BRS MLC: బీఆర్ఎస్‌కు బిగ్ షాక్..ఎమ్మెల్సీలపై వేటు!

BRS MLC: తెలంగాణ శాసనసభ, మండలి సమావేశాల రెండో రోజు రాజకీయ సమరం తీవ్రస్థాయికి చేరింది. సభా వేదికలు, కోర్టు హాళ్లు, చివరకు కేసీఆర్ ఫాంహౌస్ పరిసరాల వరకు ఉద్రిక్తతలు వ్యాపించి రాష్ట్ర రాజకీయాల్లో తీవ్ర కలకలం రేపాయి.

అసెంబ్లీ స్పీకర్‌ను ఉద్దేశించి బీఆర్ఎస్ ఎమ్మెల్సీ తాతా మధు చేసిన వ్యాఖ్యలు, శాసనసభ గేటు వద్ద పోలీసులపై మరో ఎమ్మెల్సీ నవీన్‌కుమార్‌రెడ్డి ప్రవర్తించిన తీరుపై సభ తీవ్ర ఆగ్రహం వ్యక్తం చేసింది. ఉప ముఖ్యమంత్రి మల్లు భట్టి విక్రమార్క, మంత్రులు సభలో ఈ వైఖరిని తీవ్రంగా ఖండించారు.

ప్రతిపక్ష నాయకుడు హరీశ్‌రావు ఈ వ్యవహారాన్ని ప్రశ్నించేందుకు ప్రయత్నించగా, స్పీకర్ గడ్డం ప్రసాద్‌కుమార్ తీవ్ర ఆవేదనతో ఆందోళన వ్యక్తం చేయడంతో సభలో కాంగ్రెస్, బీఆర్ఎస్ , బీజేపీ సభ్యుల మధ్య తీవ్ర వాగ్వాదం చోటుచేసుకుంది.

స్పీకర్ ఓఎస్డీ ఫిర్యాదుతో ఎస్సీ, ఎస్టీ అట్రాసిటీ సహా పలు కేసుల కింద మంగళవారం ఉదయాన్నే ఎమ్మెల్సీలు తాతా మధు, నవీన్‌కుమార్‌రెడ్డిలను పోలీసులు అరెస్టు చేశారు. అయితే, కోర్టు వారిని రిమాండ్ చేయడానికి తిరస్కరించి పూచీకత్తుపై విడుదల చేసింది.

శాసనసభ ప్రదర్శించిన ఆధారాల ఆధారంగా ఇద్దరి సభ్యత్వాలను రద్దు చేయాలని సభ తీర్మానించింది. ఆ తీర్మానాన్ని మండలికి పంపడంతో, ఈ సెషన్ పూర్తయ్యే వరకు వారిద్దరినీ సస్పెండ్ చేస్తున్నట్లు మండలి ఛైర్మన్ గుత్తా సుఖేందర్‌రెడ్డి ప్రకటించారు.

స్పీకర్‌పై వ్యాఖ్యలకు నిరసనగా కాంగ్రెస్ దళిత సంఘాలు కేసీఆర్ ఎర్రవెల్లి ఫాంహౌస్ ముట్టడికి పిలుపునివ్వడంతో అక్కడ తీవ్ర ఉద్రిక్తత ఏర్పడింది. కాంగ్రెస్, భారాస శ్రేణుల మధ్య ఘర్షణ పూరిత వాతావరణం నెలకొనడంతో పోలీసులు లాఠీఛార్జ్ చేసి ఇరువర్గాలను చెదరగొట్టారు.

ఈ క్రమంలో నిరసన ప్రదేశానికి వెళ్తున్న భారాస ముఖ్య నేతలు కేటీఆర్, హరీశ్‌రావులను హకీంపేట వద్ద పోలీసులు అదుపులోకి తీసుకున్నారు. మరోవైపు శాసనసభలో నెలకొన్న పరిస్థితులు, తదుపరి అనుసరించాల్సిన వ్యూహాలపై ముఖ్యమంత్రి రేవంత్‌రెడ్డి మంత్రులతో అత్యవసర సమావేశం నిర్వహించారు.

సభ గౌరవాన్ని కాపాడటం, ప్రతిపక్షాల వ్యూహాలను తిప్పికొట్టడంపై ముఖ్యమంత్రి కీలక ఆదేశాలు జారీ చేశారు. ఈ పరిణామాలన్నింటితో బుధవారం నాటి శాసనసభా సమావేశాలు మరింత వేడెక్కే సూచనలు కనిపిస్తున్నాయి.