల్ మీడియా (Social Media) ప్రభావం విపరీతంగా పెరిగిపోయిందని తెలంగాణ ప్రదేశ్ కాంగ్రెస్ కమిటీ (TPCC) అధ్యక్షుడు మహేష్ కుమార్ గౌడ్ అన్నారు. సమాజంలో మార్పు కోసం యువత సంకుచిత మనస్తత్వాన్ని వీడి.. విశాల దృక్పథంతో ముందుకు సాగాలని పిలుపునిచ్చారు. హైదరాబాద్‌లోని కాంగ్రెస్ పార్టీ ప్రధాన కార్యాలయం 'గాంధీ భవన్'లో సోమవారం ఏర్పాటు చేసిన మీడియా సమావేశంలో ఆయన మాట్లాడారు.

రాష్ట్ర, దేశ రాజకీయాల పట్ల యువత మంచి అవగాహన కలిగి ఉండాలని, సమాజ హితం కోరే విషయాలపై దృష్టి పెట్టాలని ఆయన సూచించారు. పార్టీ బలోపేతం మరియు యువత భాగస్వామ్యంపై కాంగ్రెస్ అగ్రనేత రాహుల్ గాంధీ (Rahul Gandhi) ఇచ్చిన మార్గదర్శకాలను మహేష్ కుమార్ గౌడ్ ఈ సందర్భంగా ప్రస్తావించారు.

"సమాజంలో మంచి విషయ పరిజ్ఞానం (Knowledge) ఉండి, ప్రజా సమస్యలపై గళమెత్తి బాగా మాట్లాడే అలవాటున్న యువతను, నాయకులను ఎల్లప్పుడూ ప్రోత్సహించాలని రాహుల్ గాంధీ మాకు చెప్పారు. నిరంతరం ప్రజల్లో ఉంటూ, వారి ఆలోచనలకు అనుగుణంగా పనిచేసేవారికే భవిష్యత్తు ఉంటుంది" అని టీపీసీసీ చీఫ్ పేర్కొన్నారు.

రాహుల్ గాంధీ నిస్వార్థ రాజకీయ ప్రస్థానాన్ని మహేష్ కుమార్ గౌడ్ కొనియాడారు. "రాహుల్ గాంధీకి గనుక పదవులపై ఆశ, స్వార్థం ఉండి ఉంటే.. యూపీఏ (UPA) ప్రభుత్వ హయాంలో 2004లో లేదా 2009లోనే ఆయన దేశ ప్రధాని అయ్యుండేవారు. ఆ అవకాశం వచ్చినా ఆయన పదవులను తిరస్కరించారు. రాహుల్ గాంధీకి పదవుల కంటే దేశ రక్షణ, ప్రజల బాధ్యతలే ముఖ్యమని భావించారు. అలాంటి గొప్ప త్యాగనిరతి ఉన్న నాయకుడి అడుగుజాడల్లో మేమంతా నడుస్తున్నాం" అని మహేష్ కుమార్ గౌడ్ స్పష్టం చేశారు.

సోషల్ మీడియాను కేవలం విమర్శల కోసమే కాకుండా.. దేశ నిర్మాణంలో, రాజకీయాల్లో సానుకూల మార్పుల కోసం యువత ఒక ఆయుధంగా వాడుకోవాలని ఈ సందర్భంగా ఆయన పిలుపునిచ్చారు.