DGP CV Anand: అడవుల్లో మిగిలింది ఆ ముగ్గురే.. నరహరి లొంగుబాటుపై తెలంగాణ డీజీపీ సీవీ ఆనంద్ సంచలన వ్యాఖ్యలు!

DGP CV Anand: తెలంగాణలో మావోయిస్టు (Maoist) పార్టీకి భారీ షాక్ తగిలింది. ఆ పార్టీలో అత్యంత కీలకమైన కేంద్ర కమిటీ సభ్యుడు పసునూరి నరహరి అలియాస్ భాస్కర్, తన భార్య దానమ్మతో కలిసి పోలీసుల ఎదుట లొంగిపోయారు. ఈ సంచలన వివరాలను తెలంగాణ డీజీపీ (DGP) సీవీ ఆనంద్‌ మీడియా సమావేశంలో అధికారికంగా వెల్లడించారు. నరహరి లొంగుబాటుతో మావోయిస్టు శ్రేణులకు గట్టి ఎదురుదెబ్బ తగిలిందని డీజీపీ పేర్కొన్నారు.

డీజీపీ సీవీ ఆనంద్‌ మీడియాకు వెల్లడించిన వివరాల ప్రకారం.. పసునూరి నరహరి స్వస్థలం హనుమకొండ జిల్లా ఖాజీపేట పరిధిలోని సోమిడి గ్రామం. డిగ్రీ చదువుతున్న రోజుల్లోనే తీవ్రమైన విప్లవ భావజాలానికి ఆకర్షితుడైన నరహరి, 1982లో అజ్ఞాత దళ సభ్యుడిగా మావోయిస్టు ఉద్యమంలోకి వెళ్లారు. దాదాపు 40 ఏళ్లకు పైగా అజ్ఞాతంలో గడిపిన ఆయన, పార్టీలో తన సీనియారిటీ ఆధారంగా 2017లో అత్యున్నతమైన 'కేంద్ర కమిటీ సభ్యుడిగా' (Central Committee Member) పదోన్నతి పొందారు.

పసునూరి నరహరి కేవలం సంస్థాగత నేత మాత్రమే కాదు.. మావోయిస్టులకు సాంకేతిక బలాన్ని అందించిన ప్రధాన వ్యక్తి. తుపాకులు, మోర్టార్లు, రాకెట్లు, మరియు గ్రనేడ్ల తయారీలో (Weapons & Explosives Expert) ఆయన అత్యంత నిపుణుడు. సాంకేతిక, సంస్థాగత బాధ్యతలను ఏకకాలంలో నిర్వర్తిస్తూనే.. ఆయుధాల ఉత్పత్తి, వాటి మరమ్మతు, మరియు నిర్వహణకు సంబంధించి అడవుల్లోని మావోయిస్టు కార్యకర్తలకు ఆయనే స్వయంగా శిక్షణ ఇచ్చేవారని డీజీపీ తెలిపారు.

మావోయిస్టు కార్యకలాపాలను పూర్తిగా నిర్మూలించేందుకు కేంద్ర, రాష్ట్ర ప్రభుత్వాలు తీవ్రంగా కృషి చేస్తున్నాయని డీజీపీ సీవీ ఆనంద్‌ స్పష్టం చేశారు. అజ్ఞాతంలో ఉన్న ఇతర మావోయిస్టులు కూడా హింసా మార్గాన్ని వీడి, సమాజ ప్రధాన స్రవంతిలో కలవాలని పిలుపునిచ్చారు.

ప్రస్తుతం తెలంగాణకు చెందిన ముగ్గురు అగ్రనేతలు మాత్రమే ఇంకా అజ్ఞాతంలో ఉన్నారని డీజీపీ వెల్లడించారు. ఆ ముగ్గురు గణపతి (మాజీ ప్రధాన కార్యదర్శి), జాడే సుజాత, వార్త శేఖర్‌ వీరు మినహా తెలంగాణ మూలాలున్న కీలక నేతలెవరూ ఇప్పుడు అడవుల్లో లేరని పోలీసులు స్పష్టం చేశారు. చట్టబద్ధంగా లొంగిపోయిన మావోయిస్టులకు ప్రభుత్వం తరఫున తక్షణ పునరావాస సాయం, ఆర్థిక లబ్ధి చేకూరుస్తుందని, నరహరి దంపతులకు కూడా నిబంధనల ప్రకారం అన్ని రకాల ప్రభుత్వ సాయం అందిస్తామని డీజీపీ సీవీ ఆనంద్‌ వివరించారు.