Pocharam Srinivas Reddy: సర్కార్‌పై పోచారం సమరం.. సీఎం రేవంత్ మాట తప్పారు!

Pocharam Srinivas Reddy: తెలంగాణలోని కాంగ్రెస్ ప్రభుత్వ తీరుపై మాజీ స్పీకర్, బాన్సువాడ ఎమ్మెల్యే పోచారం శ్రీనివాస రెడ్డి తీవ్రస్థాయిలో ధ్వజమెత్తారు. సిద్ధాపూర్ రిజర్వాయర్ నిధుల మంజూరులో జరుగుతున్న జాప్యంపై ఆయన తీవ్ర అసంతృప్తి వ్యక్తం చేస్తూ ప్రభుత్వ ఉనికినే ప్రశ్నించారు.

ఎన్నికల సమయంలో లేదా గతంలో ఇచ్చిన హామీని ముఖ్యమంత్రి రేవంత్ రెడ్డి నిలబెట్టుకోలేదని, సిద్ధాపూర్ ప్రాజెక్టు విషయంలో సీఎం మాట తప్పారని పోచారం విమర్శించారు. నిధుల కోసం సంబంధిత మంత్రికి దాదాపు 20 సార్లు విన్నవించినా ఫలితం లేదని.. నిధులు కావాలంటే మంత్రుల కాళ్లు మొక్కాలా? అని ఆయన ఆవేదన వ్యక్తం చేశారు. ఈ ప్రభుత్వంలో ఎమ్మెల్యేలకు కనీస గౌరవం దక్కడం లేదని, మంత్రులు ఎమ్మెల్యేల ఫోన్ కాల్స్‌కు కూడా స్పందించడం లేదని ఆరోపించారు.

అస్సలు రాష్ట్రంలో ప్రభుత్వం ఉందో లేదో కూడా అర్థం కాని పరిస్థితి నెలకొందని పోచారం ఎద్దేవా చేశారు. రిజర్వాయర్ పనులు నిలిచిపోవడం వల్ల రైతాంగానికి జరుగుతున్న నష్టాన్ని వివరిస్తూ, వెంటనే నిధులు విడుదల చేయాలని ఆయన డిమాండ్ చేశారు. పోచారం చేసిన ఈ వ్యాఖ్యలు ఇప్పుడు తెలంగాణ రాజకీయాల్లో హాట్ టాపిక్‌గా మారాయి.