క్షమాపణ చెప్పండి.. లేదా లీగల్ నోటీసులకు సిద్ధంగా ఉండండి! సీఎం రేవంత్ రెడ్డికి KTR వార్నింగ్!

KTR: తెలంగాణ ముఖ్యమంత్రి రేవంత్ రెడ్డి మరియు బీఆర్ఎస్ కార్యనిర్వాహక అధ్యక్షుడు కేటీఆర్ మధ్య మాటల యుద్ధం మరింత తీవ్రమైంది. గ్లోబరీనా మరియు పేపర్ లీకేజీల వ్యవహారంలో తనపై, తన కుటుంబంపై తప్పుడు ఆరోపణలు చేస్తున్న ముఖ్యమంత్రి రేవంత్ రెడ్డి తక్షణమే క్షమాపణ చెప్పాలని, లేకపోతే చట్టపరమైన లీగల్ నోటీసులు పంపిస్తానని కేటీఆర్ సోషల్ మీడియా వేదిక 'ఎక్స్' (ట్విట్టర్) ద్వారా ప్రకటన చేశారు.

ముఖ్యమంత్రి తన ఏకపక్ష పదవీకాలంలో కనీసం ఇప్పటికైనా ఒక ముఖ్యమంత్రిలా ప్రవర్తించడం ప్రారంభించాలని కేటీఆర్ హితవు పలికారు. "పేపర్ లీకుల వంటి అత్యంత దురదృష్టకరమైన సంఘటనలపై తప్పుడు వార్తలను ప్రచారం చేయడం అత్యంత హేయమైన చర్య. ఇది మీ హోదాకు, మీరు ఉన్న పదవికి అపఖ్యాతి తెచ్చిపెడుతోంది. మీ చవకబారు రాజకీయ అజెండాల కోసం ఇలాంటి విషయాలను ఉపయోగించవద్దు" అని మండిపడ్డారు.

గ్లోబరీనా సంస్థతో తమకు ఎలాంటి సంబంధాలు లేవని కేటీఆర్ మరోసారి స్పష్టం చేశారు. "బీఆర్ఎస్ పార్టీకి గానీ, నా కుటుంబానికి గానీ, వ్యక్తిగతంగా నాకు గానీ గ్లోబరీనాతో ఎటువంటి సంబంధాలు లేవని తేల్చి చెబుతున్నాను" అని ట్వీట్‌లో పేర్కొన్నారు.

రేవంత్ రెడ్డి తీరుపై విరుచుకుపడిన కేటీఆర్.. "మీరు చేసిన అబద్ధపు ఆరోపణలకు క్షమాపణ చెప్పాలి, లేదంటే చట్టపరమైన చర్యలను ఎదుర్కొనేందుకు సిద్ధంగా ఉండాలి. నా న్యాయ బృందం త్వరలోనే మీకు అధికారికంగా నోటీసు పంపుతోంది" అని వెల్లడించారు.

చాలాసార్లు సీఎం రేవంత్ రెడ్డి చేసే అసభ్యకరమైన, అసంబద్ధమైన ఆరోపణలకు తానేమీ స్పందించలేదని, అలా మౌనంగా ఉన్నంత మాత్రాన ఆయన వ్యాఖ్యలను అంగీకరించినట్లు కాదని కేటీఆర్ వివరించారు. కేవలం ఈ రాజకీయం అనే బురదలో కుస్తీ పట్టడం ఇష్టం లేకే ఇన్నాళ్లూ ఊరుకున్నానని, ఇకపై సహించేది లేదని స్పష్టం చేశారు.